Blader door transcripties » Stadsarchief Mechelen

archieftoegang 2, inventarisnummer 534, pagina 37

Vort, wie dat meer dan op enen piil lakene staende hilde verborde
van elken laken v. s.
Vort, wie enich laken toende omme te vercoepene vore dat die clocke op
die halle gheluudt ware, hi verborde x. s. van elken lakene dat hi toende
ochte toennen dade naer dat die clocke gheluudt ware, hi en hadde
coemanne vore hem al die wile dat die clocke luude, si verborden x. s.
van elken lakene dat si toenden.
Vort wie enich laken streken met caerden of met borselen die
wile dat ment toent ende verrcoepen mach. Dats te verstane tusschen
ii. clocken verbort van elken lakene v. s.
Vort, soe wie een laken ghinghe besien in perssen ochte in ramen
of soe ware dat ware buten den laken huuse om te coepene ochte te
vercoepene, hi verborde xx. s. alsoe dicke alse hiit dade.
Vort, wie lakene coechte in den piil daer hi in lakene hadde, verborde
van elken lakene xx. s. alsoe dicke alse hiit dade.
Vort, wie lakene coept moetse van den laken huse draghen of
draghen doen. Ende hine en machse niet weder op thuus bringhen
noch vercoepen op dien selven dach. Soe wie hier ieghen dade,
verborde van elken lakene xx. s alsoe dicke alse hiit dade.
Vort, wie lakene vercoept die sine niet en siin ende tote den
gheven gheet dies die lakene siin ende coepse minghelts dan hise
vercocht heeft dats diefte ende die deeken salre na staen ende doent
handelen met rechte.
Vort, niemen en mach loen nemen van lakenen die hi vercoept
binnen Mechelen die sine niet en siin, wie dat dade, verborde van elken
lakene x. s. alsoe dicke alse hiit dade
Vort, wie lakene sette vander ere stad tote der andre om bat te
stane voerder dan sinen gherechten omme ghanghe te behoudene
toe behoerde, verbort van elken lakene x. s. alsoe dicke alse ment dade,
het en ware bi sdekens wille.
Vort, wat lakene dat op laken huus heeft gheweest ene warf sal
quite bliven met sinen iersten halle ghelde tote dat ment vercoept
ende wiet cochte ende weder op thuus brochte, soe sout halle ghelt
gheven alsoe dicke alse ment vercochte ende weder op de halle
huus brochte.
Vort, wat samecoepere dat samecoep van lakene nempt, mach mpen
van elken ponde nemen enen. s. ende nemmeer wat samecoepere meer
heisschete ochte namen in ghelde ochte in scoenheiden, verborde xx. s.
ende een iaer siin ambacht ochte c. s. vore dambacht wie meer
gave, verborde van elken scellinghe xx. ende gave hi scoenheide
vander werde die ghelike.
Vort, soe en sal gheen samecoepere comen op thuus boven noch
beneden hi ende hebbe sinen coeman met hem wie dat dade, verborde
v. s. alsoe dicke alse hiit dade.
Vort, soe wie dat meer dan enen samecoepere met hem leide
op thuus boven of beneden ofte soe waer dat ware, hi verborde
v. s. ende die samecoepere v. s. wt ghenomen vremden lieden.
Vort, soe wat coemenscape dat ment doet dat te nieute bliift
daer af sone sal gheve assise noch samecoepere gheven.
Vort, wat samecoepere ochte coepmanne heistede wiinte ghevene
van lakenen die hi cochte ochte dinghe verborde van elker ghelten
wiins xx. s. Ende vander halver ghelten naer diere ghelande
ende diet wille corde te ghevene die ghelike.
Vort, soe wat samecoepere dingt of coeman die lakene dingt
dat ghebrec toent van ongheliken vraght hi wat onghelike ende
hoe vele dat dlaken heeft. Dat sal hem die ghene segghen die tlaken
vercoept op dat hiit weet ende seeght hi dat hiit niet en weet
ende coept dandre daer mede. Soe sal die ghene diet laken vercoept
daer mede verstaen alse van den ghebreke. Seeght hi wat ghe-
breke ende hoe vele ende vindet die ghene diet tlaken coept ander
onghelike, soe moet die ghene diet tlaken vercoept, dat lakenj
weder nemen wilt hem die coepere weder gheven ende daer
toe verbort die vercoepere iii. s. van elken lakene.
Vort, wie samecoep nemt of nemen doet te sinen behouf van
wollen of van lakenen ende mach ghene wolle te coepe houden no
lakene ter venten setten binnen Mechelen, wie dat dade, verborde
van elken stene wollen iii. s. ende van elken lakene xx. s.
Vort, wat manne die lakene coept op die halle dat hi die lakene
betalen moet met halle ghelde dat es te wetene met groten tor-
noysen ofte iii. inghelsche van inghelant vore enen groten op den wre.
Vort, dat men elken man recht doen sal op sinen iersten dach die