Blader door transcripties » Stadsarchief Mechelen

archieftoegang 2, inventarisnummer 534, pagina 36

dies laken ware ende die sterre diet sterde.
Vort, wat lakene dat dorkel es ochte dore caerdt ochte ghestorert ochte
in enegher manieren meshandelt, dat men metter naelden betren mach.
Dat moet men stoppen met wollen gaerne wale ende cuuschelec, ende ware
ment vonde onghemaect ochte qualec ochte met sliven gaerne torkel
dore caerdt ochte onneffene ghescort, verbort van elker ellen v. s. ende
naer die ghelande waert min of meer ende dese boete sal ghulde dies
ghene bi wies stonden dat qualec ghemaect es ende soe waer hem ieman
beclagt dat die stoppere onweselec hem te heischt van dat
hi hem ghemaect heeft, sonder vore besproken vorwarde dat selen besteden
de ghesworne van den wolle werke ende dat laken sal men met sinen loede
laten ongheseghelt tote dat al ghemaect es dat men met redene sculdich
te seghelne ende wat waerdere diet laken seghelde ende ware versien metten
gheswornen dat seghelens weert ware, hi verborde c. s. alsoe dicke alse hiit dade.
Vort, wat lakenen dat men vercochte dat dweerse nade hadde ende ment
den ghenen niet en seide diet cochte moeste betren iiii. s. van elken
nade al waert wale ghemaect ende dat moet siin sonder dlaken te
cortene ochte met onghevalle ten ramen omwee ghewonden worden
ende dat moet den deeken ghetoent siin eer ment maect ochte men
verbort xl. s. vanden lakene alhevet sine lingde ende waert te cort
te handelne na vonnesse ende die ghene diet vercoept moet weder
nemen op dat siis over een niet en draghen.
Vort wat lakenen men vercoept daer ghebreec in valt in wat
maniere dat es moet ghebetert siin met manesse soekens met
wiisooemde der ghesworne van den wollewerke wt ghenomen
datter vore verclaert es.
Vort, wie dat een laken vercochte, dat hi selve ghemaect hadde
ende die seide dat met greynen ghemingt ware, verborde dlaken
ende xx. s. ende alsoe dicke ende alsoe ghelike verborde ment waert in den
lakene ghevarwet.
Vort, sone mach niemen die ter commoengien behoert van Mechelen.
vremde lakene legghen in Mechelsche vonde noch legghen doen,
wiet dade, verborde xl. s. van elken lakene alsoe dicke alse siit dade.
Vort, niemen en setten vremde lakene binnen Mechelen of daer
buten onder Mechels ghewant, wie dat dade, verborde c. s.
Vort, sone salmen op heyleghe daghe die de heyleghe kerke ghebiet.
te vierne dlaken huus niet op doen noch comenscap moghen doen
van lakenen.
Vort, sone en mach nieman coemanne noch samecoepere na hem
trecken nochroepen noch toe hem halen opt dlaken huus, wiet dade,
verborde telken male x. s. alsoe dicke alse ment dada, end wiet vort brochte,
soude hebben tfierendeel vander boeten.
Vort, wie lakene af stote van sinen pile ieghen enen coeman hine ware
toe vermaent van den coeman of van den samecopere, hi verborde v. s.
van elken lakene ende diet vort breinct sal hebben tfierendeel vand
boeten ende alse die coeman leden es moet hi die lakene vorvoets
weder op setten op die selve boete het en quame vorvoets een ander
coepman diese begherde te siene.
Vort, sone mach nieman die tonser commoengien behoert comen
over iemans coemenscap opt dlaken huus beneden oft boven sine
siinre toe gheroepen wiet anders dade elc verborde x. s. ende wiet vort
brochte sal hebben tfierendeel vander boeten.
Vort, soe wanneer soe men omme sal gaen soe moet die laken
meester thalle huus op doen binner der scellen dat ander werf luut
te prochiaen messen ende dan sal men omme gaen eer men toent
ende en quame, die halle meester niet noch niemen van sinen weghen
daer binnen, soe verboerde hi v. s.
Vor, die ghene diere laken op hebben moeten te dien tselven tiden
comen ende en comen si met te dien tiden binnen der scellen soe ver-
borde elc laken i. s.
Vort, soe moet de deeken of ieman van sinen sinen talven daer
te tide siin ende diet wachte ende en vindense niemene vore den
piil diene vort sett soe sal die deeken of ieman van sinen weghen
die lakene vore op den banc doen setten ende dan heef elc laken laken
verbort enen. s. Daer mach hi pant ane nemen alsoe selc alse hiit
vint inden piil siit colecte siit slaeplaken siit zacke ende en comter
die deeken niet te tide noch en waerdeert, soe verbort hi xx. s. ter
ghesworne bouf van de wollewerke te verterne met den ghenen die
si willen.
Vort, soe moet men op dlaken huus omme gaen telken xiiii. nachten
dies te verstane boven ende beneden.
Vort, en mach nieman meer hebben op laken huus lakene dan xvi.
die moeten staen op enen piil wiere meer op sette van elken lakene
dat daer boven ware, verboerde men xx. s.