Blader door transcripties » Stadsarchief Mechelen

archieftoegang 2, inventarisnummer 534, pagina 35

Vort, moet men van der stad weghen waerderes setten ten ramen
soe datter ghenouch siin ende diet wel connen ende blameerden die waer-
deres enich lakene van meswedene of van andren dinghen daer
hem die ghene af beclaget dies dlaken es dat tonrechte ware,
ende begheres een vonnesse dat ghebrec moeten die ghesworne
sien van den wollewerke ende dat bestrden met enen vonnesse. Ende
bliift de ghene verwonnen dies dlaken es soe verbort hi dobbel boete.
Vort, wat lakene dat men varwet te Mechelen in lakene dien
sal men noch enen seghel gheven bi den andren seghele ende dese
ghevarwede lakene moeten gheseghelt siin eersi in die vonde
comen, wie datse vondt of dade vonden sine waren gheseghelt
wiet dade, verboerde van elken lakene xx. s.
Vort, dese voreghenoemde lakene al ent dat sake dat si den iersten
seghel hebben van der stad worden si daer naer dore caerdt ofte
te broken in de ramen ochte eldre soe moeten die lakene wel ghe-
maect siin met wollen ghaerne, wie datse vonden dade of vonde
in diere manieren, hi verborde van elken lakene xx. s.
Vort, sone mach niemen gheen cort laken breeder setten op
die ramen dan xi. vierendeel waert ment breed vonde dat
soude men suden in drein stucken.
Vort, wat lakene dat ongheliic ware ende onghelike grover
ware dan dander ware, dat laken sal men in tween stucken
sniden tghelike van den ongheliken ende de stucken sal men
den ghenen weder ghenen dies dlaken was ende dat en mach.
gheen laken worden.
Vort, wie lakene berdert smout of kempen doet in legghen
of anders soe verbort elke laken v. lb. alsoe dicke alse ment vint
ende men saelt niet ghereiden anders dan met borstelen ende
met taerden ende met stoven watere wiet anders dade of ghereide
op die voreseide boete.
Vort, en sal men en gheen stucke van den ramen moghen doen.
en si dat die waerderes tiersten besien hebben oft breet ghenouch
steet op die rame wiet anders dade, verborde van elker ellen xii. s.
ende siin si breet ghenouch soe sal men slaen ene roese biden seghele.
Vort, dat yegheliic sine lakene betren mach daer hi can eist op
die ramen eist elre na dat de waerderes dat laken op de ramen.
dat laken tiersten besien hebben, ende men sal gheen laken op die
ramen slaen en si wale ghesuvert
Vort, moet men van der stad weghen warderes setten ten ramen soe
datter ghenouch si ende diet wale connen ende blameerden die waerderes
enich laken van meswiedene of van andren dinghen daer hem die ghene
af beclaget dies dlaken es. Dat ontrecht ware ende begheres een
vonnesse dat ghebret moeten de ghesworne vanden werke der wollen
besien ende besteden met enen vonnesse ende bliift die ghene verwonnen 
dies dlaken es toe verbort hi dobbel boete ende wat waerdere hieraf gheviet
nanie verborde euwelike nuen dienst.
Ierst warven dat men ghene corte lakene breeder setten en sal op die
ramen dan xi. vierendeel wat raem meester of knape dat breeder sette
Die raem meester verborde een iaer siin ambacht ende x. lb. ende dat
laken ware verbort ende x. lb.
Vort, sone sal men gheen corte laken aen slaen op langhe rame wie dat
dade weder hi meester of cnape ware die meester verborde x. lb. ende een
iaer siin ambacht ende dat laken ware verbort ende x. lb. wt genomen
wrte breede lakene die nu in handen siin die de deekene besien hebben
ende beseghelt siin met twen seghelen ende die ghevarwede met drien
ende die sal men moeghen aen slaen ane langhe ramen ende veregghen
alsoe langhe alse duren.
Vort, soe selen alle langhe lakene ende corte hare lingde vortane moeten
hebben gheliic dat die core brief in heeft op die rame wie datse corter sette
die meester vanden ramen. Daer si ane worden gheslaghen souden ver-
boren x. lb. ende een iaer siin ambacht ende dat laken soude men in drien
sniden. Ende dat dmiddelste ware verbort ende x. lb. ende van allen desen
voreghenoemden poenten soe selen die raem meester ghilden dese boeten.
Indien dat siit hebben ghedaen sonder beheten van den ghenen dies de
lakene siin ende doet die raem meester met beheete soe elc draghen sinen
last.
Vort, dat men gheen lanc laken brederne sal moeghen letten op die
ramen dan iii. ellen wat raem meester of cnape dat breder sette die
raem meester verborde een iaer siin ambacht ende x. lb. ende desen last
sal draghen die ghene dien sculdich es te draghene also alse hier vore
int naeste poent es verclaert.
Vort wie lakene doet becorten metter steere moetse becorten van
den enen egghe toten andren egghe dlaken al dore ende wie becorten
dade op den enen egghe ende in den rugghe niet yegheliic verborde x. s.