Blader door transcripties » Stadsarchief Mechelen

archieftoegang 2, inventarisnummer 534, pagina 34

Vort, wat dat men pleyn maect in den gaerne ghevarwet dat es
verbort ende xx. s. eist cort eist lanc.
Vort, mach yegheliic scaepvaer maken op vlaemsche warpe dats
te verstane lam garen onghesmout ten witten rocken ende voeder
laken mach men maken in deser manieren.
Vort, wat men vint van witten plaeyn in lakene ghevarwet
ofte groen dat van witten lakenen ghegroen ende in den lakene
ghevarwet dat es verbort wt ghenomen moreit roet ende gheel.
Vort, waer dat men vint pleyn in den gaerne ghevarwvet dat es
verbort.
Vort, wie dat ghesmout garen versaedde verduncte of vervarwede dat
ware verbort.
Vort, wie dat binnen Mechelen woenachtich es en mach gerande
pleyn ghewant buten mechelen maken noch maken doen wiet dade.
verborde x. lb. ende een iaer ghewant te makene noch daer ane
hem te gheneerve.
Vort, soe wat lakene ten ramen comt dat qualec ghewiet es
dat verbort v. s. ende v. s. sal ghilden die ghene bi wies scouden
dat qualiic ghewiet es ende daer sal men neffens dloet ene roese
slaen ochte enich bi teken ende laten ongheseghelt en de alse men
dat laken vonde soe moet men dat loet ane die roese ten egge
wt dlaken hanghen vore wiet anders dade of vande verborde xx. s.
Vort, wie vremde lakene heeft binnen Mechelen meshandelt
of mesvoert die deken mach orlof gheven in orconscapen den
gheswornen die lakene te veregghen ter selver breidden ende
ter selver lingden alse hem behoerde te stane danen dat si siin ende wiet
dade ochte dade doen verboerde van elken lakene xl. s.
Vort, wie lakene op die ramen versaghe metten wiet ysere ygheliic verborde
v. s. hoe menich datter ware.
Vort, wat lakene dat ten ramen quame blaeu ghemingt ghedraet
ghedobbelsteen ochte in wat manieren ment maken mach vallet
ongheliic dat kenlec si dien sal men den seghel af sniden ende alse ment
wondt salmen den ghecorten lap vore wt hanghe wiet anders dade
verborde xx. s.
Vort, wat lakene dat ten ramen comt daer ghene blame ane en es
Dat salmen seghelen ende alse ment vondt sal men den seghel ten egghe
wt hanghen vore wies anders dade, verborde xx. s.
Vort, wat langhere lakene staer lakene lingde ten ramen comt moet l.
ellen lanc staen op de ramen waert corter stonde verborde xx. s wtghenomen
ase ment veregt ochte ander warwen ane slaen soe maget passeren met
xlviii. ellen ende stont cortere het verborde xx. s. Ende daet die aen
slaen, die aen slaghere soe verborde hi de boete ende daet die portre
soe verborde hise selve.
Vort, wie een pleyn laken cortere secte ane die ramen gheweest dan
xl. ellen, hi verborde x. s. van elken lakene waert dat sake dat die aen
slaghere dade bi sinen wille, soe soudi die boete ghilden.
Vort, wat lakene dat vore ane die ramen gheweest heeft ende siin
ghetughe ghehad heeft dat mach passeren net xxxix. ellen eist
onghevarwet alse ment ane die ramen slaet ent corter het verbort x. s.
Vort, sone mach men gheen dunne dicke laken setten men in die
breide dan xi. vierendeel wie dat dade, verborde van elken stile daer
ment te sin al voude sonder die ende stile, ende van elken dicke lakene
ix. vierendeel.
Vort, wat lakene ten ramen comt dat men aen slaet ende met quader
hoeden te broken wert ende dat ghestiet biden aen slaghere ende die
ramen onder handen hebben soe hoe soe siit versoemen bi haren toe
doene dat moeten si betren met wisdoeme der ghesworne vanden
wolle werke na der groetheit der mesdaet.
Vort, sone mach men gheen laken corten van den ramen comt ende
wie siins selves laken corte of corten dade, verborde dlaken ofte i. lb. grote
en conste men dlaken niet ghecrieghen ende i. iaer sine coemenscap ende
corte iemen of dade corten dlaken dat sine niet en ware om tonkeerne
tcortsel den ghenen diest dlaken ware dat soude men rechten alse ment
diefte sculdich es te rechtene.
Vort, wie een laken van den ramen dade die waerdeers en haddent
besien ende ghewaerdeert, hi verborde van den lakene c. s. diet dade.
Vort, wie een laken dat vremde ware dade seghelen metten mechelscen
seghele dat laken ware, verbort ende x. lb. ende dien last es sculdich
te draghene diet seghelen doet ende weet dat vremde es.