Blader door transcripties » Stadsarchief Mechelen

archieftoegang 2, inventarisnummer 534, pagina 33

Vort, yeghelike die stucken maect moet bringhen vore die dekene te seghelne
alst gheweven es eer ment eerdt, soe sal mense seghelen ende elc stucke
sal gheven i. s. te seghelne den deken diet seghelt.
Vort, wie een stucke ongheselt ter volderiden brachte ochte sende verborde
x. s. van elken stucke alsoe menich alser ware ende hiit dade.
Vort, wat voldere een stucke te comme dade roe dat niet beseghelt
ware yegheliic verborde v. s. van elken stucke alsoe menich alser ware ende
hiit dade.
Vort, soe moet elc hoerlinc metten seghele die voldre af sniden eer
hiit eerdt ende alsoe tstucke ghevolt es soe moet die hoerinc met die
selven seghele daer ane ghenayt siin waer ment ongheseghelt vonde
in deser manieren dat boven bescreven es daer waert verbort men mocht,
wittelec betoghen dat den voldre beseghelt ware comen ende wie
stucken vercoepen wille, die en maghet niet vercoepen buten siere
herberghen en si int laken huus striipee biden striipten ligghende ende
pleyn biden pleynen ligghende wies anders coepliicte ochte vercochte
verborde ii. s. van elker ellen ellen.
Vort, wat volders laken of stucken qualike maken dat moet hi betren
naer die stade die hiere ane doet alsoe alst die ghene betughen mach
Dies die lakene siin oft die stucken siin met manessen soekens ende met
wiisdoeme der ghesworne van den wolle werken daer siis niet over een
en draghen.
Vort, wie stucken of lakene maect van drommen dat ware verbort.
Vort, wte te Mechelne woent en mach stucken maken noch doen.
maken buten ter vriheit van Mechelne wiet dade, verborde stucke
ende xx. s. alsoe dicke alse hiit dade.
Vort, wie stucken maken wille hi moetse maken in deser manieren
van breidden elke varwe bi hem na dien core van dien lakene elc na
sine varwe beide in steerne ende in breidden op die ramen waer ment
te neder voude optghetouwe verborde elc twist x. s. ende hadt sine
breidde niet op die rame gheliic den lakene dats te wetene van elken
stile ii. s. sonder die hoeft stile te beiden eenden.
Vort, soe wie langhe te Mechelen ghewoent heeft, dat si wolle
werc maken mochte hadde hi goets ghenoch hi maken mach
stucken wit ofte blaeu of ghemingt van ii. wollen wat stucken
dat hi anders maecte die macht niet en heeft wolle werc te makene
hi verbort die stucken.
Vort, wat noppersen verleserssen ter plaetsen quame ende werc
hadde, verbort ii. s. alsoe dicke alse hiit dade.
Vort, soe en mach niemen nopperssen noch stroederssen hueren dan
die ghene dies dwerc es ende men sal hen ghenen nemmer meer dan
ix. sdaghes meer dan die beghinen hebben ghemeinlec ende wie
hier ieghen dade, verborde v. s. alsoe dicke alse hiit dade.
Vort, wie hem bestaden wille te noppene te stroedene of te verlesene
moet staen buten kerchoven voer ser aerds van waerloes woninghe
was ende wie hem elre verhuerde in der kerken ofte op kerckof verbort.
ii. s.
Vort, en mach niemen die ter commoengien behort van Mechelen.
en mach binnen der vriheit van Mechelne lakene om huere maken
wiet dade, hi verborde van elken lakene c. s. beide die ghene diet gave
om hiere te werkene ende die om huere wrachte.
Vort, sone mach nieman die ter commoengien behoert van Mechelen
ghelt nemen van vremden lieden te halven waesdoeme lakene te
makene noch stucken wiet dade, verborde dlaken ofte stucke ofte
wolle ofte gaeren daer ment onder vonde.
Vort, en mach hem nieman vremds wollewercs onderwinden
doen te ghereidene binnen Mechelen wies hem onderwonde verborde
van den stene xx. s. Ende dat daer ane ghewracht voude binnen
Mechelen ware verbort.
Vort, soe wie ghelt nemen sal te halven waesdoeme beide die ghene
diet gheeft ende diet nemt selen comen vore die dekene ende die ghesworne
vanden wolle werke ende hem condich maken sone en mach nieman
die aldus ghelt te halven waesdoeme wolle werc maken dat siins
selves sonderlinghe es wiet anders sins dade, verborde c. s. alsoe
dicke alsiit daden van elken lakene.
Vort, en sal nieman laken noch stucken maken pleyn en moet
in de wolle ghesmout siin ende dwarpt uten wevele ghestrocken
siin. Ende wie steerde ghesmoute onder onghesmoute dat soude men
in iii. stucken sniden. Ende dmiddelste ware verbort en xx. s. waert
cort waert lanc ochte waert in den gaerne ghevarwet ende van wevele
dies ghelike.