Blader door transcripties » Stadsarchief Mechelen

archieftoegang 2, inventarisnummer 534, pagina 32

haelt om vort te bestadene. Ende moghen hen wolle wercs onder winden dan omsoen
te kennnene ochte wolle te haelne te bestadene te spinnene ende waert ment
anders vername dat ware verbort waert in wollen waert ingaerne waert in
lakenen ofte in stucken.
Begheert enich der voreghenoemder wolle werc te makene soe moeten
si hen onttommeren van wollen ende van gaerne ende si van den lieden hebben
ende yegheliken tsine gheven ende daer na moeten si comen ane die dekene
ende vore de ghesworne van den wolle werke ende segghen wies si gheplo-
ghen hebben ende wies si pleghen willen ende dan sal men yegheliken
setten met sinen wille int pappier ende dien selven dach. Ende daer naer
mach die ghene die ontcommert es ende verclaert alse vorseit es wolle
werc maken. Dat es te verstane dierste iaer blaeu ende wit ende ghemingt
van ii. wollen ende vonde men daer binnen iet anders onder hem dat
ware verbort. Ende bliven si daer naer ane wolle werc. Soe moghen
si maken gheliich andren lieden ende elc van desen die aldus wolle werc
beghiiit moeter een iaer ane bliven alsoe dat hi daer binnen niet ane
en verden en mach dies hi te voren plach. Ane veerdiit binnen den
iersten iare, hi verborde xx. s. alsoes dicke alsus pleghen.
Vort, dat ghene verlererisen noch die ghene die vorevenstren houden
en in oghen hem wolle wercs onderwinden en si in deser vore ghenoemder
manieren van desen naesten poente.
Het es over een ghedraghen metten ghemeinen rade van der stad.
ende met goet dunckene der draperiers dat yegheliic portre of portersse
van Mechelen den kemmerssen op hare kemmen ghelt leenen mach
sonder u enich verboren.
Dit es dordinantie van den kemmers ierst warwen dat soe
wanneer dat men verkiest die dekene soe sal men kiesen ii. ghesworne
van den kemmers.
Vort, soe en mach nieman camme verhueren hi ende si selen selve
kemmere ende en gheen cammere en sal camme verhueren hi en hebbe.
alsoe goeden pant alse die camme werc siin wies niet en dade verborde
v. s. ende die camme.
Vort, sone sal gheen kemmere moghen kemmen moghen maken
hine salse moeten maken goet ende gheliic siin gheselscape ende en
gheen cammere sal moghen achter straten gaen camme scerpen en
si bi orlove der dekene ofte sinen ambachte op die boete die uwen heren
goet sal duncken.
Vort, es over een ghedraghen metten ghemeinen rade vander
stad ende metten goet dunckene van den drapiers dat yegheliic
portre ochte portersse van Mechelen den kemmerssen op haer kem-
men ghelt leenen mach sonder verboren enich.
Vort, dat ghene kemmersse ghemingde op kemmen sal wat kemmerssen
dat dade, verborde van elken ponde ii. s. Ende die camme ende die portre
ofte die portersse diet dade doen verborde die wolle daer ment op
beproven conste.
Vort, wat wollen den portre ofte der porterssen thuus qualiic
ghekemt quame, die soude die kemmerssen weder doen verkemmen ende
wat dekene cnape hier at orlof gave ofte ghelt name daer ment
beproven conste, verborde ten weliken daghen sinen dienst hine bracht
vore die dekene.
Vort, wat portre ofte portersse buten der vriheit van mechelen
wolle dade kemmen, verborde van elken stene v. s. daer ment op hen
beproven conste.
Vort, wat dicke dunne dat men maken sal blaeu of wit moet
ghesceert siin lvi. twiste hoghe waert min ghesceert ware men
verborde van den tviste x. s. ende van den halven wiste naer die ghelande.
Vort, wat lakene dat ghedraet es ghedobbelsteentn ghetraelget, ghe-
worptafelt, ghewisselwarpt, ghemorelt ochte in enegherande maniren
dat men maken mach daer ghene ghesodene wolle toe en es en hoert
moet lvi. twiste hoghe ghesceert siin ochte het ware verbort van elken
twiste dat men ghesteert ware x. s. ende van den halven twiste v. s.
ende daer beneden niet.
Vort, wat lakene dat ghemingt es daer ne ghene ghesodene wolle
in en es moet ghesceert siin lii. twiste hoghe ochte elc twist verbort
v. s. ende die halve lakene naer die ghelande.
Vort, alrehande ghemingde daer ghesodene wolle gheming in
es moet ghesceert siin xlviii. twiste hoghe ochte elc twist verbort
x. s. ende die naer die ghelande half.
Vort, wat lakene dat ghedraet es ghedobbelgeent ghetraghelt gheworp-
tavelt ghewisselt warpt ghemorelt ochte in enegherande maniren
dat men maken mach daer ghesworne wolle toe behoert dat moet
ghesceert siin l. twiste hoghe ochte elc twist verbort x. s. ende van den
halven naer die ghelande. Dit es te verstane daer elke wolle bi hare
ghekemt es ontghemingt.
Vort, en mach ghene dicke dunne cam dinre siin dan van l. twisten.
iii. ellen breet waert ment daer in dinre wevende vonde daer af sal
men niet berren ende hevelt ende die stachte siin verbort en x. s.
Vort, alle witte lakene ende blaeuwe moeten ghesceert siin lx. twiste
ochte daer boven ende die sal men setten op de ramen een gat breedere
dan si toe hare ghestaen hebben.