Blader door transcripties » Stadsarchief Mechelen

archieftoegang 2, inventarisnummer 534, pagina 31

Vort, soe moeten si hare lingde hebben van tanden wiese corter maecte
hi verborde die camme ende v. s. van elken pare.
Vort, soe selen si hebben hare maete hoe langhe men daer mede kemmen
sal soe wie datter mede kemde die corter ghecamt waren verborde die
camme ende v. s.
Vort, en mach nieman die kemt omhure houden waghe noch
ghewichte dats haers selves es ochte gheleent wiet dade, hi verbor-
de de waghe ende tghewichte ende ende x. s.
Vort, wat wie dat kemt om loen ende buten huus gheet sitten kemmen
metter wollen in ander liede huus hi verbort ii. s. diet doet ende van elker
varwen ii. s. hoe dicke siit doen.
Vort, wie lam wolle dade kemmen die ware verbort ende van
elken ponde xii. s.
Vort, wat kemmerssen of wat spinnerssen die seide dat ieman
gave ghelt met wollen te kemmene ofte te spinnene ende dies betught
worde ende en vonde ment ter wareheit niet soe verborde si telker varven x. s.
Vort, wat kemmerssen of wat spinnerssen die ghelt hieschen met
wollen te kemmene ofte te spinnene ende dies betught worden ter
wareheit si souden verboren v. s.
Vort, en mach egheen wiif die kemt hebben meer dan ii. stene
wollen ende die wel te kemmene wie datse qualec kemde daer ment
beproven ende betughen mochte, si verborden die camme ofte dat die
camme, wert waren ofte mochte siin ende moet dat mede betren
naer die stade die daer ane mesdaden heeft ende die ghelike moet
ghebetert siin van spinnene.
Vort, wat kemmerssen of wat spinnerssen die kemde of sponne.
wolle die te Mechelen niet en hoerde si verborde vi. s. van den ponde
daer siit wisten ende wilden siis hen onsculdeghen dat moeste
siin ten heyleghen.
Vort, wie wolle buten haelde of vremde wolle binnen ontfin-
ghe ende vort binnen gave te kemmene of te spinnene verborde
ii. s. van elken ponde.
Vort, dat ghene kemmersse no spinnersse noch vrouwen die kemmerssen
hout te kemmene om loem noch die ghene die spinne wolle haelt, om vort
te bestadene en mach hare gheens wollewercs ondewiinden, dan om
loen te kemmene of doen te spinnene.
Vort, soe en sal nieman kemmerssen noch spinnerssen ghelt gheven
noch lenen noch pennewerde noch in enegher manieren bekenden van
wollen te kemmene ofte te spinnene men brenghe die wolle weder
ghekemt oft ghesponnen ende dan es men yegheliken sculdich te ghevene
volcomelike sinen loen ghereert van dien dat hi briict ghekemt ofte
ghesponnen wie dat tghelt eer ghave leende oft beheude in enegher
manieren van kemmene of van spinnene ochte niet ghereet en ghave,
alse ment ghewracht brachte, verborde van elken scellinghe dat men eer
gane ofte beheude ofte daer naer niet ghereet en gave v. s. Ende ware
dat sake dat siit qualike ghekemt oft ghesponnen hadden ochte qualike
hare ghewichte brachten welc ghebrec de kemmerssen oft de spinnerssen
betren moeten eer men sculdech es te volgheldene hen. Ende wie dat vort
brinct sal hebben tfieren deel vander boeten ende waert beneden den
scellinghe hier vore ghenoemt ofte meer soe verbordemen na die gelande.
Vort, en mach gheen portre noch portersse draghen noch doen
draghen van haren talven wolle te kemmene noch te spinnene yeghelike
verborde van elken ponde xii. s. alsoe dicke alse ment op hem beproven mochte.
Vort, wie ghemingde wolle kemt moet enen steen volbreken eer
si beghint te gharwene ofte die eer garwede verborde van elken ponde xii. s.
Vort, wie ghemingde wolle op kemt sine ware te broken ende danghe-
garwet verborde vanden ponde ii. s.
Vort, wat kemmerssen of spinnerssen om hiere kemde of sponne
moet die wolle die si tierst haelt tiersten kemt of tiersten spinnen.
Dies niet en dade, verborde van den ponde xii. s.
Vort, wie langher wolle hilde dan ii. weken te kimmene of te
spinnene verborde van elken ponde xii. s. Ende ware dat hare ziecheit
en dade ende brachte sise onghemt of onghesponnen weder het en
dade hare dese vorseide noetsake soe verborde si van elken ponde xii. s.
Vort, soe en mach ghene kemmersse die om loen kemt ochte diese
hout om loen van haren camme te hebbene noch die spinne wolle.