Blader door transcripties » Stadsarchief Mechelen

archieftoegang 2, inventarisnummer 534, pagina 30

hi te staple doen ende vercoepense eist met in grote eist in tappen ende waert
dat sake dat een tappere van meeden die meede ieghen hem cochte in
groten eer die tappere die meede ghelevert ware. Soe mach elc man
die meede deilen toete der helft die nuse portre es. Waert dat ocht
een portre cochte meede in groten. Soe mach elc portre es hi tappere
es hi ander man dat es te verstane een half vat ende daer boven
toe der helft nemen siin ghevouch.
Vort, soe en sal nieman gaen ieghen dese meede te coepene binnen
desen voreghenoemden palen soe wannen dat si comt.
Vort, soe en sal nieman voenachtich binnen Mechelne ghene meede
buten Mechelne voeren te vercoepene sien hebben gheleghen xiiii.
nacht ten staple om te vercoepene die ten staple comen es.
Vort, sone sal negheen man van binnen Mechelen woenachtich
weed coepen op de drie milen van Mechelen om te vercoepene vort
binnen Mechelne wie dade, verbort van elker cupen x. s. alsoe
dicke alse hiit dade.
Vort, in alder manieren dat es gheodineert van der meeden
soe eist gheordineert van der wonden. Ende wie hier ieghen dade
verborde van elken vate meeden ende van elken ponde wonden v. s.
alsoe dicke alse hiere ieghen dade.
Vort, sone en mach gheen blaeu warwere nemen drinc ghelt
noch doget ghelt wiet name of gave elc van hem tween verborde
van elken penninghe xii. s. alsoe dicke alse hiit dade.
Vort, wat blaeu varvere die te vele wille rekenen van sinen
weede den ghenen die hi gheweet heeft, soe moet men versien
dat weed ghelt. Ende dan moet hem die varwere laten ghenoghen
redenliken loen die hem gheset werdt met manessen soekens
ende met wiisdoeme der ghesworne van den wollewerke die
welke ghesworne moghen te haren rade nemen wiem dat
si willen binnen Mechelne ende alsoe dicke alse die varwere
daer ieghen seide soe verborde hi xx. s.
Vort, soe moet elc blaeu varwere sine scalen enen lanc ghecort hebben
ende enen svaer ende de dekene siin sculdich tghewichte te versiene ii.
warwen elcs iaers ende daer toe alsoe dicke alse si willen ende si wanen
dats te doene es waert dat ment anders onder vonde si verborden
iii. lb. alsoe dicke alse ment vonde.
Vort, soe en mach nieman varwen met noorsloestren noch met
scorssen wt ghenomen vlecke. Wiet dade, verborde dat hiere mede
varwede ende die varwere xx. s.
Vort, soe wie vlocken dade slaen onder wolle dat ware valsch
ende men soudese verven ende elc poent verborde xii. s. Ende die wolle
slaghere verborde van elken ponde xii. s. die gheslaghen hadde
ende een iaer siin ambacht ochte c. s. vore siin ambacht.
Vort, wie water wolle ofte cam wolle van pelsen oft van vedren
of van hare dat witte leeders af doen ofto cob wolle dade onder
eneghe wolle dat ware verbort ende elc pont xii. s. ende diet sloughe.
oet van elken ponde xii. s. Dit es te verstane onder lam wolle
ochte wat wollen dat ware.
Vort, wie onder storlint sloughe enegherande dinc dan storlint
dat ware verbort ende van elken ponde xii. s. ende diet sloughe verborde van elken
ponde xii. s. ende een iaer siin ambacht ofte c. s. over siin ambacht.
Vort, wie van water wollen ofte van vlocken ofte van cam wollen,
van pelsen oft van vederen ofte haer dat witte leders af doen ofte wolle
die men heet coept wolle laken oft stucken makende dat ware valsch ende
men sout verven. Ende hi verborde van elken ponde wollen vi. s. ende van
elker ellen lakens vi. s. ende van den lakene xx. s.
Vort, wat cammere die camme maect te Mechelen moeten die tande
enen dicke siin ghemaect ende wiese ongheluc maecte deen dan dandre
van elken ongheliken tande verborde, hi vi. s.
Vort, wat camme daer men te Mechelen mede kemmen sal elc moet
hebben xxi. tande die en moghen niet wider gheseet siin dan die mate
diere toe ghemaect es. Soe ware dat mense widere vonde soe waren
si verbort ende v. s. van elken pare die kemmere diese maecte v. s.