Blader door transcripties » Stadsarchief Mechelen

archieftoegang 2, inventarisnummer 534, pagina 29

Vort, wie dat ghegreinde lakene wilt doen verberen die moetse
bringhen vore die dekene ende vore de ghesworne ende daer toe moet.
ghescien al dat hier vore bescreven es int ander poent boven van
ghemeenden lakenen wie dat anders berbeterde het ware ver-
bort ende die varwe sal berboren gheliker wiis dat hier vore bescreven es.
Vort, wat blauwer lakene of licht of sat dat men meeden wille,
ofte storroghen die men meeden wille licht of sat dat moet wel
ghegruent siin eer mense meeden mach sonder eneghe fallatie.
daer in te suekene ende dan mach ment meeden met lutel meeden
of met velen sonder verboren ende ware dat sake dat men anders
varwede soe ware dat laken verbort ende die verwere siin am-
bach verborde te euweliken daghen gheliich dat boven bescreven es.
Vort, alle die lakene die men verwen sal binnen Mechelne
met greinen of met meeden die en mach men met stonden in
borne noch in gheere tieren dinch die men daer toe peinsen mach
die dat stonde, hi verborde die lakene ende die verwerde verborde siin
ambach te euweliken daghen in al dier manieren dat boven ghe-
screven es.
Vort, dat gheen roet varwe noch blaeu varwere wollewerc maken
en mach noch doen maken noch gheselle daer ane siin in eneghe-
rande manieren wie dat dade of dade doen dat ware verbort wt
ment vonde waert in wollen in gaerne in lakene in stuckene wt
ghenoven dat si lakene coepen moghen ende weder vercoepen metter
selver verwen daer sise mede copen.
Vort, soe en mach niemen verwen noch doen varven stucken.
noch lakene met meeden daer twit in blaeuwen ghemincht es
noch ghewisselt noch ghedraet noch ghedweelt noch ghedob-
belsteent noch ghetraelget noch gherande legwerc daer twit
in blaeu es ochte blaeu in twit es en moet tierst wel toe ghe-
wond siin eer ment meedt ende dan mach men hem gheven
alsoe vele ende alsoe luttel meeden alse men wille, wie anders
dade ochte dade doen verborde lakene ende die stucken ende die
verwere diet varwede verborde siin ambach te euweliken daghen.
Vort, wie beproeft worde dat hi vremde liede lakene varwen
dade ochte maecte, dat ware verbort ende die hier af beproeft worde
verborde euwelike daer na wollewerc te makene waert
weert of iemen van sinen weghen ochte samen coepere ende die
soude verboren euwelike die halle, dats te verstaene dat die wt
noch die van sinen weghen ware noch die samecoepere nemmermeer
samecoep heffen en souden.
Vort, love mach Jan van der paelt nemermeer laken maken noch
stucken doen varwen noch gheselle siin ane ghevarwet ghewant ware
dat ment vonde ende beproeft worde metter wareheit dat ware verbort
ende hi verborde dat hi daer naer nemmer meer wollewerc maken en soude
ende ware dat sake dat hem iemen anders sine lakene dade varwen
ochte gheselle daer ane ware, hi verborde daer naer nemmermeer
lakene te varwene gheliic dat daer boven bescreven es.
Jan van leest en mach hem nemmermeer ane wolle werc gheveren
ende onder wonde hi hem wollewercs dat ware verbort.
Item Aliit stoppers en mach hare nemmermeer an wollewerc gheveren
ende onder wonde si hare wollewercs, dat ware verbort.
Item Wontre van den damme en mach nemmer meer varwen binnen.
Mechelne ende worde hi beproeft dat hi varwede binne Mechelne soe
verborde hi een iaer de stad op sine ene oghe.
Vort, wie dat meede onghemalen vercoepen sal te Mechelen, hi salse
moeten vercoepen ten staple ende die stapel sal siin daerne de scepenen.
setten selen ochte commoengie meesters ende ghesworne van allen ambachten.
Vort, soe sal dmeede vat altoes ten stapele staen ende die ghene die
dmede vat hout hine sal ghene meede moghen vercoepen noch stade
noch vrome wachtende siin anders dan die hure van sinen vate.
Vort, alle die ghene die hen te Mechelen gheveren willen met meeden
te coepene ochte te vercopene die en selen ghene meede coepen om vort
te vercoepene binnen Mechelen ieghen die ieghenen diese selen doen.
winnen binnen den palen die hier naer ghenoemt worden dats te
wetene binnen der milen al omtrent mechelen Ende buten der milen
soe moghen si meede halen ende coepense ende bringhense ten staple
ende vercoepense ten staple.
Vort, ware dat sake dat enich vremt man van buten meede brachte,
binnen Mechelen te coepe waert te watre waert te lande die meede sal,