Blader door transcripties » Stadsarchief Mechelen

archieftoegang 2, inventarisnummer 534, pagina 28

ane te nayene bi rade der dekene en der ghesworne die welke si en
men tiersten besien moeten maer nieman en mach laken moreyten.
vorsienlike ghemaect met ongheliken gaerne, wiet dade, verborde
dlaken in drien te snidene ende middelste es verbort ende xx. s.
Vort, wie dat een laken greynen dade dat roet liisten hadde,
hi verborde iii. lb. van wat varwen dat ware.
Vort, wie eneghe roede wolle of wolle die met houte of die met
meeden ghevarwet ware dade onder wolle die niet greynen ghe-
varwet ware dlaken ware verbort ende xl. s. waert stucken het
ware verbort ende xii. s. van der ellen ende waert garen of wolle
het ware verbort ende xii. s. vanden ponde.
Vort, wie een brunet laken moreyte of een ghegreint te
gadre liiste op ten boem hine daedt tenen male inden ketel, hi verborde
xx. s. ende een iaer siin ambacht ochte c. s. over siin ambacht ende
diet dade, verborde iii. lb. van elken lakene.
Vort wie dat calc dade tenegherande varwen, hi verborde xx. s.
ende een iaer siin ambacht.
Vort, en mach niemen vremder liede laken wolle vo garen doen
varwen binnen Mechelen, wie soet dade, hi verborde dlaken wolle ende
tgaren. Ende hier af es sculdich die toe bringhere den last te draghene
ende die varwere diet dade daer hiit wiste, hi verborde xx. s. van elken
lakene ende een iaer siin ambacht ochte c. s. over siin ambacht ende
van den stene wollen v. s. ende van den stene garens v. s.
Vort, waer dat bleechke toe es met andren varwen dats verbort ende xx. s.
Vort, wie beproeft worde dat hi vremder liede lakene warwede of
maecte dat ware verbort ende die hier af beproeft worde ewelike daer
naer wollewerc te makene. Ende ware dat sake dat die toe bringhere
hier af vonden worde, hi verborde euwelike wollewerc te makene waert
of v ieman van sinen weghen oft samencoepere die soude euwe-
like verboren de halle dats te verstane dat die werd noch die van sinen
weghen ware, noch die samencoepere nemmermeer samencoep heffen en souden.
Vort, soe en mach niemen binnen Mechelne breselien houte beseghen
ten wolle werke in ghere manieren daer menc ane vonde lakene ane
stucken ane wolle ane garen dat ware verbort ende die varwere diet varwede,
verborde siin ambacht te euwelken daghen.
Vort, wat varwere te Mechelne varwen sal ende men dien
varwere al selken aluun sendt daer men hem wale mede ghe-
noeght. Ende alsoe vele ende men hem sent greyne mede ont-
farwet de wolle oft die lakene dat dat sal die varwere den
portre op rechten ende betren ontfarwet vordre datit sculdich
es tontfarwene ende met meeden, die ghelike ende op die core.
Vort, dat gheen varwere vortane lakene maken en mach
noch gheselle siin daer men lakene maect binnen Mechelen.
Maer eist dat si willen soe moghen lakene coepen ende vercoepen
op thuus ende altoes vort vercoepen in die selve varwe dat sise coepen.
Ende alle dwolle werc dat si nu in handen hebben dat selen si
moghen op ghereiden tusschen dit ende kersavont. Ende wat vvarwen
hier ieghen dade, verborde tgoet.
Vort, in alle diere manieren dat gheordineert ende gheboden
es van den varwes. Soe eist gheboden en gheordeneert van den
wolle sculders ende op die selve boete. Dese core was ghemaect
des maendages na onser vrouwen dach nativiteit in iaer ons
heren doen men screef mccc. ende xxxi.
Dit es die ordinantie van den lakenen die men varwen sal
binnen Mechelen dat niemen lakene varwen en sal mach met
 meeden die weder ten ketel comen moghen weder si luttel
meeden hebben soe vele. Ende ware dat sake dat si waren mes-
varwet soe sout mense bringhen vore de dekene en die ghesworne.
Ende ware dat den gheswornen dochte dat si mesvarwet waren ende
dat men niet en versochte om enegherande fallatie dan selen die
selen die ghesworne orlof gheven te varwene. Ende die aldus souken
laken te verwene die moeten sekeren bi trouwen ende bi hare man
wareheiden dat siit souken om niet omme eneghe fallatie ende wi dat
anders ten ketel dade ende daer af beproeft worde soe dat ware dat
dlaken verbort wanneer dat men vonde. Ende die varwere sal verboren siin
ambacht te euweleken daghen. Ende ware dat sake dat hi daer na var-
wede binnen Mechelen alst hem ontwiist ware met enen vonnesse,
ende hiis beproeft ware soe verborde hi die stad x. iaer op sine
ene oghe.