Blader door transcripties » Stadsarchief Mechelen

archieftoegang 2, inventarisnummer 534, pagina 27

vonde ende van elken stene v. s. Daer men lam wolle onder vonde,
dat es te verstane verlesen wolle.
Vort, wie onder tiit wolle ochte onder peelwolle verlesen vercohte
ofte coepliicte cob wolle, die ware valsch ende men soude die cob
wolle verven ende elc steen verborde v. s. daer men cob wolle onder
vonde.
Vort en mach nemen tsaterdaghes wolle vercopen ochte
coepliicken dan op den marct buten husen. Wiese in huse vercochte,
elc steen verborde xii. s. Dit es te verstane ane verlesen wolle ochte
ghescorde ende ware dat rechende ende dan mach hise
vercoepen op dien saterdach also langhe alst rechent binnen huse
vore den hetene.
Vort, selen de wolle werkers ten ii. weken omme gaen op die
marct alse men opt laken huus doet te xiiii. nachten.
Vort, en mach niemen wolle ballen. Wie dat dade, verborde v. s. van
den stene.
Vort, en mach niemen doen wolle vlesene met ghewichte, wiet
dade, verborde v. s. vanden stene.
Vort, en mach niemen samencoep nemen ghelt op de wollemarct
hi en siere toe gheset. Wiet dat dade, verborde van elken stene xii.
s. die onse portere ware. Ende niemen en sal meer moghen nemen
dan iiii. s. van enen gheelen sacke wollen ende wolle die men met
stenen vercoept i. s. van den stene, ende wie meer gave ofte
name, verborde x. s.
Vort, wat vremder manne wolle binnen Mechelen vercoepen wille,
ochte wt setten wille die moetse leveren ghescort ochte verlesen. Wat
vremder manne anders dade, verborde dat selve goet.
Hoe men lakene varwen sal.
Vort, wat men varwen sal met greynen daer en mach men ghene
roede varwe toe doen dan greyne. Wiet dade, verborde xx. s. ende
dat hiere mede varwede ende die varwere diet doet, verbort een iaer siin
ambacht ende xx. s.
Vort, wie een laken warwen dade met greynen daer dwarp ende
devel met deen ute den andren getrocken en es et en ware beide inde
wolle ghesmont. Soe ware dat laken verbort in drien te snidene ende
dmidelste, es verbort ende xx. s.
Vort, wie dat bleecke te enegherande varwen dade dat ware
vebort ende xii. s. vanden ponde wart laken het ware oec verbort
ende xii. s. vander ellen.
Vort, en mach nieman dat stonden dat roet ghevarwet es
in loeghen noch niewerincs inne dan in stoven borne diet dade,
hi verborde van elken laken xx. s. ende waert een stucke van elker
ellen xii. s. ende van den stene wollen v. s. ende van den stene garens v. s.
Vort, soe wat portre die een laken ofte een stucke var wen dade
dat binnen Mechelene niet ghemaect en ware die verborde dlaken
alsoe dicke alse hiit dade ende xx. s. ende vanden stene garens v s
Vort, soe wat portre die een laken ofte een stucke vanwen dade
dat binnen Mechelen niet ghemaect en ware, die verborde dlaken
alsoe dicke alse hiit dade ende xx. s. Ende hi verborde tstucke ende vi. s.
vander ellen. Ende wie vremt laken ofte stucke vercochte over Mechels,
hi verborde dlaken ende tstucke.
Vort, soe wanneer een varwere sinen iersten zode ghedaen heeft
eist van wollen eist van lakenen eist van garne dan soe moeten die
warweren horen zode vorvoets wt staen, wies niet en dade verborde
van elken zode xx. s.
Vort, soe sal een iegheliic varwere sine varwe maken van verschen
borne, wie soe varwe elre af maecte, waert van greyne sope waert
van andren dinghen, hi verborde van elken standen varwen xl. s.
Vort, al dat men meeden sal, sal men met varwen meeden ende
alse men dat laken oft wolle ofte gaernen wt doet dat dan sal men
dat sop wte slaen, dies niet en dade, hi verborde van elken meede sope xx. s.
Vort, wat varwere die beeseliit op porters cost alsoe saen alse die
portre dien meester nemmeer orheren en wille, dan moet hine wt slaen.
Ende varwede hi daer mede daer naer, die varwere soe verborde van elken
meester xx. s.
Vort, soe en mach men gheen laken varwen daer toe wolle es die
men inden ketel ghevarst heeft, wiet dade ende wiet doen dade verborde
van elken lakene iii. lb. alsoe dicke alse ment dade wt ghenomen lakene
wevel striipt of warp striipt welke men moreiten mach sonder liiste.