Blader door transcripties » Stadsarchief Mechelen

archieftoegang 2, inventarisnummer 534, pagina 24

Jan bider gatien ons heren hertoghe van lottrike, van brabant.
ende van limborch ende marc grave des heyleghes riics den ghenen
die desen letteren selen sien ende horen lesen. Saluut ende kennisse
der wareheit, want wi over mids profitelike saken die ghevallen
siim in orloghe ieghen enen excellenten prince den coninc van
vranckerike ende hi ende sine ons ende den onsen van vanden onsen
ghenomen hebben ende scade ghedaen roecheleke, soe hebben wi ane
gheverdt de stad van Mechelne ende dattertoe behort in onse hande
te sine den tiidt dat dit orloghe duren sal in al selker manieren.
Dat wi in die voreghenoemde stad behouden selen ende behoeden
ende gominneren na hare recht hare vonnessen vriheiden ende hare
herbringhen. Gheliic dat de scepenen van mechelen kinnen ende
kinnen selen na dat siit herbracht hebben behouden altoes haren
gherechten heerscape al haren rechte. Ende hen oec te helpene na
onse macht ane hare gherechte heerscap vorseit te comene alsoe
verre alse wiit van rechte doen moghen sonder argheliist. Vort,
waert ieman der stad van mechelne namaels ane sprake moyen
oft staden wonde. Over mids danenerden van ons vander voreghe-
seider stad daer af gheloven wi de voreseide stad te ontheffene
ende scadeloes daer af te houdene ende alle die worwerden ghe-
loven wi met goeder trouwen. Der voreseide stad vast end
ghestade te houdene ute ghesteken alle argheliist. In orcontsapen.
van desen brieve bezeghelt met onsen zeghele in kennessen,
der wareheyt. Dit was ghedaen ende ghegheven te
brusele des donderdaghes na onser vrouwen dach inden meerte
die men seeght ter annuntiatien innden iare ons heren doen.
men screef mccc. ende xxxix. na die usagie des biscops doems
van camerike.