Blader door transcripties » Stadsarchief Mechelen

archieftoegang 2, inventarisnummer 534, pagina 23

vriheiden ge behoudene ende te ghebrukene in allen manieren dat sise nu hou-
denden siin ieghen ieghewelken diese hem breken woude in enegher maniren.
Vort, soe hebben wi ende onse steden van brabant voreghenoemdt gheloeft
ende gheloven der voreseider stad van mechelen waert dat ieman de
voreghenoemtde stad van Mechelen ane spreken woude of ane legghen
dat sii ons vorder gheloeft of ghewillecort hadden in eneghen poente
vorghenoemdt dan si sculdich ware te doene. Ende sonderlinghe van
den orloghe voreseid dat wi ende onse steden van brabant voreghenoemt,
hen dies ghestaden selen ende seker warant siin met al onser macht
ende met hen malliic met andren. Oech gheloven wi jan hertoghe ende
die goede steden van brabant voreghenoemd ende willencoren dat de
vorex stad van mechelen ofte en gheen vander stad en selen ghehouden
siin vore onse stond ofte vore onser stede stond te ghere stad. Ende
wi commoengie meestre, scepenen ghesvorne ende al de raed van der stad
van Mechelen voreghenoemt, gheloven ende willencoren dat die hertoghe
oft die goede steden van brabant ocht en gheen van hen niet ghehouden
en selen siin vore onse stond te ghere stad. Ende alle dese poente ende
stucken hebben wi jan hertoghen ende de goede stede van brabant
ende de stad van Mechelene voreghenoemt ende gheloeft ende gheloven
in goeder trouwen elc den andren vast ende ghestadich te houdene
tallen daghen vor ons ende vor onse nacomelinghen sonder argheliist.
In allen manieren dat vore bescreven staet behoudenlec altoes
elken here sinen rechte ende tallen desen poenten ende dinghen
vast ende ghestadich te houdene tallen daghen gheliic dat sii hier vore
bescreven siin, hebben wi jan hertoghe de goede steden van brabant
ende de stad van Mechelene vore ghenoemt vor ons ende vore onse naco-
melinghen, verbonden ons ende onse nacomelinghe elc met andren
sonder argheliist. Ende omme dat wi willen dat dese dinghen ghestadich
ende vast bliven sallen daghen, hebben wi jan hertoghe onsen seghel
ende wi de goede stede van brabant voreghenoemt die zeghele
hebben. Dats te wetene van lovene van brusele van antwerpen.
van bossche van tricht van thienen van leeuwe. Ende wi commoen-
gie meesters, scepenen ghesvornen ende al de raed vander stad van
Mechelene de zeghele van onsen steden ghedaen hanghen ane desen
ieghewaerdeghen brief. In orcontscapen ende in kinnessen der
waerheit. dese dinghen waren ghedaen ende gheacordeert
in iaer ons heren doen men screef dusentich driehodert ende
viiftiene smaendachs na sente deniis dach.