Blader door transcripties » Stadsarchief Mechelen

archieftoegang 2, inventarisnummer 534, pagina 21

saken ende van allen saken die goet siin ende dat dwiif ende hare mombore
selen doen metten cleede ende die scouttete saller siin hant ane slaen.
alse here behoudeleke ieghewelke sinen rechte op alselken tsiis alser
vore ghenoemt es. Alse de scouttete ghemaent heeft vanden
vierden daghe her scouttete item segt gerne op verbeteren vanden
scepenen. Allen den ghenen dies vierden dach dat es ende hors dachs
ende hors rechts ghevolght hebben alse recht hebben hare scont
verreicht alse groet alse die tafele in heeft ende vraghet den
den scepenen ofte siis volghen.
Dit es daer si sevenen na tgoet dat bleven es na eens mans doot
ende die scouttete dan maent den scepenen. Dan wiist hem die
scepen op verbetren van den scepenen. Dat hi verborghen sal eest Jan
eest Wonter eest Giliis dat hi heet. Dan heeist hi sinen talman
den scouttete dat hi mane den scepenen wat men hem scavelen sal
ende woe die eet gaen sal. Dan wiist hem die scepen. Ic segt gerne
her scouttete op verbetren van den scepenen aldus.
Die iii. lb. gote die ic ianne ane winne die hi mi sculdech soude
siin, die was hi mi sculdech te dier tiidt dat hi van live terdoot
quam ende noch es daer ic af in gebreke af ben, selp iin god helpe
ende dese heyleghen. Dan maent de scouttete vort wat men der
holperen stavelen sal. Dan wiist die scepen op verberen vanden scepenen
die eet die ian daer swoer, die es goet ende gherecht selp mi godhelpe
ende dese heyleghen. ende alse de holperen volsworen hebben, dan maent
de scouttete ofte Jan ofte alse die liede heten volcomen es ende sine
helperen, dan wiist hem die scepen aldus. Dat Jan volcomen
es ende siin helperen na onser stadrecht ende vragt den scepenen
eest van bestolene goede.
ochte siis volgen.
Dat pert ochte coe ochte die verkene ochte van saken dat bestolen
es. Dat pert dat daer vorehoghen steet, dat was mine witteghe.
hane doe icht leest werf sach ende noch es. Ende dat was mi ghestolen
diefeleke ende in ont tiidts selp mi god helpe ende dese heyleghen.
ende den helperen wist men den eet gheliich dat hier vore
bescreven es dat men ocht sveren si sevene.
Dit es op liede die ghernemt siin ende scoutete gemaent heeft.
Die xxx. s. grote diese janne ane winne die hi mi sculdech soude siin,
Die was hi nu sculdech te dier tiit dat hi ruemde ende noch es selp mi
godhelpe ende dese heyleghen. Ende daer naer den helperen alse
hier vore ghescreven ees hem derdere.
Dit es van scoude die men sculdeches ende daer men toe
vermeren heeft helpende orkonde.
Dat pont grote dat ic janne ane winne dat hi nu sculdech soude
siin, dat es hi nu sculdech selp ni godhelpe ende dese heyleghen
ochte in deser manieren ter stont.
Dat pont grote dat nu jan ane wint, dat ic hem sculdech soude
siin. Dies benich onsculdech selpe mi godhelpe ende dese heyleghen.
Eest van assisen ter ontsont.
Die v. s. grote die nu jan ane wint, dat ic hem sculdech soude
siin alse van assisen. Dies benich ontsculdech selp mi godhelpe ende dese
heyleghen. Eest allene dan eest aldus. Ende eest met helperen ane
ghesproken. Dat hebdi hiervoren ghescreven staen. Alse iemen
beghert ghelen te sine tuurghebrecht van sise ochte van stonde ende
scouttete ghemaent heeft den scepenen wat hi hem sculdech es
te doene. Dan segt die scepen aldus, ic segt her scouttete op ver-
beteren van den scepenen. Over ghebrech van sinen sise. Behoudelike
gegheliken sinen rechte, dan levert hem die scouttete dat huus
gheliic dat hem die scepenen ghewiist hebben. Dan maent hi vort
wat hier meer toe doen sal. Dan wiist hem die scepen aldus hi
saelt doen ghebieden den amman van der stad. Drieverstiinnacht
in die kerke gheeft men hem sine hebts te bat ende en gheeft men
hem tsine niet. Ende worden wi daer tenden ghelast, wi selen
wisen dat een recht es.
In jaer ons heren doen screef mccc. ende li. jaer op den maen.
dach na onser nouen dach ter lichmissen, dat doen was de seste
dach in sprockelle worden verboden alle wapenen te draghene
ende doen worden ghebandnen si xlvii ute der stad van Mechelen.