Blader door transcripties » Stadsarchief Mechelen

archieftoegang 2, inventarisnummer 534, pagina 19

Het was over een ghedraghen inden ghemeinenraet soe wie huse
heeft doen decken sider den groten brant ende net stroe heeft doen
dechken. Dat hi die huse binnen doen placken sal alsoe hoghe
als men met eenre kersschen mach ghereiken. Ende wi datse vort
maken dade ende met stroe dechken dade, die soutse doen plecken
buten ende binnen. Wie hier ieghen dade, hi verbort v. lb. Dit was
ghemacht ende over een ghedraghen des maendaghes na onser
vrouwen dach assomsio. In iaer ons heren doen men screef mccc.
ende xliiii.
Dit es hoe men enen ghesvorne lieden sal van den
ambachte.
Ten ambachte daer ic toe ghecoren ben alse ghesvorne van minen
ambachte te sine. Daer salic wel ende witteleke toe gaen ende
daer salic toe raden der stad meesten profite na minen beesten
verstane. Den raet salic helen alsoe langhe alse hi te helen es
soe miin god helpe ende dese heyleghen ende alle gods heyleghen.
Doen men screef xliii. iaer op den andren dach van wedemaent,
soe was gheboden te mechelen ten poien voer der scepenen huus dat
niemen ne gheene huse dechken en soude binnen porten van-
der stad, hi en soude dechken met tiecghelen ofte met steenen ende
wiese anders dechke, hi soude verboren den core diere op gheset was
vore den brant. Vort, was daer gheboden wie dat met stroe dechte
ofte ghedecht hadde dat hi siin hus soude plechken binnen ende
buten doen ende tuschen sente ians dach comen soude. wies niet
en dade, hi soude verboren den core diere op gheordineert was
siint den brant. Dat was c. s. op dit was over een ghedraghen
met den ghemeinen rade.
Int iaer ons heren doen men screef mccc. ende xlviii. iaer op
sente ians avont baptisten soe was over een ghedraghen met
ghemeinen rade van der stad: dat men alle putiers bannen soude
op hare hoeft ave te slane. Dat es te verstane. Soe wie ledech
ghinghe op ledeghe wive ochte goet doen name van wiven
die goet wonnen met haren line ende hier ane ghevaen worde,
met ter waereit. Dien soude men siin hoeft af slaen. Dit was ghe-
screven ende gheboden van der heren weghen ende van der stad
weghen ten poien.
Vort, soe was over een ghedraghen op den selven sente ians avont
baptisten op iaer doen men screef mccc. ende xlviii. iaer,. Soe
wie enen ballinc vinghe die ghebannen ware wte der stad van
mechelen, hi soude hebben een. lb. grote ende dit soude die com-
moengie meestre ter poien van des raets weghen ende van der
stad weghen.
Alse die scoutete te rechte gheseten es ende hi den amman heeft
doen bannen tghedinghe van onsen heren thertoghen weghen.
ende van der stad weghen, elken te sprekene te sinen rechte ende
wie anders sprake dan recht dat hiit beteren soude alse recht ende
drags ane scepenen.
Item, dan maent die scoutete aldus ende seghet al dus her peter
her wonter. Item, mans u van allen den ghenen die beset ghedaen
hebben. Zeit van doderhant ochte van voersluchteghen lieden
hoe si horre claghen volghen selen. Dan antwerden de scepenen.
aldus her scoutete item seght gerne op beteren van den scepenen.
Ghi seelt dach doen setten allen den ghenen die hem rechts vineten
talselken goede alse bleven es achter doder hant ochte van voer-
fluchteghen lieden daer claghe op ghedaen heeft gheweest van
der hanen ten nacsten dindaghe ende van der erffelekeheit te
ghenechtene ende vreghet te scepene ofte siis volghen.
Soe wanneer een man vercopen wille siin hus ofte siin lant
daer hem niet ane en bliift ende die scoutete maent hoe hii sculdech
es wte te gave. Soe sal wisen die scepen aldus dies ghemaent
wert. Her scoutete item segt u gerne op verbeteren van minen
ghesellen ende siin daer meer scepenen soe sal hi segghen. Item segt
u gerne op verbeteren van den scepenen. Dat hi sal nemen een
halm ende draghen u op in u hant, des gheens behoef diet ghecregen