Blader door transcripties » Stadsarchief Mechelen

archieftoegang 2, inventarisnummer 534, pagina 18

hi te rechte staen na scepenen vonnesse.
Vort, en gheen portre ende vander stad die soffisanteleke gegoedt
es binnen der stad ofte die wille ende en mach soffisante borchtocht
gheven van siere mesdaet na dat hi mesdaen heeft. Ende en mach
in en gheen ghevanckenesse gheleit noch ghehouden worden
noch ocht siin ende al ware hi ghevaen, soe soude hi midte alsoe
selken goede ofte borchtocht wte gaen ende wte ghedaen werden
het en ware dat die mesdaet alsoe sulc ware dat hi der doot ver-
dient hadde. Ende dan sonde menne ghevaen houden toeter scepenen
op ghewiist hadden ende daer naer over rechten behoudeleke der
commoengien recht.
Vort, waert dat iemen met vonnesse van scepenen van
enegher mesdaet verclert ware dat hi der doot verdient
hadde of dat hi met haren vonnesse ter doot verwiist ware,
soe sal die here de helf van al den goede roerende ende onroerende
dat die ghene achter laet die alsoe ter doot verclert es of
verwiist es ane verden ende hebben ende dander helft sal toe
comen siere rechter ghebort.
Vort, sone en mach die here memene die ghebannen es wter stad
die weder ghenen soe vore siin terms wter stad te sine leden es
noch niemene die wter stad al willens vliet eist van sconde of van
mesdaet gheleide gheven weder inde stad te comene in de stad
sonder conscent der gherre dien si sculdich siin of daer iegen
mesdaen hebben.
Vort, sone mach die here niemens mesdaet of fayt dat
hare die stad niet ane en trect der stad van mechelen anewenden
noch daer af beternisse der stad eyschen maer die ghene sal
sine borden dragen die mesdaen heeft ende niet det stad.
Vort, van allen boeten van drien scellinghen op wert toete
viif talf pontden ende alle core boeten weder sii groet of cleine siin.
selen terdendeel siin der stad wt genoemende die boeden vanden
wollewerke daer boven af gescreven es
Vort soe mach die stad nu ende emmer meer vort ane hare porten,
hare grachten ende hare vesten maken betren ende starcken
alsoe alst beter ende orberleke es ende duncken sal den raet van der
stad ende en gheven man en si gheorlooft dese lettren van onsen
gitten ende van onsen willecore te brekene noch in gheere maniren
daer ieghen tedoene. In orconscape van alle desen dinghen ende
iin ewelike ghedinckenessen, soe hebben wi onsen zegel gehanghen
an dese ieghewaerde lettren die ghemaect ware ende ghegeven
de xv. kl. van aprielle int iaer ons here doen men screef
dusenticht ende driehondert ende viere.
Vort, wie beproeft worde dat hi van den kerkof quame ende hi
metter waerheit bedraghen worde ende quaet dade ende weder
keerde opten kerhof ochte in die kerke na dat hi de daet ghedaen
hadde, dien sal men bannen teweleken daghen wter stad quame
hiere binnen dat men hem siin hoef af slaen soude
Dit es woe men enen portre maecht
Van deser uren vort wert, salic hout ende ghetrouwe siin
onsere vrouwen sente marien ende den goeden sente lambrecte
ende onsen gherechten heerscape ende der stad van mechelen ende
elken te sinen rechte der stad stade, salic verren hare vrome, salic
veken waer dat ic mach na minen beest te verstane soe mi god
helpe ende dese heyleghen ende alle gods heyleghen.