Blader door transcripties » Stadsarchief Mechelen

archieftoegang 2, inventarisnummer 534, pagina 17

ende vasticheit hebben ende gherecht wesen sonder enich weder.
Vort soe wat dat scepenen met letteren besegelen, segghen.
met haren segelen ochte met haren monde tughen dat si dat
ghesien hebben ende daer over alse scepenen gheweest hebben
dat si hebben gestandicheit ende volle trouwe doen.
Vort, eest dat scepenen begheren ende siis in eneghe sake te
doene hebben si selen moghen trecken te haren hoede scepenen
van ludeke sonder enich weder segghen.
Vort, en gheen rechtre en sal moghen wesen over orcon-
scape van getughe die scepenen horen selen sonder dat hi die
getughe eeden sal.
Vort, ne gheen vremt man en sal orconscap draghen moghen
op enen portre van mechelen van eneghen fayte dat
ghevallen es binnen der vriheit van mechelen.
Vort, die twee berechters van den wollewerke van allen
mesdaden die ane wollewerc ghewallen moghen ende van
al dien dat den wollewerke toe behort ende die gesworne van
den wolle werke selen daer op wisen ende die scepenen van
mechelen selen hare hoet siin ende eyschen die berechters
helpe ane den scouchete die sal hem die scouchete gescien
doen. Want die helft van den boeten die daer af verscinen,
sal hebben de here ende dander helft die berechters omme
dwollewerc te houdene in sinen rechte.
Vort, die gesworne van allen ambachten commoegie meestre,
berechters van den wollewerke ende hare sevene gesworne
selen in ieghen worden wesen met scepenen sallen raden van
scepenen in allen orboren van nutscapen der stad wt genomen
den rade die scepenen vonnesse ane gheriint het en ware datse
scepenen daer over hebben wouden.
Vort, sal die raet hebben vander stad alle coren te settene,.
te ordineerne, te meerne ende te minderne, te verbeterne ende
te verwandelne ghelt tontfaene ter stad behoef eist in assisen
of in liiftochten te vercopene renten te beiagene of te makene
ter stad behoef waer si stat of stade hebben och gecrighen moghen
alsoe alst hem orberler dunct der stad ende te rekene van allen
haren in nemene ende wt ghevene alsi willen ende hem genought.
Vort, dat elc portre van mechelne minds consente ende orlof
sraes sal moghen wisselem ende wiisel houden omme drie
lb. lovensche die hi elcs iaers gheven den here ende elken
ghewichte dat men waghe heet, sal men ghelden enen
lovenschen penninc den ghenen die de waghe hout.
Vort, ambachte die samencoep vergieringe ende aminghe
gheheten siin ende alle maten van wat dinghen dat si siin
siin ende selen bliven onser stad vorghenoemt wt genomen
viere maten dats te wetene van honeghe van soute
van weede ende van meede.
Vort, gheven wi ende willecoren inder vorgenoemder
maniren dat niemen van wat constientien dat hi si binnen
der vriheit van Mechelen wiin vercopen en mach het en si
ii alsoe ielker marien ende op al soe selc recht alsene die por-
ters van der stad vercopen.
Vort, soe en macht en gheen here enicht water, marcht
of straten binnen der vriheit van Mechelen verhuren,
bestichten of in andre maniren bedrucken, benauwen ofte inghen
ofte dat doen doen.
Vort, sone en mach ne gheen portre buten der vriheit van
mechelen omme eneghe mesdaet worden gheleit ofte ghe-
voert in eneghe ghevanckenessen maer binnen der stad sal