Blader door transcripties » Stadsarchief Mechelen

archieftoegang 2, inventarisnummer 534, pagina 14

manen hoe hiit vort handelen sal metten rechte. Dan selen scepenen
hem beraden ende selen wisen dat hine vort eyschen sal ene werven
ende ander werven ende derdewerven openen bancken ende vier-
scaren ende bieden hem gheleide ten rechte ende dragens ane scepenen.
Comt hi vort wale spreke hem ane ende en comt hi niet alse hi
vort maent, scepenen selen seggen dat recht es. Ende dit sal de rechtre
doen vore ende na ghelic dat hem scepenen wisen. Dan sal die
rechtre manen hoe hiit vort handelen sal metten rechte. Dan
selen hen die scepenen beraden ende selen wesen dat hen wel
kenlec es dat vore hem quam ende vore den rechtre die partien
met claghen ende begherden dar men hen recht dade over den
ghenen die hen haren maech benomen (hadde) ende heeft. Ende dat
daer af te rechtre waerheit dede besitten alse een goet rechtre
ene ende (d) andre ende derde ende elke alse recht. Ende na die waerheit
dach besciet een iersten ende besat dien alse recht ende den andren
ende besat dien alse recht. Ende heden es de derde dach en seggen
en comt hi niet vort in tiids dat hi verreict es met deedincs
rechte ende met alen rechte geliic dat ghi sculdech siit te doene.
Dan sal de rechtre vort manen ofte hi langhe genouch ghebeit
heeft. Dan selen die scepenen hen beraden ende beiden dat sterren
anden hemel staen, ende alse sise sien, selen si seggen dat si lange
genouch ghebeit hebben ende selen gaen. Dan sal de rechtre
den partien dach setten hare vonnesse ane te horene ende
dan alse die dach comt, soe sal de rechtre metten scepenen comen
ter stad daer tfayt geviel ende manen den scepenen of hen
kenlec es dat den partien dach gheset es hare vonnesse ane te
hoerne. Dan selen hen scepenen beraden ende selen seggen
raet. Dan sal de rechtre enen des vonnesse manen. Dan selen
si hen beraden ende comen weder ende selen segghen her
rechtre wi hebben wel verstaen wies ghi ons hebt gemaent
Ende wisen van deser uren vortwert dien persoen witteloes,
erenloes, goedeloes siin wiif weduwe, sine kindere wesen,
siin liif ende siin goet in sheren ghewont. Wiene saghe dat
hine houden soude sheren behoef ende en conste hine niet ghe-
houden, soe soude hi na hem roepen ende criischen ende ruken alse
naer enen wolf met hanen ghecraye ende met honden ghebasse
wiet saghe ende horde ende wiste wat diede ende hem niet en
holpe siin liif ende siin goet in sheren genaden. Vort wiene
doot sloughe ende iiii. d. op sinen lichame leide of enen pant
van iii. d. daer mede es hi quite ieghen den here ende ieghen
de maghe ende vraghet ghevolghs. Dan sal de rechtre opstaen
ende ghebiede ban ende vrede ende wittich soendinc allen den
onsculdeghen wiet brake dat hi vrede breeke ende soen breeke
ware ende ghedraghes ane scepenen.