Blader door transcripties » Stadsarchief Mechelen

archieftoegang 2, inventarisnummer 534, pagina 13

Vort soe wie in achten comt van quaden fayten daer hi siin liif
ane verbort heeft daer over sal men rechten (nm) binnen mechelne
en niet overleveren. Dit es te verstane daer scepene sculdich
siin over te wisene.
Vort, wie iemene beclaghede van stucken die ane siin liif ghin-
ghen ende hi dies quite bleve metten vonnesse, of dat die claghere
siere claghen niet en volghen en woude, dat dan die ghene die
beclaght ware, sal hebben alsoe vele alse de here. Ende en hadde die
ghene die de clage dade tgoet niet dese boeten metten gheldene,
soe sonde menne bannen wt der stad tote die tiit dat hi gnoech
ghedaen hadde op sine ene oghe quame hiere eer binnen.
Alse een man mesdoet soe vele dat menne verwisen sal entie
maghe comen met claghen ane den rechtre ende rechts begheren,
soe sal de rechtre de waerheit den scepenen doen verhoren ene
ende anderwerf ende derdewerf ende elke alse recht, dan sal de rech-
tre den partien dach setten ende comen daer ter stede daer tfayt
gheviel met den scepenen. Dan sal de rechtre manen den scepenen
wat hi sculdich es te doene soe dat elken man recht ghescien.
Dan selen die scepenen dan wisen dat men dien man vort da-
ghen sal over derden dach. Ende op sinen iersten dach ende bieden
hem gheleide ten rechte ende draghens ane scepenen. Dan alse
dierste dach comt, soe sal de rechtre comen tier stad metten sce-
penen. Dan sal hi manen of hem kenlec es ofte hem dach geset
es. Scepenen selen seggen iaet alse si hem beraden hebben.
Dan sal de rechtre vort manen hoe hiit vort handelen sal metten
rechte. Dan selen die scepenen wt gaen ende hem beraden ende selen
weder comen ende selen wisen dat hi dien man vort eyschen sal ene
warf ende anderwarf ende derdewarf, openen bancken ende vierscaren
ende bieden hem gheleede ten rechte ende dragens ane scepenen. Dan
sal die rechtre manen hoet vort staen sal metten rechte. Soe selen
die hem die scepenen beraden ende selen wisen dat menne verdagen
sal over anderen dach ende op sinen andren dach ende bieden hem
gheleede ten rechte ende dragens ane scepenen. Daer naer sal die
rechtre manen of hi lange gnouch ghebeit heeft. Dan selen hem
die scepenen beraden ende selen beiden dat die sonne onder gaet
ende selen weder comen ende selen dan wisen dat hi langhe genouch
ghebeit heeft. Vort, alse dander dach comt, sal de rechtre
metten scepenen comen ter stad daer tfayt gheviel ende sal manen
den scepenen ofte hen kenlec es dat hem dach gheset es op sinen
andren dach. De scepenen selen hen beraden ende selen segghen
iaet. Dan sal die rechtre manen wat hiere vort met doen sal,
de scepenen selen hen beraden ende selen wisen dat men dien
persoen vort eyschen sal ene warf anderwarf ende derdewarf
openen bancken ende vierscaren ende bieden hem gheleede ten
rechte ende dragens ane scepenen. Dan sal de rechtre vort manen
hoet vort staen sal. Dan selen hen die scepenen beraden ende selen
wisen dat hine verdaghen sal op sinen derden dach ende dweers
nachts ende bieden hem gheleede een rechte ende dragens ane
scepenen. Dan sal de rechtre manen of hi langhe genouch
ghebeit heeft. Dan selen hen die scepenen beraden ende
selen segghen iaet alse hem tiit dunct. Vort, alse die derde
dach comt, soe sal de rechtre metten scepenen comen ende sal
hen manen oft hen kenlec es dat de derde dach es. Scepenen
selen hen beraden ende selen segghen iaet. Dan sal de rechtre vort