Blader door transcripties » Stadsarchief Mechelen

archieftoegang 2, inventarisnummer 534, pagina 12

Vort, wie al selc es dat die raet van der stad es van hem over een
draght dat hi onnutte in die stad es of van quaden fayten berucht
es dat men alsoe claer niet op hem betughen en can datter scepenen
vonnesse wt ghewisen connen, die sal men uter stad bannen na
dat men over een draghet dat orbere es.
Wie dat men dobbelent vint of betught wert daer si af of
wien men vint weddende op dobbelspel of daer af betught wert
binnen der vriheyt van mechelen, hi verbort xx. s. op dien dach
of snaests dags te gheldene op dat hiis ghemaent wart van
rechtre of van commoengie meestre of hi verbort de stad tote ane
dier stont dat hi bringht de xx. s. Ende vonde mene daer naer eer
binnen, hi verborde tforste let van den vinghere. Vort, wie opbrin-
ghen of op borghen dobbelde ofte wedde, hine mochter niet op
winnen ende een ieghelike van hem beiden verborde de stad een iaer.
Ende wie dade snaests daghes te rumene op dat hiis betught worde
ende dat hem de rechtre seide ende vonde menne daer naer eer binnen,
hi verbort dxxv. lb. of den dume.
Vort, wie dobbelinghe in siin herberghen hilde, verborde de stad
ii. iaer snaests daghs te rumene op dat hiis betught worde ende
hem op dat die rechtre seide ende vonde menne daer naer eerbinnen, hi
verbort l. lb. of sine ene hant af te slane. Woude de wert oech
segghen dat ieghen sinen wille ware dat men dobbelde in sine
herberghe, soe moestiit stappans verbieden in orconscapen van wet-
teghen lieden diet hem helpen houden ende dan verborden si die selve
boete die dobbelden of die wedden die de wert verboren soude.
Vort, wie met kalc hout ende met keghelen speelt, verbort de stad een
iaer. Comt hiere eer binnen, men salne setten in pelloriin, Nochtan
moeste hi een iaer buten der stad siin.
Vort, wie swoere biden bloede ofte biden sweere gods of eneghen
ontamelike eet van gode of van siere moeder ofte van eneghen
heyleghen, hi verbort.iiiii. s. alsoe dicke alse hiit doet ende hiis
betuhgt wert. Ende hier af sal hebben terdendeel wie soe vort
brinct. Ende wie dese boete niet en can verghelden met panden
of met penninghen, dien sal men daer vore setten int pelloriin.
Vort, waer doot slach ghevalt daer scepenen van mechelen
sculdich sine te wisene, al en volghenden de maghe der claghen
niet de commoengie meesters moesten volghen der claghen tote
dies maels dat vonnesse volcomelike ghesciet ware, weder de
mesdadeghen in achten waren sone ware, dat es te verstane die
in achten es dat hem dliif costen moet. Ende die buten achten
siin ofte es dat men verwisen moet.