Blader door transcripties » Stadsarchief Mechelen

archieftoegang 2, inventarisnummer 950, pagina 16

Meester Jan
Hemelryck
Hulst, Vos. Heere Joes Machtegale priester Lanonick der prochiekerken
in van Sinte Rommonds die vanden heeren deken ende capittelen der selver kerken
om te doene tgene dat hier na bescreven staet volcomen macht hadde
heeft opgedragen ende overgegeven tot behoef van Meester Jan Hemelryck
Twee huysen metten hoven gronde etcetera die wylen Cornelis van Boxhem
toe plagen te hoeren gelegen deen neven dandere byden Berthoutshoff
tusschen der taflen des Heylich Geest erve der prochiekerken van Sinte
Peters aen deen zyde ende wylen Ancelmus van Meerbeke erve aen
dander zyde welke huysen met haeren toebehoerten, Jan Berbier tot
behoef vanden voerscreven heeren deken ende capittelen tanderen tyden voir
achterstelligen chys die sy dair op hadden wettelic vutgewonnen
ende verreyct heeft. A Domino Mechliniensi, Waranderende etcetera. Behoudelic den voerscreven heeren
deken ende capittelen dair op haeren voirscreven chyse ende allen anderen
den haeren
VIIafebruary
de selve
Item. Jan Mol ende Jan de Gorttere als proviseurs ende inden
name vanden gasthuyse van Sinte Peters bynnen Mechelen
hebben opgedragen tot behoef vanden voerscreven Meester Janne Twee
huysen metten hoven gronde etcetera, die wylen Cornelis van Boxhem
toe plagen te hoeren, ende die Jan Barbier tot des voerscreven gasthuys
behoef tanderen tyden voir achterstelligen chys die tselve gasthuys
dair op heeft wettelic vutgewonnen ende verreyct g heeft gelegen
deen neven dandere byden Berthoutshoff, tusschen Jans vander
Nuwermoelen des jongen erve aen deen zyde ende Jan de Meyere
erve aen dander zyde. A Domino Mechliniensi, Waranderende etcetera. Calvo Domino Hospitale suo
censu predict ons als
ut supra
de selve
Item. De voerscreven Jan Mol ende Cornelis van Culixrode alias
proviseurs ende inden name vander fabriken der prochiekerken
van Sinte Peters bynnen Mechelen hebben opgedragen tot behoef
vanden voerscreven meester Janne, Een huys metten hove gronde etcetera
dat wylen Cornelis van Boxhem toe plach te hoeren gelegen over
de Corenmarct opte Aedeplaetse tusschen thuys den Vossesteert
geheeten toehoerende Willem Spoelberch, aen deen zyde ende een
cleyn strate aldair aen dander zyde, welck huys metten hove
heere Gielis Mennens priester te tot behoef vander voirgenoemde
fabriken tanderen tyden voir achterstelligen chys die de selve
fabrike dair op heeft, wettelic vutwonnen ende verreyct heeft
A Domino Mechliniensi, Waranderende etcetera Salmo de fabrica Sinx censu predit omnis
al etcetera
ut supra
Jan de Gorttere
ende Jan Molleman
de Hane es te
nieuwte gedaen want
de voirscreven Jan Moelens
gestorven es ende es
geschiet by convente
Jans de Gorttere XV
July anno LXXXVI
Hulst, Keynoogge. Jan de Grest:t; Gorttere wylen Willemssone, heeft
bekent dat hy verhuert heeft Janne Moeleman ende Kathelinen
sHeelts synen wive woenen tot weerde onder Vlain ende deselve
Jan ende Katheline syn wyf hebben oic bekent dat sy tegen den
selven Janne de Gorttere gehuert hebben, Syn hoeve metten huyse
schueren hove bogaerde landen eeusselen bosschelkens ende anderen haeren
toebehoerten tot Zempst gelegen eenen termyn van elf jaeren lange
geduerende ende deen na dander sonder middel volgen, die inne gaen
ende beghinnen zelen opten vyfthienden dach van meerte nacomende
ende soe voirtaen den selven termyn geduerende. Behoudelic oft
eenich vanden voerscreven partien ten eynde vanden jersten vyf jaeren
souden willen vanden anderen scheyden dat sy dat zelen mogen doen
maer zelen dat den anderen sculdich syn een half jaer te voren te
seggene, Ende van hebben de voergenoemde Jan Moeleman ende Katheline syn wyf
vuten gelooft ende elc van hen besundert ende voir al ongevrydt naer des
divisen recht te geven te betalen ende te leveren vut zaken vander voerscreven
hueringen den voergenoemde Janne de Gortere oft den brenger van desen bynnen
der voerscreven stad vande van Mechelen ter plaetsen dair hem dat gelieven
sal, elcx jaer vanden voerscreven elf jaeren altyt tot Kersmisse sessendertich
veertelen Rogs Mechelscher maten van alsulken Rogge als opte voerscreven hoeve by tyden
wassen sal ende oic twee pond vyfthien scellinge groten Brabants gelts daeraf
den jersten termyn van betalingen syn sal tot Kersmisse naestcomende, des es
in deser hueringen tusschen den voerscreven Janne de Gortere, ende den voerscreven Janne
Moeleman ende synen wive ondersproken ende bevorweert, Ende deselve Jan
ende syn wyf hebben dat oic toegeseydt te doene dat sy alle jaer den voerscreven tyt
geduerende, opte voirgenoemde huyse selen deken oft doen decken vier daigen
tusschen Paesschen ende Bamisse dair toe zelen sy leven stroot eenen
dack Rooden ende den moutcost voir de wercklieden ende de voerscreven Jan de
Gorttere sal betalen de dachmen. Item dat sy de wanden vanden voerscreven
huysen tot haeren afscheyden zelen laten in alsulken state ende reken
als sy die ten aenveerdene vander selver hoeven bevinden zelen. Item
dat sy oic tot haeren afscheydene opte voerscreven hoeve laten zelen twintich
schatvoederen messe ende twintich andelen stroot, Ende oft dies misse
ende stroos meer ware dat sal de voerscreven Jan de Gorttere behouden tot
goeden mannen pryse ende capacien, Item dat sy den voergenoemde hof betuynen
ende beheymen zelen ter straten waert sonder des voergescreven Jans cost oft
last, Ende dat sy alle de cuynen tot haeren afscheyden vander voerscreven
hoeven laten zelen in alsulken state als sy die ten aenveerden vander
selver bevinden zelen. Item dat de selve Jan sal lesen ende hebben vuten
bogaerde den besten Fruyboom die hem gelieven sal, Ende zelen de selve
man ende wyf alle dander quytboomen behouden. Item zelen deselve man
ende wyf voir elke veerderde wilge setten twee volgen peten, ende dair
toe zelen sy oic setten opte selve hoeve tot alsulker plaetsen als den
selven Janne gelieven sal twaelf wilgen poten, Ende dat sy oic alle
de sConinck wilgen tot haeren afscheyden laten zelen als sy die ten
aenveerdene vander selver hoeven bevinden zelen, Ende dat de selve
Jan, den voerscreven man ende wyf tot elken twee
jaeren geven sal drie elken lakens tot eenen
tabbaerde oft seven scellinge sesse penninge groten
Brabants gelts dair voire
XXIII february
Peter