Blader door transcripties » Stadsarchief Mechelen

archieftoegang 2, inventarisnummer 951, pagina 46

Bastyns synen wive, haer helft van Eenen huyse oft
woeningen, metter vetteryen ende oic metten gronde
ende anderen sinen toebehoerten, dat de voergenoemde wylen
Wouteren Caluwaert toe plach te hoeren, gelegen
inden Vettersham inde Corteerdderstrate tusschen
Gheerde de Bruyne erve aen deen zyde ende Ghysbrechts
Boels diemen heet van Campenhout erve aen dander
zyde, Ende haer helft van eenen anderen cleynen huyse
metten hove gronde etcetera dat oic den voerscreven wylen Wouter
plach toe te hoeren, gelegen aldaer tegen de voerscreven
woeninghe over tusschen Anthoenis vanden Eynde, diemen
heet van Dyeven erve aen deen zyde ende des voerscreven
Gheerde de Bruyne erve aen dander zyde, van welken
huysen met haeren voerscreven toebehoerten, dander helft den
ende sinen wive
voerscreven Cornelis Pauwels toebehoert. A Domino Mechliniensi, Waranderende. Opte weerde
van twee scellingen ende thien penningen ende eenen hellinge
grooten Brabants gelts vuten voerscreven geheelen huysen, met
haeren voerscreven toebehoerten jaerlix gaende
XIXadecembry
Hulst, Vos. Jan Lemmene diemen heet inde Croene
wettich soon van wylen Jan Lemmens diemen heet inde
Croene ende van Lysbetten van Ryemen synen wive, aen deen
zyde, Ende Lijsbeth Lemmens diemen heet inde Croene
syn wettige zuster, aen dander zyde, by bywesene wille
wetene ende volcomen consente vander voerscreven Lysbetten
van Ryemen, haerer moeder, hebben openbaerlic voir
ons bekent, dat sy alle de erffelike goeden, bynnen ende
buyten der stad ende vryheyt van Mechelen wesende ende
gelegen, die de voergenoemde henlieden byder doot vanden voerscreven
wylen Jan Lemmens haeren vader gebleven ende verstorven
syn mynliken ende veerendeliken, by tusschen sprekene van
eenigen van haeren magen ende vrienden, gescheyden ende
gedeylt hebben inder vuegen ende manieren hier naer volgende
ende verclaert, alsoe dat by crachte vander selver scheydinge
ende deylingen, de voergenoemde Jan Lemmens voer syn deel paert
ende porcie van allen den voerscreven goeden aenveerden, hebben
houden ende besitten sal, de goedest:t; tgene dat hier naer bescreven
staet, ierst Een stuck beempts houdende een half buender
gelegen inde prochie van Hevere achter de kerke aldaer ende
van een stuck beempts houdende een half buender gelegen
aldaer, byder taflen des Heylichs Geests erve vander selve
kerken, Item een stuck beempts geheeten Lannekens han
houdende omtrent twee buenderen gelegen inde prochie van
Rymenam opte Nieuwe Dele. Item een stuck beempts houden
drie vierendeel geheeten dOude Dele gelegen aldaer, Ende
een stuck beempts houdende vyf vierendeel gelegen aldaer
by de voerscreven nieuwe Dele ende achter de kerke van Rymenam
aen een stuck lants geheeten tPutteken, houdende een
half buender, gelegen inde prochie van R Meerbeke. Item
een stuck lants, houdende drie vierendeel, gelegen aldaer
opten voirs. Item een stuck lants houdende vyf vierendeel
gelegen aldaer, by Gielis van Muysene erve. Item een stuck
lants houdende een half buender gelegen aldaer opte Loebeke
Ende een stuck beempts houdende een half buender geheeten
den Katerberch, oic aldaer gelegen, op alle den chys ende
commer vut allen den voergenoemde goeden jaerlix gaende, Ende
dat de voergenoemde Lysbeth Lemmens, by crachte oic vander voerscreven
scheydingen ende deylingen daervoirgenoemde goeden voir haer
paert deel ende porcie der voergenoemde goeden, aenveerden
hebben houden ende oic besitten sal, ierst Een huys metter
hove ende synen toebehoerten, gelegen inde Kerchofstrate
opten hoeck vander Blocstrate opten chys die jaerlix
vutgaet, Ende daer toe, thien gouden Peters elken van
dien tot sessendertich grooten Vlaems gelts gerekent
jaerlix ende erffelicx chys, Op des voerscreven Jan Lemmens haere
broeders stuck beempts voer genoemt geheeten Lannekens
Ham omtrent twee buenderen houdende inde voerscreven
prochie van Rymenam opte voerscreven nieuwe Dele gelegen
daer jaerlicx niet meer vuten gaet dan eenen groeten
Vlaems gelts, welke thien gouden Peters vanden voerscreven
pryse, des voerscreven erffelix chys, heeft de selve Jan Lemmens
gelooft voer hem syn hoir ende nacomelingen, ten eeuwigen
dagen te gelden ende te betalen, der selver Lysbetten
Seven synder zuster ende oic haeren hove ende nacomelingen
alle jaere tot Kersmisse daeraf den jersten termyn
van betalingen syn sal van Kersmisse nu naestcomende
over een jaer daer naer terstont volgende van ende vut
synen voerscreven stuck beempts Lannekens ham geheeten inde
voerscreven prochie van Rymenam opte voerscreven Nieuwe Dele
gelegen, sonder eenich wederseggen, Op alsulker condicien
dat hy noch oic syn voerscreven hoir ende nacomelingen, tot
gheenen tyde ende zelen moegen lossen ende quyten, de selve
thien gouden Peters desselfs chys heeten ware byder
goeden wille ende consente vanden voerscreven Lysbetten Lemmens
synder zuster. Behoudelick nochten der voergenoemde Lysbetten
van Reynen weduen vanden voerscreven wylen Jan Lemmers
haerer moeder in alle de voergenoemde goeden ende oic int voerscreven
huys metten hove ende inden voerscreven erffeliken chys haerer
tocht paysselic ende vredelic haer leven lanck geduerende
te gebruykene, welke scheydinge ende deylinge van allen
den voerscreven goeden, alsoe die voer bescreven staet hebben
de voergenoemde Jan Lemmens ende Lysbeth Lemmens syn zuster gelooft
ende elck van hen besunder voer hen haer hove ende nacomelingen
te houden eeuwelick vast gestentich onverbrekelic ende
van goeder weerden ende daer tegen nemmermeer te
doen te seggen oft te comen oft by anderen doen seggen
oft comen in gheender manieren alle argelist vutgescheyden
XX decembris