Blader door transcripties » Stadsarchief Mechelen

archieftoegang 2, inventarisnummer 951, pagina 44

Jacoppen haeren soon endest:t;, tot sinen ende tot den voerscreven
jouffrou Lysbetten ende Kathelinen van Oprode en
zusteren ende de voerscreven Jans vander Eyken syne
neven behoef voer dander helft, oft den brieve
van desen alle jaere den voerscreven tyt ende termyn
van drie jaeren lanck duerende, als daer van dien
Altyt tot Kersmisse vyftich gouden Rynsguldenen, elken
van dien tot veertich grooten Vlaems gelts gerekent
daeraf den jersten termyn van betalingen syn salst:t;
vallen ende wesen sal tot Kersmisse int jaer dusent
vierhondert achtentachtentich naestcomende, sonder
eenich wederseggen, voertaen hebben oic de voergenoemde
Claes de Pre ende Margriete syn huysvrouwe, gelooft
gelyc voer dat sy tgene dat sy tot haeren coste ende
gerieve, zelen den breken ende maken inde voerscreven
Herberge, tot haeren afscheyden van dien, weder zelen
den Hermaken ende stellen inden selven state, alsoe zy
aenveerden ende vanden zelen. Item dat sy de voerscreven
haeffelike goeden der voerscreven herbergen toebehoerende
totten selven haeren afscheyden oic aldaer alsoe goet
laten zelen, als die aenveerden ende vanden zelen
Ende oft die gelegeert worden, dat sy dan tot goeden
Mans pryse, hen de verstaende, dat restitueren ende
vergulden zelen, Ende oft by des voerscreven Claes synder
huysvrouwen ende by haeren huys gesone ende Laken toedoen
ende sculden eenich ongeval van Brande oft anderssins
inde voerscreven herberge quame dat God verhuede, dat sy
dat gulden betalen ende oprichten zelen, de voerscreven wedue
ende haeren voerscreven kynderen, alsoe dat van rechts weghen
behoeren sal, Om welke gelooften alsoe volstentelic
tonderhoudene ende om der meerder zekerheyt de voerscreven
weduen ende haeren voerscreven kynderen ende kynts kynde daer
af te doen, Soe hebben de voergenoemde Claes de Poer ende Margriete
de Bosschere, syn huysvrouwe deselver weduen ende Jacoppen
van Oprode haeren soon, tot haeren behoef ende oic tot
behoef vanden voerscreven jouffrou Lysbetten ende Kathelinen van
Oprode ende van Janne vander Eyken, daervoer verbonden
ende te pande geset haer lyf, Ende daertoe alle haer
haeffelike ende beruerlike goeden waer die bevonden
zelen worden, die sy nu tertyt hebben ende hier
namaels oic hebben ende vercrigen zelen
IXa decembris
Hulst, Consaert. Jan Sarens, heeft opgedragen syn tocht, die hy
hadde inde dier helft vanden drie vierendeelen van
Eenen huyse metten hove gronde etcetera gelegen inde Hanswyckstrate
tusschen der kynderen erve van wylen Henricken naes, dat
nu Rommonden van Muysene toebehoert aen deen zyde ende
Coenraert de Cuypere erve aen dander zyde comende
achterweerts metten voerscreven hove tot aen jouffrou Barblen
van Duffle diemen heet Berthouts erve ende aen Jan
Melens hoff. A Domicella Johanne vander Aa juravit tot
behoef van Janne ende Anthonisen Sarens synen voerkinderen
dier ierst inne gegoet waren, Ende daer naer hebben
de selve Jan ende Anthoenis Sarens, by bywesene ende
volcomen consente van Cornelis van Nyspen ende van
Machiel Yswyn haeren momboren vercocht Aert vander
Elst scoemaker, tot sinen behoef ende oic tot behoef van
Barblen sDobbelen synen wive, tvoergenoemde huys met synen
voerscreven toebehoerten, waranderende op twee chysgulden daer
jaerlix vutgaende
Assignavit V Rynsgulden den denier XVI
XX decembry
Item. De voergenoemde Aert vander Elst, heeft vercocht
Kerstinen Yngels weduen van wylen Gheerd van Beneden
tot haeren behoef, als tot haerer tocht ende oic tot behoef
van Henricken, Barblen ende Kathelinen van Beneden
haeren kynderen, als tot haerer erfflicheyt, Twee gouden
Rynsgulden elken van dien tot veertich grooten
Vlaems gelts gerekent erffelix chys Te heffene altyt
tot Kersmisse vutgenomen Kersmisse nu naestcomende
Op ende aen syn voirgenoemde huys metten hove gronde etcetera
synen voerscreven toebehoirten. A Domino Domicella Johanna
vander Aa, Waranderende. Op twee chysgulden, daer jaerlix
voer vutgaende
ut supra
Hulst voir Jan vander Groelst, diemen heet de Meyere
heeft vercocht Peteren van Steynemoelen, onsen medescepen
Twee gouden Rynsguldenen, elken van dien tot veertich
grooten Vlaems gelts gerekent erffelix chys, die hy hadde
Op een huys met eenen cleynen hove ende oic metten
gronde etcetera Janne vander Stappen scoemaker toebehoerende
gelegen achter thuys tHoefyser geheeten, dat Janne vander
Hoeven, oic onsen medescepen toehoeren opten Gansendriesch
tusschen een ander huys den selven Hoefyser toehoerende
aen deen zyde ende der kynderen erve van wylen Willem
van Laken aen dander zyde. A Domino Mechliniensi, Waranderende. Opte weerde
van vyf scellinge groote Brabants gelts daer jaerlix voir vutgaende
XI decembry