Blader door transcripties » Stadsarchief Mechelen

archieftoegang 2, inventarisnummer 951, pagina 43

Steynemoelen, Hoeven. De voergenoemde Katheline Parys, metten voirscreven
Willem Coelen haeren man, heeft openbaerlic bekent
dat de voerscreven Mathys tSermartens Pauwels vanden
Bossche Jan Couckelbosch ende Henrick van Boeven haere
momboren, haer goede ende wettige rekeninge ende bewysen
gedaen hebben van allen haeren goeden, waer die
gelegen syn ende bevonden zelen worden, die haer byder
doot vanden voergenoemde haeren vader ende moeder in
eeniger manieren, gebleven ende verstorven syn, Ende daer
af ende oic van alle tgene dat sy de voerscreven haeren
momboren, vut zaken van dien, oft van tghene dat
in daeraf ontfangen ende vutgegeven hebben, sonder
moegen heysschen, heeft de voerscreven Katheline, met
haeren voirscreven man Quytgesconden los vry ende ledich
den voerscreven haeren momboren ende alle andere dies
quitancie behoeven geheelic ende al
VII decembry
Steynemoelen hoeven, Dierick Adriaens, by bywesene
wetene wille ende volcomen consente van heeren Jacoppen
Adriaens priester ende van Anthoenis Janne ende Ambrosius
Adriaens synen kynderen, heeft opgedragen ende overgegeven
tot behoef van Henricken de Coelenere, Een huyse metten
hove schueren bogaerde gronde etcetera gelegen tot Leest inde
Wynkelstrate tusschen wylen Claes van Cricke erve
aen deen zyde ende der kynderen erve van wylen Gheerd
Gielssens, aen dander zyde, streckende achterweerts
metten voerscreven d bogaerde, tot eenen stuck lants, den
voirgenoemde Diericken ende synen kynderen toebehoerende
A Domino Mechliniensi, Waranderende. Op Sesse veertelen Rogs goede ende custbare
Mechelschen maten, die jouffrou vanden
Dorpe beghyne, daerop heeft daer jaerlix vutgaende
Ende op alsulken last dat tselve huys met synen voerscreven
toebehoerten, medepant is ende bliven sal voir andere
Sesse veertelen Rogs, oic erfpacht vut des voerscreven Dierix
Adriaens ende synder voerscreven kynderen stuck lants jaerlicx
oic gaende, met alsulker condicien, dat de selve Dierick
ende synen voerscreven kynderen ende haere nacomelingen besitten
vanden selven stuck lants, zelen hebben ende behouden
haer vut ende in varen, metten vruchten op tselve stuck
lants wassende, doer ende over te des voerscreven Henricx
de Coelenere erve voirgenoemde altyt als hen dat geleven
sal ende daervoer ende over oic tselve stuck lants moegen
missen, als noot wesen sal, daer weest:t; sonder desselfs Henrick
oft yemante anders wederseggen
ut supra tempore simile
Hulst, Vos. Lysbeth van Rummelshem wedue van wylen
Henricken van Oprode, Ende Jacop van Oprode haer soon
inden name van hem selven ende oic inden name van jouffrou
Lysbetten van Oprode beghinen ende van Kathelinen van Oprode synen
zusteren ende oic van Janne vander Eyken, wettich soon van Jan
vander Eyken, die hy van wylen Barblen van Oprode synen jersten wive
ende der voerscreven jouffrou Lysbetten ende Kathelinen van Oprode zuster doen
sy leefde vercregen heeft, die hy in hem verving, hebben bekent dat
in Verhuert hebben Claes de Poeye ende Margrieten de Bosschere synder
huysvrouwen, Ende de selve Claes de Pre ende Margriete syn huysvrouwe
hebben oic bekent openbaerlic voer ons dat sy tegen den voergenoemde
Lysbetten der weduen ende Jacoppen van Oprode haeren soon inden
name als voer gehuert hebben, haerlieder huys oft herberghe, den
Craen geheeten, met allen synen toebehoerten, alsoe dat opte grooten
Marct van Mechelen gestaen ende gelegen is ende alsoe de voerscreven
Lysbeth de wedue dat opten dach van heden, houdt ende beset
met zekeren haeren haeffeliken goeden van hontwerke ende andere
clairliker inden innenbaeren daeraf tusschen henlieden gemaect
bescreven ende begrepen daeraf elck vanden een heeft
vutgenomen, dat de selve Lijsbeth de weduwe daerinne hebben
ende behouden sal, Twee veercammeren ende eenen soldere, Te
wetene de Nieuwe camere staende aen de vorste plaetse
vanden voerscreven huyse metter etcameren daer aen beyden deen
ganck wesende, Ende den soldere, geheeten den Droegholdere
boven de groote etcamere liggende, om daerinne met haerer
maerten ende heyde te bliven woenen ende haeren vutganck
inganck ende gebruyck, tallen tyden, als haer dat gelieven ende
goetduncken sal te hebben, Ende dat oic de voerscreven Jacop van Oprode
haer soon syn vutreyden ende syn heyden, met synen peerde ende
eenen huere voer tselve syn paert alsulke als hem beleven sal
altyt oic aldaer hebben ende behouden sal het en ware dat de
voerscreven Herberghe alsoe belast ware met peerden, dat dat
niet gebrechelic gesyn ende conste ende alsdan sal de voerscreven Jacop
tot synen veerden hebben, Een cleyn stalleken met eender
Lyeren, staende inden achtersten ganck vander voerscreven herbergen
om met synen voerscreven peerde daerinne ende vut te Rydden
gelyck voer welck Peert de voerscreven Jacop van Hoye ende Havere
besorgen sal, Ende daertoe sal hy oic aldaer plaetse hebben
die sy hem bewysen zelen, Ende dat den tyt ende termyn
van drie jaeren lanck geduerende ende deen na dandere ter
stont volgende die innegaen ende beghynen zelen, tot Kersmisse
naestcomende, Ende van dan voertaen zelen gedueren
den selven tyt ende termyn van drie jaeren, Ende vut
zaken van desen hueringen, hebben de voergenoemde Claes de Pre
ende Margriete syn huysvrouwe, gelooft ende elck van hen
besunder ende voer al, Te geven ende te betalen, de voergenoemde
Lysbetten der weduen voir deen helft, Ende den voerscreven