Blader door transcripties » Stadsarchief Mechelen

archieftoegang 2, inventarisnummer 951, pagina 39

diemen heet Musschen des voerscreven Adriaens vander toe
plach te hoeren, gelegen aenden Steenwech van Mechelen
achter de Vischbrugge, tusschen thuys oft herberghe
Doud geheeten, toebehoerende in jouffrouwen
Kathelinen Zack, wettige dochter van wylen Aert Back
aen deen zyde ende thuys de Mermyne geheeten
Philips
toehoerende, den kynderen van wylen Jan de Grooten
aen dander zyde, comende achterweerts metten
voerscreven sesse cameren, deene neven dander geleghen
tot inde Zweenstrate tusschen wylen jouffrouwen Katheline
van Elsbroeck, Willems vanden Dorpe huysvrouwen
erve aen deen zyde ende Willem Leemans erve
aen dander zyde, van welken huyse met synen voerscreven
toebehoerten, dander helft, den voergenoemde Adrianen
vanden Broeke toebehoert. A Domino Mechliniensi. Te besittene, Op eenen
jaerliken ende erffeliken chys van vierentwintich gouden
Rynsguldenen, elken van dien tot veertich grooten
Vlaems gelts gerekent, Ende die te betalene altyt tot
twee termynen Te wetene deen helft daeraf tot Sinte
Jansmisse ende dander helft tot Kersmisse, daeraf den jersten
termyn van betalingen syn sal tot Sinte Jansmisse nu naestcomende
Ende opten voerchys van eenen pond vyftien scellinge
Loevens den goidshuyse van Vlierbeke van Twaelf ponden
payments der capelrien van st:t; Sinte Annen in Onser
Vrouwen kerken van Mechelen ende twintich scellinge paymente
den sanghe int beghynhof jaerlix te betalene vuten voergenoemde
geheelen huyse met synen voerscreven toebehoerten jaerlix gaende
met alsulker condicien dat de voerscreven Adriaen sal moegen
lossen ende quiten altyt als hem dat gelieven sal, de voergenoemde
vierentwintich gouden Rynsgulden des voerscreven chys tot
twee malen ende ende niet min ende elken van dien guldenen
met sestien geliker guldenen eens daervoer met vollen
chyse te betalene
XIX aprilis
al
Dyest, Vleming. De voergenoemde Jan Ramont ende Marie syn wyf
Ende Laureys Cleynaert ende Beerters syn wyf hebben gelooft
ende elck van hen besen oft gebruede,, den voergenoemde Adriaen
vanden Broeke, oft gebeurde dat sy, die voer ons ende
onsen medescepenen in rechte hangen, tegen Gielis Mennens
van zekeren actien, die deselve Gielis seet ende pretendeert
te hebbene, totter voerscreven helft vanden voerscreven huyse met synen
voerscreven toebehoerten, by ons oft by Abters oft seggen
daerinne eenichsins gedeert worden, oft dat sy, den
selven Gielisen, daervoer met souden geven oft restitueren
dat alsdan sy den voergenoemde Adriaen van dien altyt
scadeloes quyt houden, ontheffen ende quythouden zelen
sonder eenich wederseggen, Ende om die gelooften, alsoe
te achtervolgen, Ende om der meerder zekerheyt daeraf
den voerscreven Adriaen te doen, Soe hebben in den selven
Adriaen daervoer verbonden ende te pande geset alle
haere haeffelike ende erffelike goeden metten gronde etcetera
binnen etcetera wesende ende gelegen, die sy nu tertyt hebben
ende hiernamaels oic hebben ende vercregen zelen
XIXa novembris
Diest, Hulst. Meester Hubrecht Weelmans docteur in Loye, heeft
bekent dat hy verhuert heeft Laureys de Vos ende Lysbetten Wellens
synen wive, Ende de selve Laureys de Vos ende Lysbeth syn wyf, hebben
oic bekent dat sy tegen den voerscreven Meester Hubrechten, gehuert
hebben, Syn hoeve ende goet tot Waerloes, gelegen, alsoe wylen Jan
de Vos ende Godevaert de Vos syn soon, die in hueringen, gehouden
hebben, Ende daer toe, Een half buender lants geheeten
Pluyn lant ende een stuck lants, neven den buyten gelegen
Item een beydeken, gelegen ter Beke, Ende eenen beempt
gelegen tot Rumpst over tweer, den tyt ende termyn van
Sesse jaeren lanck geduerende ende deen na dandere
terstont volgende, die inne gingen ende begonsten, tot
half meerte int jaer dusent vierhondert viventachtentich
lestleden, Ende van dan voertaen zelen gedueren, den
selven tyt ende termyn, Ende vut zaken van deser
hueringen hebben de voergenoemde Laureys de Vos ende Lysbeth
syn wyf gelooft ongevrydt na der divisen recht Te
geven te betalen ende tot Mechelen te leveren, den
voergenoemde Meesteren Hubrechten, als jaers vanden voerscreven
Sesse jaeren altyt tot Kersmisse daeraf den jersten
termyn van betalingen was, tot Kersmisse int jaer
dusent vierhondert sessentachtentich oic lestleden, tgene
dat hier na volght, heeft voer de huere vander voerscreven
hoeven ende goede tot waerloes vanden voerscreven Pluyn lande
ende vanden voerscreven stuck lants, neven den buyten
Twaelff zusteren Rogge ende een halff goede ende custbare
Mechelscher maten, Ende oic vyf pond ende Sesse scellinge
groote Brabants gelts, Item voir tvoergenoemde veerdeken
gelike
ter beke, thien scellinge groete, Ende voer den voergenoemde
beempt over tvier vyf gouden Peters elken van dien
groeten
tot vier scellingen ende sesse penningen oic Brabants gelts
gerekent voertaen is in desen, tusschen de voerscreven partien, bevorweert
ende ondersproken ende hebben oic gelooft ende toegeseet gelyc
voer te voldoen ende te volbringen, dat de voerscreven Laureys
ende Lysbeth syn wyf tot haeren afscheyden zelen laten op
tvoerscreven goet alsulke vyfhondert hoepen Staes, als sy daer
op voirden ende aenveerdt hebben, Ende sy zelen oic de misse
weert laten drie pond groote Brabants ter capen vanden
ghenen, hen des verstaende, alsoe sy die oic byden ende
aenveert hebben, Ende oft die meesse Peter bevonden worden
dan de voerscreven drie pond groete ende dat daer op meer straet
gewassen ware, dan de voerscreven vyfhondert hope dat sal hem
de voere meester Hubrecht betalen ter goeden mans pryse ware
sy gheen stroot met noch af afbueren ende moegen. Item de voerscreven
Laureys ende syn wyf zelen tvoerscreven goet besayt laten ende gereest
alsoe zy aenveert hebben Te wetene vier buenderen custbaerlic gemest
ende twee buenderen scoppellegen selen sy moegen aenen op haeren pacht