Blader door transcripties » Stadsarchief Mechelen

archieftoegang 2, inventarisnummer 951, pagina 33

Beringen, Hulst. Aert van Couwenberge barbier, heeft vercocht
Meester Jan Hemelryck als executeur vanden testamente ende
vutersten wille van wylen heeren Matheeus Godevaerts diemen
heet Verlysbetten priester ende Canonick doen hy leefde vander
prochie kerken van Sinte Rommonts staende inde voerscreven stad van
Mechelen tot behoef van desselfs wylen heeren Matheeus
jaergetyde, dat hy begheert heeft ten eeuwigen dagen
gedaen ende gecelebreert te wordene inder prochie kerken
van Sinte Peters staende oic inde voerscreven stad, voer de vier
scellinge ende sesse penninge groote, Ende oic tot behoef van een
in vermeerderingen vanden Godeliken dienste vanden Eenen
getyden, diemen inder selver kerken van Sinte Peters doet
ende singhe, voer dandere vyf scellingen ende Sesse penningen
hy grooten Brabants gelts hierna bescreven, thien gelike
scellinge groote, opten Brabants gelts erffelix chys Te heffene
altyt opten jersten dach van Octobry Op ende aen des voerscreven
Aerts huys dat twee woeningen syn metten hove gronden
gelegen opte Veemarct byde Keyserstrate tusschen Henricx
Keldermans es huys aen deen zyde ende eenen ganck
toebehoerende, den selven Aerde Jorys Consaert ende Rommond
de Dryvere aen dander zyde. A Domino Mechliniensi, Waranderende. Op vier chysgulden
ende twaelff pond payments daer jaerlix voer vutgaende
Schalocum contracte Machie Peters et et uxore in strate
in principater eenen positus
III octobris
Vleming, Vos. Lambrecht de Weend ende Jorys Masman
van des vaders wegen, Ende Laureys de Dryvere ende Henrick
vander Meere vander moeder weghen, als momboeren ende inden
name van Kathelinen Reymaer wettighe dochter van Jan
Reymaer ende van wylen Kathelinen sBruynen synen wive onder
haere jaeren wesende, die hy in hen vervingen, hebben
Quytgesconden los vry ende ledich den voergescreve Jan Reymaer
weduere vander voerscreven wylen Kathelinen sBruynen van allen
den haeffeliken goeden die de voerscreven Kathelinen Reymaer
byder doot vander selver wylen Kathelinen sBruynen, haerer
moeder ende desselfs Jans Reymaer wyte, doen sy leefde
in eeniger manieren, gebleven ende verstorven syn, ende alle
andere daer qutancie, Ende oic vander sommen van
sessendertich ponden grooten Brabants gelts die de voergescreven
Jan Reymaer der voerscreven Kathelinen synder dochter vut
zaken vanden afcoope, de voerscreven haeffelike goeden
sculdich ende tachter was ende alle andere dies quitancie
behoeven
VII octobris
Beringen, Kerman. Mathys Peters ende Lysbeth vander Strate
syn wyf, Seggende dat sy gheen wettige kynderen en hadden
Ende hebben daerom gewilt ende openbaerlic voer ons
geordineert, dat de langhstlevende van hen beyden, soe
lange die alsdan leven sal paysselic ende vredelic sal gebruyken
alle der haeffeliker ende erffeliker goeden bynnen der
stad ende vryheyt van Mechelen, wesende ende gelegen
die sy nu tertyt hebben ende hier namaels oic hebben
ende vercrigen zelen, Ende metten selven haeffeliken
goeden in synder noot moegen disponeren ende
ordineren, den wederseggen van yemande ende oic
den rechten ende coustumen daeraf ten coren
onderhouden niet tegenstaende. Behoudelic dien
dat alle de voergenoemde goeden, na des langhstlevende
doot vanden voerscreven Mathys ende Lysbetten synen wive
blivende, toecomen ende versterven zelen haeren
gerechten erfgenamen, dien die goeden, na der recht
vander voerscreven stad, sculdich zelen syn toe te comene
ende te verstervene, oft den ghenen, dien sy deselve
goeden samentlic met testamenten oft anderssins
geven ende maken zelen, welke ondrancie wy ende
oic Steynemoelen Voesdonck, Dyest, Vleming, Hulst
ende vor onse medescepenen, by crachte vanden statute
tanderen tyden daer op gemaect, geconfirmeert ende
geapprobeert hebben ende by onser ordinaerder macht
confirmeren ende approberen, alle argelist vutgescheyden
V octobry tempore simile
Vlemings, Vos. Margriete vander Heyden, wettige dochter van
Marten vander Heyden ende wedue van wylen Jacopen van Mechelen
aen deen zyde, ende Jan van Mechelen, desselfs wylen Jacops
broeder, aen dander zyde, hebben openbaerlic voer ons vut
haeren vryen wille bekent, dat sy underlinge, alle de haeffelike
ende erffelike goeden metst:t; bynnen ende buyten der voerscreven stad ende
vryheyt van Mechelen, wesende ende gelegen, die by na des voerscreven
wylen Jacops doot gebleven ende den voergenoemde Janne van Mechelen
by desselfs syns broeder doot verstorven syn mynliken ende
vriendeliken gescheyden ende gedeylt hebben inder vuegen ende
manieren hier na volgende ende verclaert, alsoe dat by crachte vander
voerscreven die deylingen ende scheydingen, de voergenoemde Margriete vander Heyden
de wedue voer haer deel ende part der voergenoemde goeden hebben
houden ende tot haerweerts nemen sal, om alle de voergenoemde haeffelike
goeden, tot wat steden ende plaetsen die bevonden zelen worden
gebleven, naer des voerscreven wylen Jacops haers mans doot, om
daermede te doen haeren vryen wille ende na haerer gelieften
te disponeren, Op alsulken last ende condicie dat sy sculdich sal
syn te gelden ende alleene te betalen, alle de sculden, die sy ende
haer voerscreven man, ten tyde, dat hy sterf sculdich ende tachter
waren, Ende oic de costen van desselfs haers man vutvaert
ende oic alle de legaten ende makingen byden selven haeren man
met synen testamente gemaect ende gelaten, sonder eenich wederseggen