Blader door transcripties » Stadsarchief Mechelen

archieftoegang 2, inventarisnummer 951, pagina 10

haerer vutvaert ende boven haeren legaten ende makingen
in eenigher manieren, overschieten ende bliven zelen, den
weders selven haerer zusteren ende haer oic den voerscreven Janne
haeren broeder, haere gerechte ende eenige erfgenamen
inde voerscreven haere goeden inde voerscreven Marien, noemende
ende instituerende, den wederseggen vanden selven Janne
haeren broeder, Ende oic den rechten ende coustumen vander
voerscreven stad, daeraf ter contrarien onderhouden, met
tegenstaende
XXVI aprilis tempore simile
Meester Claes van Bacht
Langhe, Cale. Peter de Muntere diemen heet de Scaelgedeckere
heeft openbaerlic bekent, dat hy tegen Meesteren Claes van Brecht
Raid ende ierste meester vander Rekencameren ons genadigen heeren des
Roemen Conincx in Brabant behuert heeft syn huys metten
hove daer een ponteyne instaet, geheeten den Pauw gelegen
over de Nieuwbrugge opten hoeck van Onser Vrouwen straten
den termyn van Sesse jaren langh geduerende ende deen na dander
ter stont volgende, die inne gaen ende begynen zelen tot Sinte
Jansmisse Baptisten, nu naestcomende ende van dan voertaen zelen
gedueren den voerscreven tyt ende termyn van sesse jaeren, ende vut zeke
van deser hueringen heeft de voergenoemde. Behoudelic dien, dat
eenyegelic van hen beyden sal moegen op dat hy wille van dien
hueringen scheyden, ten eynde vanden voerscreven drie jersten jaeren
ende dat sal elck van hen den anderen sculdich syn te segghen ende
te kendigen, Een half jaer tyt te voeren, Ende vuyt zaken van
deser hueringen, heeft de voerscreven Peter de Muntere, gelooft te geven
ende te betalen, Marten de Pe preveners, tot des voerscreven
Meester Claes syns heeren ende Meesters behoef, oft den brenger van
desen alle jaere, duerende de voerscreven sesse jaeren tyt elc
Te wetene als jaer van dien, altyt tot twee termynen, Te
wetene, deen helft daeraf tot Kersmisse ende dander helft tot
Sinte Jansmisse Baptisten drie ponden grooten Vlaems gelts daer
af den jersten termyn van betalingen syn sal, tot Kersmisse oic
naestcomende, des es in desen bevorweert ende tusschen den
voerscreven meesteren Claes ende Peteren ondersproken, dat deselve
Meester Claes ende de syne, tot henweerts behouden zelen de cammere
staende boven de Coekene vanden voerscreven huyse om daer vut ende
in tegaen ende te comen, alsoe dicke als hen dat gelieven sal, Een
dat oic de voergenoemde Meester Claes ende de syne, hebben zelen, de
alle jaere, de helft vanden Peren wassende, op eenen groeten
boom inden voerscreven hofstaende, Item dat de voerscreven Peter int
afscheyden vanden voerscreven huyse, laten sal, den voerscreven hof begrave
ende beyaert ende den Wyngaert daer inne staende, met nieuwen
staken ende latten, beset ende gevonden, alsoe dien nu ter tyt it
al sonder mindernisse vanden voerscreven drie ponden groeten ende oic
soe Ende dat deselve Peter, alle jaere, den voerscreven duerende
sculdich sal syn, binnen de voerscreven huyse tontfangen ^ alsulken
men maten
Coren carme oft ander gaen, als den voerscreven meesteren Claes
oft de seven gelieven sal daer te sundere tot houden veertelen
te Mechelscher maten ende niet meer, Ende dat weder hem ende
den man, tot haerer begeerten metter maten leveren, Op alsulken
lange, als andere van gelyken plegen te geven, sonder eenich wederseggen
XXVIII aprilis tempore simile
Herten van Lancx
pra
Lange, Vos. Dierick Eynaert, wettich soon van wylen Jacoppen
Eynaert, heeft vercocht heeren Marten van Lanchem priester
Eenen gouden Rynsgulden Te wetene veertich groten Vlaems gelts
voir dien gerekent erffelix chys Te heffene altyt opten jersten
dach van Meye, Op ende aen des voerscreven Diericx, helft van eenen
huyse metten hove ende houdende int geheel omtrent een
vierendeel, gelegen tot Heffene ten Nuffle, tusschen des voerscreven
heeren Martens erve aen deen zyde ende der kynderen erve van
wylen Jan van Baesrode, aen dander zyde, op eenen halven chysguldenst:t;
vuten selven geheelen huyse metten hove jaerlix voer vutgaende
Item opte op des voerscreven Dierix helft van eenen stuck lants
metten gronde etcetera houdende int geheel omtrent een vierendeel
gelegen aldaer, tusschen Jan Bruekens erve aen deen zyde ende Aert
vanden Bossche erve aen dander zyde, op eenen halven chysgulden
vuten voerscreven huys met geheelen huyse metten hove ende vuter
selven geheelen stuck lants jaerlix voer vutgaende, Item
op des voergenoemde Dierix helft van eenen bloke metten gronde etcetera
houdende int geheel thien hond lants, gelegen oic aldaer, tusschen
Jans de Cale erve aen deen zyde ende des Heeren strate aen dander
oft block
zyde. Item op desselfs Dierix helft van eenen stuck lants metten
gronde houdende int geheel een halff buender geheeten dBlock
aen tvelt, gelegen aldaer, tusschen der kynderen erve van wylen
Henricke van Merchteren, aen deen zyde ende de voerscreven Jan de
Cale erve aen dander zyde. Item op des voerscreven Diericx helft van
Eenen stuck lants metten gronde etcetera int geheel een half buender
houdende, gelegen aldaer, op Hofacker, tusschen Jan Boxthuyns
erve aen deen zyde ende Willems Putteman erve aen dander
zyde, Item op desselfs Dierix helft van Eenen stuck lants metten
gronde oic int geheel en Seven houde, houdende gelegen
aldaer opten Couter, tusschen Anthoenis de Borgere erve aen
deen zyde ende Jan de Bruyne erve aen dander zyde, Item op des
voirgenoemde dien helft van eenen beemde metten gronde etcetera houdende
int geheel, Sesse hond lants, gelegen aldaer op Hoedonck inde
Elst tusschen des voerscreven Jans de Cale erve aen deen zyde ende der
weduen ende kynderen erve van wylen Jan Herregot aen dander zyde
Ende op desselfs Diericx helft van eenen stuck beempts metten
gronde, in zynst:t; geheel een half buender houdende, gelegen oic
aen aldaer inde voerscreven Elst, tusschen des voerscreven heer Martens
erve aen deen zyde ende Meester Jans vander Straten erve aen
dander zyde, Op vier scellinge Loevens ende eenen veertelen
Rogs ende een halve Mechelscher maten vut allen den voerscreven
geheeten goeden jaerlix gaende, van allen welken goeden
dander helft toebehoert Janne Eyvaert des voerscreven Diericx
broeder. A Domino Mechliniensi, Waranderende etcetera.
III may tempore simile
Vlemings, al
Berthem Blocx
Langhe, Borch. Heer Henrick Tucbake priester, heeft vercocht Dorotheen
Blocx, Een huys metter plaetsen gronde etcetera dat wylen Kathelinen Vleming
toe plach te hoeren ende dat daer naer toehoerde, Henricken Scaerlaken, gelegen
opt kerchof vander prochie kerken van Sinte Peters bynnen Mechelen, tusschen
der weduen ende kynderen erve van wylen Jan vanden Weerde, aen deen zyde ende
ende de chuyse aldaer aen dander zyde streckende achterweerts metten
eenen eynde tot Andries Mylemans erve, A Domicella Johanna vander
Aa, Waranderende. Op twintich scellinge paymente daer jaerlix vutgaende
Assignavit L Peters
II may tempore simile