Blader door transcripties » Stadsarchief Mechelen

archieftoegang 2, inventarisnummer 952, pagina 88

Joes van Merende
Geylen Peter
de voerscreven Margriete van Merende de weduwe heeft
gewillecuert ende geconsenteert dat Joes van Merenden
haer brueder jaerlycx heffen ende gebruyken sal alsoe
lange als zy beyde tsamen leven selen, de helft van alsulken
thien Rynsgulden, jaerliker lyfpensien als zy beyde ende de
lancxtlevende van hen beyden, hebben op zeker goeden die toe
te behoeren plaghen wylen Henrick Boom ende die nu toebehoeren Janne
Spierinck, in welke rente de voirscreven weduwe haer voirheffen
heeft, gelyc de brieve daer op gemaect ende gepasseert
dat claerlyck vutwysen ende begrepen, Behoudelick dat de
lantghevende van hen beyden, die rente syne leefdach
lanck heffen ende gebruyken sal sonder eenich wederseggen
Ultima may tempore simile
van Goubergen
de momboeren, die kynderen
Item. Jan ende Gielis van Goubergen, wettige kynderen van
Jan van Goubergen, hebben openbairlic voir ons bekent dat Jan
Nuwelaet Gregoris de Roevere ende Henrick vanden Broeke haer
momboeren, henlieden goede ende rechtverdige rekeninge ende bewys
gedaen hebben, van allen den haeffeliken ende erffeliken goeden
bynnen ende buyten der stad ende vryheit van Mechelen wesende
ende gelegen, die den voirgenoemde kynderen byder doot van wylen
moeder
Kathelinen Paridaens haerlieder in eeniger manieren gebleven ende
verstorven zyn, Ende dairaf ende oic van alle der moeyten
quellingen ende heysschen, die zy den voerscreven momboeren, vut
zaken van dien, oft vanden ontfange ende vutte vutgevene
dat zy dairaff gehadt hebben, soude moegen doen, hebben
de selve kynderen van Goubergen, Quytgesconden los vry ende
ledich, den voirscreven momboeren tot haeren ende wylen Henricx
Vernaven haers medemomboeren behoef ende alle andere dies
quitancie behoeven geheelic ende al
V may tempore simile
Jan Verwilgiaerden
Geylinck, Stocman. Jan de Wechtere wylen Gheerds sone heeft vercocht
Janne Verwilgiaerden, drie gouden Andries gulden, elken van
dien tot veertich groten Vlaems gelts gerekent erffelix chys Te
heffene altyt tot Sint Kersmisse ende Sinte Jansmisse, dair
af den jersten termyn van betalingen zyn tot Kersmisse naestcomende
Op ende aen des voerscreven Jans de Wechter huys metten hove
plaetsen vetteryen gronde etcetera gelegen inden Ouden Bruel byden
Vettersham, tusschen Jan Muyls erve, aen deen zyde ende
Henrix van Erps erve aen dander zyde. A Domino Mechliniensi. Ende
Op syn werchuys oft planckier met synen toebehoerten, tegen tvoerscreven
huys over gelegen. A Domino Mechliniensi, Waranderende. Op vier chysgulden
ende eenen halven, ende twee cleyne Zwerte Turnoyse, daervoir vutgaende
met alsulker condicien dat de voerscreven Jan den Wechter sal moegen
lossen ende quiten altyt als hem dat gelieven sal, de voirgenoemde
drie gouden Andries gulden des voerscreven chys, ende elken gulden
dairaff met veerthien geliker gulden eens in alsulken penningen
als ter tyt cours ende hebben inder stad van Mechelen met vollen
chyse daervoir te betalen
Ultima may tempore simile
de kynderen Rommonds
Lyedekens
Lange, Vos, Zoeten. Rommond Lyedekens ende Barble Caluwaerts zyn wyf, hebben
we openbairlic voir ons wederroepen ende te nieuwte gedaen alsulken wille
ordinancie ende begeert als zy tanderen tyden, te wetene opten dertichsten
dach van julio int jaer dusent vierhondert sevenentachtentich lestleden
voir scepene van Mechelen gemaect ende geordineert hebben, als dat alle
haere kynderen die zy doen den vanden anderen vercregen hadden ende namaels
oic deen vanden anderen oic vercrigen souden, Evengelyc ende in geliken
deele, hebben ende deylen souden alle haer haeffelike goeden, die
naer haer beyder doot souden bliven, op alsulken condicien dat zy alsdan
alle des voerscreven Rommonts voirkinderen van dien goeden geven souden, vier
pondt grote Brabants gelts et eens ende dair mede vut bliven, gelyc dat
inden voerscreven scepenen brieve dair op gemaect, claerliker begrepen staet
oic hebben zy wederroepen ende te nieuwte gedaen alsulken scult van
hondert Rynsgulden als zy tanderen tyden, Anthoenisen ende Barblen
Lyedekens haeren kynderen voir scepene van Mechelen bekent hebben naer
haerlieder doot te betalen, met willende dat haeren voerscreven wille
ordinancie ende begheerte oft oic bekennen vande voerscreven scult sortere
eenich affert oft oic van eeniger weerden zy, maer wouden ende
vuterlic begeerden, dat eenyegelic van des voerscreven Rommonts voirkinderen
ende oic haer beyder naerkinderen naer haer beyder doot succederen souden
in alle haer haeffelike goeden, die boven haer wettige sculden costen van
haeren vutvaerden ende boven haer legaten ende makingen naer haer beyder doot
bliven ende overschieten zelen, alsoe dat naer den rechte vander voerscreven
stad behoeren sal, ende sculdich es te geschedene, den wederseggen
van iemande niet tegenstaende
Ultima