Blader door transcripties » Stadsarchief Mechelen

archieftoegang 2, inventarisnummer 936, pagina 12

Lysbeth Spruyte ende
Laurette Bake alias Staes
Mol, Bossche. Peter Woutere heeft vercocht Lysbetten Spruyte
wedue wylen Augustyn Bake alias Staes tot haren live ende
tot behoef ende ten live van Lauretten Bake diemen heet
Staes haerer dochter, twee gouden Rynsgulden Goede 
te wetene XL groten Vlaems gelts voir elken der selver Ryns
gulden gerekent lyfpensien, Te heffene deen helft daer
af opten XXsten dach van Meye ende dander helft opte
XXsten dach van novembry Op syn huys metter plaetse
gronde geheeten tSweert gelegen op Neckerspoele opten
hoeck vander Scheffortstraeten, tusschen de selve strate aen
deen zyde ende Augustyn Beremans erve aen dander zyde
Ende op syn huys metten gronde gelegen aldair tegen
over tusschen des voirscreven Augustyns erve ende een drincsel
aldair. A Domino Mechliniensi, Waranderende. Opte weerde van twaelff scellinge
grote Brabants gelts daer voir vutgaende domina Elizabeth
levabit et inde disponet
XXa novembry tempore simile
Item de voirscreven Lysbeth heeft geconsenteert ende gewillekuert den
voirscreven Peteren dat hy altyt als hem dat gelieven sal de voirscreven
twee gulden sal mogen quyten te wetene met twintich geliker
gulden ende met vollen chyse daer voir te betalene, presentibus et
testibus, Johannes de Diepenbeke et Arnoldus Cleynaerts
Jan Masman
Meester Henric de Moor wylen Jans sone, heeft opgedragen
tot behoef van Janne Masman van Duffle, Een huys
metten hove gronde geheeten den Witten Hert ende met
een stuck lants daer aen liggende houdende tsamen drie
vierendeel, gelegen te Muysene inde Plaetse tusschen
Jan Boudene erve ende des goidshuys van Gruenendale
erve aen dander zyde, op een veertele Rogs twee
capuyne ende twee oude grote daer vutgaende, ende voirtaen
alle dander syne erffelike ende onberuerlike goeden die
hy bynnen de prochien van Muysene liggende heeft ende
hem in eeniger manieren toebehoiren. A Domino Mechliniensi, Ende noch
een huys metten hove gronde etcetera gelegen inde Zeelstrate
priester
tusschen heer Janne vander Moelen erve    aen deen zyde ende Jorys
Rommond de Bruyne erve aen dander zyde, opte weerde van
de drie Peters vander Muntere ende acht scellinge Lovens
erffelic ende zesse mottoene lyftochten daer vutgaende. A Magistro
Egidio de Muysene, Waranderende. Rommond vanden Hove tot
des voirscreven Jan Masmans behoef sunt adheridatus
Ut supra
de wedue van wylen
Jacop de Grote
Mol, Diest. Aerdt de Groote, Jan Laureys ende Katheline Boydens
soe wedue wylen Henricx de Vos inden name van Aerde
van Herent wylen Henricx sone infra annos etcetera die zy in
hen vervingen, hebben quytgeschonden los vry ende ledich Katheline
Bellens weduen wylen Jacops de Groote, van allen den haeffelike
goeden die den voirscreven Aerd byder doot vanden voirscreven wilen
Jacoppe de Grote synen ouder vader in eeniger manieren
verstorven mogen syn, Ende daer toe soe hebben de voirscreven
quytscilderen gelooft, de voirscreven wedue dat zy den voirscreven
Aerde van Herent alsulke ende in dien hebben zelen
soe wanneer hy tot synen jaeren van discrecien gecomen
sal syn dat hy alsdan approberen ende van weerden houden
sal de voirscreven quitancie ende al tgene daerinne begrepen
Ende dat hy de voirscreven weduen daer af nemmermeer
aenspreken oft quellen en sal in gheender manieren, ende
om der meerder zekerheit wille der selver weduen
daeraf te doen soe hebben de voirscreven quytscildere verbonden
alle huere haeffelike goeden presenta et futura.
XX novembris
de wedue van wylen
Peter Bollene
Item. Jacop tSmertens beckere ende Rommond van Beningnen
alle proviseuren ende inder name vander fabriken vander kercke
van Neckerspoele, hebben quytgeschonden los vry ende ledich
Lysbetten Knaepte weduwe wylen Peter Bollens van allen den
haeffeliken goeden die de voirscreven wylen Peter de selver weduwe
man doen hy leefde, der voirscreven fabriken in puerder aelmoessenen
liggen by sinen testamente gemaect ende gelaten heeft ende alle
andere dies quitancie behoeven geheelic ende al ut supra tempore simile
Item het es in desen ondersproken hoe wel de selve quitancie
 begrepen heeft vanden geheelen haeffelike goeden inden vorscreven testamente
begrepen, dat nochtans de selve fabrike behoudt haer actie
in alsulken scult als Jan Bollens der voirscreven wylen Peteren synen
brueder sculdich es, naer vutwysen eene scepenen brief daer
op gemaect
Anthonis van Beveren
Mol, Bossche. Macharys van Outersgate heeft vercocht Anthoenisse
van Beveren Seven Rynsgulden ende acht gouden Ryns
gulden goede etcetera te wetene XL groten Vlaems gelts voir
elken der selver Rynsgulden gerekent erffelic chys Te
heffene altyt tot Kersmisse daer af den yersten termyn van
betalingen syn sal van Kersmisse naestcomende over een
ut supra