Blader door transcripties » Lokale Kronieken uit de Nederlanden 1500-1850

archieftoegang 1499_Rott_Jans, pagina 78

64
[f. 272v] Vans onsen heere Maximiliaen, hertooch van Oostenrijc ende van Bourgoengen47.
Item. Int jaer zeven ende tseventich, als hartooch Karel doot was, screef den keyser brieven neder an den steden, want tot Rotterdam oick een quam mit skeysers segel besegelt, dat men die stede bewaeren soude tot sijn zoon Maximiliaens behoef, gemarct dattet bij hilicxe tractate hem toebehoerde als een voget van hertoge Karels dochter, die hem tot eenen wijve versekert was bij hartooch Karels levenden lijve48. Ende tes waer dat sijn zoon Maximiliaen onsen prince nederquam ende trouwede hartooch Karels dochter tot Ghend te half oeste [15 aug.] int jaer [M IIIIC] zeven ende tseventich49. Ende quam in Zeelant, eerst tot Middelburch, daer wart hij gehult ende die van der Goes hulden upten dijck voer der Goes, ende quam tZericxee, daer wart hij mede gehult up die tijt, ende quam vandaer Tordrecht, daer wart hij gehult50, ende van Dordrecht quam hij tot Rotterdamt ende was donredaechs na Paesschen [26 maart] anno [M IIIIC] LXXVIII ende voer vandaer in den Hage ongehult, ende van den Hage voer hij te Haerlem, tScepelenberch51, tAlcmaer, tAemsterdam, vandaer te Leyden, van Leyden tot Delft ende van Delft tot Rotterdam. Daer wart hij gehult upten XIIIIen dach van aprille anno LXXVIII ende hij voer vandaer tSinte Geertenberge, daer wart hij doen mede gehult.