Blader door transcripties » Lokale Kronieken uit de Nederlanden 1500-1850

archieftoegang 1499_Rott_Jans, pagina 73

60 Ende doen wart oick negen jaer lang bestant gemaect tuschen den coninc van Vranckerijc ende mijnen genadighen heere14. Ende doen den coninc van Ingelant over was doen was dat hilic datter gemaict was, also men seide, als niet want het en aftervolchde niet15. Van hartooch Karels doot. Item. Als dit all gedaen was doen toech hartooch Karel van Bourgoengen upte Zwitsen mit groten volke, daer hij oeck bij een jaer lach16. Maer luttel voerspoets hadde hij daer, want sij hem dicwijl versochten ende slogen hem veel volcx off, ende wonnen hem oick eens sijn parc off daer sij veel heeren ende ander luyden verslogen. Ende namen mijns heeren costelicke juweelen van goude, silvere, gesteenten ende cleederen. Ende mitten cortsten te besluyten, zij bestreden in den winter, daer hij int velt lach voir Nansy17. Ende daer wart hartooch Karel van sijnen paerde gereden alsoe sij hem bestreden, ende wart aldaer verslegen in den velde, God wil sijn ziel genadich sijn. Ende dit gesciede upten heiligen Drieconingenavonde [5 jan.], ende was up eenen sondach int jaer [M IIIIC] seven ende tseventich; daer veel groeter heeren mede doot bleven, den grave van Nassou18 gevangen, [f. 271v] den bastert van Bourgoengen19 gevangen, ende luttel andere te lijve bleven dan een capitein uut Lomberdie mit sijnen volke, die ontreet ende vloet van mijn heere ende men wil seggen dat hij mijn heere verriet ende hem keerde tiegens mijn heere