Blader door transcripties » Lokale Kronieken uit de Nederlanden 1500-1850

archieftoegang 1499_Rott_Jans, pagina 40

was. Ende dit gesciedde in augusto int jaer [M IIIIC] LXVI. Ende daer worden veel volcx gehangen ende in de Mase geworpen37.
Itemb. Hier staet in, tjaer dat Dinant verloren was:
Sanctus David irascimini et nolite peccarec.
Van een vrouwe die twee cramen lach van kinde.
Item. Int jaer M IIIICXLIII was ter Goude een vrouwe ende hiet Claer, Jan Smeerszoons wijf, ende woende an de Visbrugge ende genas van eenen kinde ende lach hoir craem uut als dat behoert. Ende doen zij ter kercke gegaen was van dien kinde, doen kreech zij noch een kint ende lach noch een craem uut. Ende dit quam aldus toe: Eerst bij der gracien Goids; ten anderen male: daer viel een kint in de Goude ende zij droech twee kinderen in hoeren lichaem, ende mit dat zij tottet kint liep datter int water gevallen was, zo verscrickede sij daeroff ende messchide van dat een kint, ende hadde sijn kerstendom; aldus brach sij tander kint na den eersten craem. Ende dit wijf mochte al te wel wijn38.
[f. 262v] Van den starfdach hartooch Philippus van Bourgoengen.
Item. Upten XVen dach van junio anno [M] IIIICLXVII doen starf mijn heere van Bourgoengen hartoge Philippus, mijns heren vader van Cairloes, te Brugge omtrent tuschen negen ende X uren savonts39. Ende binnen dienselven somere vergaderden die van Ludic veel volcx ende setteden hem weder jegens mijnen genadigen heere, den jongen prinse, hoewel dat sij in gena gegaen waren ende een guede zoene gemaickt was ende groete somme van gelde mijnen genadigen heeren gelooft hadden, daervoer dat sij guede heeren uut Ludic in handen van mijnen genadigen heere geset hadden, die als gevangen mannen tot ses off achte toe bij hem waren. Nochtans en hilden zijs een noch geen40. Ende quamen
35