Blader door transcripties » Lokale Kronieken uit de Nederlanden 1500-1850

archieftoegang 1499_Rott_Jans, pagina 35

31


Item. Het is gebuert dat mijnen genadigen heere Karel van Bourgoengen reysde van Hesdijn mit veel gewapende ende reysde tAtrecht om aldaer sijn volc te vergaderen, daer hij te velde mede slaen soude jegens den coninck van Vranckerijc, daer hartooch Adolf, de jonge heere van Gelre, mede was. Ende als hij daer alsoe seker dagen bij mijnen genadigen heere gelegen hadde soe stal hij hemselven vandaen heimelic mit een knecht, ende liet sijn ander gesin daer bliven, gaende bij der straten, dat men daerup niet ramen en soude dat hij wech waere. Ende als hij reysde zoe nam hij sinen wech na Namen toe, ende quam binnen der stad van Namen mit een knecht, verstopt, ende en woude niet bekent wesen, ende hadde gaerne over tveer van der Mase geset geweest van den veerman. Ende het was verboden dat die veerman nyement overvoeren en soude ten waere bij consent van den baeliu van der stad, ende alssen den baeliu sach hij en kende hem niet, maer hij nam hartooch Adolf van Gelre gevangen als een onbekent man, omdat hij verstopt was. Ende als hij boven upte vangenisse gaen soude, zoe openbaerde hij eerst dat hij hartooch Adolf was, ende doen leyde hem den baeliu in sijn selfs huys in een camer, ende sende terstont tot mijnen genadigen heere van Bourgoengen wat hij mit hem gedaen woude hebben, ende mijn heere liet hem weten dat hij hem vast ende wel bewaeren soude. Ende dit gesciedde in februario int jaer [M IIIIC] LXXI. Ende mijn heere van Bourgoengen deden vandaer halen int begin van maert int selve jaer van LXXI ende deden voeren upt slot tot Vilvoorde bij Bruessel, ende deden wel bewaren. Vandaer wart hij gevoert tot Cortrijck24. Dair lach hij totdat hartoch Karel verslegen was, doen quam hij uut tot Gend tot hartooch Karels dochter, vrouwe van Bourgoengen.

Itemz. Hartooch Arent van Gelre starf te Grave haestelic, een dach off twee voer off na sinte Pietersdach in sille [22 febr.] int jaer [M IIIIC] LXXIII25.