Blader door transcripties » Lokale Kronieken uit de Nederlanden 1500-1850

archieftoegang 1499_Rott_Jans, pagina 28

Int jaer dusent IIIIC ende drie sdaechs na sinte Jorisdach [24 april] brandet tot Rotterdam van den gasthuysse totten Westnyeulant.
Item. Doe men screef dusent IIIICXXXI up sinte Margrietendach [12 juli] brandet tot Rotterdam van der Kercstraet westwaerts up, ende oick tWestnyeulant95.

[f. 259v] Van den onweder dat was up sinte Matheeusdach [21 sept.]96

Int jaer M IIIICLXIIII up sinte Matheeusdach in september was zo groeten wint ende onweder dat voer Aremuyde ende upt vlac bij Aremuyden ommewoeyen ende verdorven wel XVI off XVII grooter scepen mit voercasteelen ende mit veel volcx. Item voir dat gorretgen van Driedoren jegens Steenbergen verdorven seven coggescepen mit all dat volc datter in was sonder twee mannen, daer deen off was van Steenbergen ende die behilt sijn lijf up een mast, daer dreef hij up eenen nacht ende eenen dach ende hij wart gevischt binnen der Glede in Zuuthollant. In Dordrecht voir die stad verderf eenen groeten hulc ende een groete baerdse mit een voercasteel, ende veel wintmolen woeyen all omme upte aerde neder.

Item. Veel kercken woeyen terneder. Item. Veel boemen uter aerde. Item. Veel scoorsteenen ende gevelen terneder. Ende die vischers in der zee en lieten nye drivers in der zee om harinc te vangen, zo goeden weder wast in de zee, maer corts daerna in deselve teelt hadden zij so groeten onweder in der zee als men ye gesien hadde. Want vele benaerden tsinte Jacobs ende andersins doen gelooft worden97.

Vanu den reliquieen ende van den strijt te Monsherry.

Item. Up sinte Martijnsdach translacio [4 juli] anno dusent IIIICLXV doen gaf Pouwels Pouwelsz. tot Delft98 ende brueder Willem Arent99 den kerck-