Blader door transcripties » Lokale Kronieken uit de Nederlanden 1500-1850

archieftoegang 1558_Bosc_Cupe, pagina 2

Mer op dat niemant en wane dat die compositoer deser cronycken, om die stat synre geborten te eeren, naer synder belieften yet meer daer in geset heeft dan die gerechte waerheyt, soo gheeft die compositoor te kennen, dat hy niet vanden synen daer in geset en heeft, maer heeft dese chronycke getrocken wt veel andere authentycke boecken, te weten: wtten chronycke van Brabant, wtten chronycke vanden eerweerdigen heere Rigino, abt van Pruymen, wtten chronycke gemaeckt by den ouden meester Peeter van Oss, secretaris menich iaer vanden Bosch, wtten schriften oft chronycke vanden eerweerdigen priester en. borger vander stadt , meester Willem Mool, wtten chronycke gecompuleert van meester Adriaen die Ruyter, die welcke menich iaer inden huze vanden heylighe Geest als....... gedient heeft.
Godt, die Heere, wille die vrome borgers en. die gemeynte in gelucksaliger prosperiteyt, voorspoet en. welvaert genadelike gespaeren en behouden .
Inden eersten wordt beschreven die ghelegentheyt en. condicien deser stadt van Tsertoghenbosch.
Tsertoghenbosch is een stede gelegen int bisdom van Luyck ende is een vandie vier hootsteden van Brabant, toebehoorende als een eighen patrimonium den hertoghe van Brabant, sonder eenighe overheere daerinne te kennen of te leene van iemant te ontfanghen, ende is een stede seer vast ende stercke, driecantich inder forme ende utermate ryck ende machtich van volcke, hooch van mueren tegen eenen onversienlyck ende subitelyck aenstoot van vianden, hebbende thorens ende diepe graften, wel voersien ende beschermt mit alderley instrumenten van attelrye bolwercken mit stercke fortressen ende borstweren voor die poorten, met schoone slach- of valbrugghen .
Indese stede syn schoone lustige kercken oft cappellen mit een sonderlinge schoone ende costelycke kerck in die eere van sint Jan, apostel en. evangeliste, daer in gefundeert is een canonnizye van xxx werlike canoniken: in welcke kercke alsoo schoonen dinst gedaen werd dagelix als in eenige stede oft plaetse toebehoorende ons prinche vanden landen.
Hier volgen die naemen van die andere cappellen, die in de stadt vanden Bosch staende syn:
Sint Iacops capelle.
Sinte Peeters capelle.