Blader door transcripties » Lokale Kronieken uit de Nederlanden 1500-1850

archieftoegang 1558_Bosc_Cupe, pagina 18

In dese tyden wert eerst begrepen dat clooster vanden Bogaerden in die Verwers straet, dat doen noch al buten die stat was, ende het waren al leecke brueders en. zy wonnen die cost mit weven en. trapenieren ; sy hadden eenen weerlycke priester tot eenen cappellaen,die haer misse dede en. precte en. haer sacramenten gaff, ende sy stonden onder den prochiaen van Orten, dat doen die moyer kerck was vander stat vanden Bosch.
Inden iaere ons Heeren dusent hondert en. xcvj heeft die keiser Henricus, die seste van dien naem, gegonnen en. gegeven ter begeerten van hartoch Henrick van Brabant, den borgers en. ingeseten der stat vanden Bosch, dat sy tol vry syn en. ombeschadicht reisen mogen mit haer goet en. comenscap lancx den Ryn waer sy willen.
Inden iaere ons Heeren dusent cc en. een werden eerst van hartoch Henrick van Brabant geset seven schepenen, om een ygelyck recht te doen.
Inden iaere ons Heeren dusent cc en. drie geviel grooten twist tussen hertoch van Brabant en. grave Dirick van Hollant, om een stuck landts gelegen tussen die Mase en. die Scheld: mer die sake wert op genomen van groote heeren van beyde partyen, ende daer werd een accordt gemaect, dat die grave van Hollant quam in Brabant tot Loven en. gaf over in handen vanden hartoge die stat van Dordrecht mit den Dortse wert en. mit den lant van Strien, item Dussen en. Waelwyck; ende die grave van Hollant ontfinck die selve landen voorsz. vanden hartoghe van Brabant te leene en. werdt des hartogen leenman en. vassael. Daer nae int iaer ons Heeren dusent cc en. xviij hebben die grave van Hollant en. van Geldre belegen die stat van Utrecht. Dit belech aldus duerende, daer nae wert die grave van Geldre verradelyck gevangen vanden hartoge van Brabant, doen hy totten Roomsce coninck Otto op een vastegeleide reisen soude. Dirick, die grave van Hollant, dit hoorende , brack op van synen belegge van Utrecht en. stack allen zyn macht te samen van veel wapentuers en. quam daer mede voor Tsertogenbosch, daer hy mit geweldiger hant in quam op den sesten dach van September, en. ving aldaer ten eersten die heere van Parwys en. Henrick van Cuyck, des hartogen van Brabants bruederen, mit sommige ridderen en. knechten, en. meynden mit die gevangenen vanden Bosch in Hollant te trecken. Die hartoge van Brabant werts gewaer en. versaemde haestelyck van syn volck, en. hadde in syn hulpe den busscop van Colen en. van Luyck, den hartoghe van Limborch en. den grave van Vlaenderen; ende midts desen is die hartoge van Brabant den grave van Hollant gevolcht, om hem syn gevangenen weder te nemen; ende als grave Dirick dit vernam, dede hy van grootmoedicheyt syn baniere ontwynden en. vertuefden hen in een dorp by Huesden, dat Authuesden heit, en. settede hen daer ter weer; mer int eynde als hen die hertoge te sterke van volcke was, wert hy daer gevangen. Niet lang hier nae is die pays gemaect tussen hertoch Henrick van Brabant en. grave Dirick van Hollant, en. die grave gaff den hartoge en. die stat vanden Bosch voor die schade, die hi hen gedaen hadde, twee dusent merck silvers, ende mit dit geldt dede die hartoghe de stat vanden Bosch seer verbeteren ende dede een schoon poorte timmeren, dat nu die Vuchteren poort genaemt is, ende tot een eewighe memorie soo weert die poorte dicwils genuemt die Pickepoort, want sy getimmert is totte schande van die Hollanders, diemen nuemt Pickaerts, om haer groote gulsicheyt wille.
Die grave van Gelre Otto sat noch gevangen te Brussel en. mids compositie en. dading mit hartoch Henrick van Brabant soude hy wt die gevankenis comen, soo heeft hy onder alle andere articulen moeten consenteeren voor hem en. syn nacomeling, dat die vanden Bosch tol vry souden zyn en. ombeschadicht soude mogen reisen mit hare goeden en. comenscap alle dat lant van Gelre dore.