Blader door transcripties » Lokale Kronieken uit de Nederlanden 1500-1850

archieftoegang 1507_Beek_Trec, pagina 17

In den selfden jaer LXVIII due quam der Coninck van Vranckryck inde hertoch Karle voer die edele staet van Ludich, inde sach die edele gloriose, herlicke staet also erbermelick inde jemerlick destrueren inde te schande maken als je kersten staet te schande mocht gemaekt werden.... inde zij wonnen die staet van Ludick inde quamen daer in omtrent alre Heyligen avent. Men sacht dat de staet verraden waert van bynnen. Inde als sy daer in quamen inde die staet gewonnen hadden myt storme inde myt honnen geschuet, so geberden sy wonderlicke in die staet, nyet als kersten luyden mer als heyden inde Zarazynen. Want sy en sparden Got noch syne moder, noch Kyrck noch Kluyse, noch closter noch Kyrckhoff; inde sy mackten die edele inde kostelicke, schoene staet al so jemerlick te schande, inde sy destruerden also barmelicke als ye staet in der Korstenheyt geschant inde vernylt mocht werden. Want sy schanden dye heilige Kyrcke, men sloch prister aen den elter doet, die noch inder myssen stonden, sy noemen den prister die kellicken uytten handen, er dat bloet Gotz daer uyt genuet waes, inde storden inde gotten dat op die eltere, en lyeppen mytten kellicken ewech. Sy noemen die corparalen den prister vanden elter en schodden dat heilighe Sacrement opten eltter, inde mackten boersdueck daeraff, sy brocken die Heyldoms schapper op, inde noemen die syborie en woerpen dat heyldom doer uyt op die erde. Den wonderende dat overvlodig grot bermelick jamer dat doer geschiede Gode, te vorste inde der heyliger Kyrcke, dat en is nyet uyt te spreken noch te schryffen.
Sy vyolerden inde schanden die heilige Kyrcke, inde die kloster al so jemerlick dat syt doeruyt al so nauwe ewech noemen inde rouffden, dat daer nyt in en bleyff noch kellick, noch boeck, noch kassel, noch alff. Sy deden die klocken aff en vorden sy myt hoen ewech, men en lyet daer nyet in die kyrcke noch luchtter, noch bylden, noch lacken, noch belden; men nampt al so nauwe, wat sy kreghen konden, dat sy den pristeren nyet eynen pselter en hedden gelaeten, daer sy hoen getijden uyt gelesen hedden. Sy leyfden alte onredelicke mytten orlomenten der heiliger Kyrcke; sy deden die orlomenten der heiliger Kyrcken aen, alffven inde kasselen en des gelicke en vermompden hoen daermyt, inde gynghen daermyt danssen, dat ichs eynsdeyls sach dat dit also geschiede. Inde dit waes byllick eyn alte groet ontfarmelick jamer der heiliger Kyrcke. Inde hyr oem so mach ich woel schryffen inde seggen, dat sy nyet en deden noch en leyffden als Korsten mynsschen, mer als duvelen inde verwoede Turcken en Heyden. Als sy Gode inde der heyliger Kyrcke desen smoet inde spyt gedaen hadden, so en waest noch nyet genoch. Sy en sparden Kyrck, noch Kyrckhoff; sy sloegent all doet, noch kyndebeyt, noch heydenschap, sy schandent al te mael daer sy quamen. Sy en hadden gheyn ontfarmherticheyt in hoen lyff; sy worpent al in die Masse, jonck inde alt, cleyn en groet, geystelick en wertlick, pappen en clercken. Sy en hadden gheyn ontfarmherticheyt over nyemant, mer wat sy betroeden dat most die kelle aff hebben off in die Masse. Sy warppen alde luyden die bleynt en deuff waeren in die Masse, vroukens myt suyckende kynderen, jonge vrouwen onterden sy en vercrechden sy in honnen danck, inde daen so staecken sy hoen die kelle aff.
Mer dyt jamer waes den guede mynschen leyt, mer het waes quad te keren also waren sy verwoet in honre bosheyt. Inde ouch moster eyns deyls doer oem sterffven, dat sy die heylige Kercke al so jemerlicke schandden inde vyolerden.
Alsus barmelick inde jemerlick leyffde men in desser schonre stat, inde die ghene des gheyn schout en hadden, dat waeren die ghene die dat meyste ongevael hadden, die arme huysluyden.
Item due syt al uytgevort inde gedraghen hadden dat meyste deyl van den guede, due staeken sy die staet aen in allen eynde, en lyetten sy bornnen. Item sy worppen due ouch die brugge aff, twe arken. Alsus deden sy wonderlicke jamer sonder ontfarmherticheyt; die arme closter werden geschant inde beroufft, men jachtdet al uyt als rassende honde, moncken, begynnen, so wie heylich dat sy leyffden, besloeten closter, vrouwen en maen. Al worden sy gevyolert inde uytgejacht inde verdreven.
Als dit jamer al so hadde geduyrt X off XII daghen inde dat die staet al vernylt inde te schande gemackt waes, due quam Hertoch Karle wederom te Tricht bynnen. Inde van Tricht toch hee due int lant van Fragemont inde mackde dat ouch al woest inde te schande, inde brande dat ouch dat meyste deyl aff. Noch men en sparde ouch due kyrck noch clusse noch kyndebbedde off des gelick. Sy macktde van der heyliger Kyrcken hoen pertz stelle, van den elteren Gotz hoen krubben, daer sy hoen perde op teten goven.
Den jamer inde den spyt Gotz den dis Hertoch ouch al doe dede, dee waes onbetemelick groet inde ongenedich. Men vont dat heylige Sacrament, Gotz lichaem stoen in eyn hage off hegge geborgen voer die quade Turcken. Al sullich jamer geschiede doer. Inde als dis jamer doe geschiet waes, inde dit lant al verbrant inde beroufft waes, due toch dis Hertoch vurs, weder oem te Brabant wart. Mer hee leyteynen cappeteyn tot Tricht, dee geheyten waes der Her van Emmerkoerss .
Inde dis Heer dede due te Tricht voel ongenedychs jamers, over dat luytger volck; want hee dede sy al hangen als rassende wolffven. Die hee krighen konde, wye alt, wy jonck, wy onosel dat sy woeren sy moesten alle gehangen off verdrenckt syn. Mer so we gelt geven mocht, so wy weynich dat hee krigen konde, die lyet hee loess inde vry ongedoet.
Alsus so waes dis jamer al so groet dat onbegriplick were te schryffven, men verioech inde dreyff die luytger al so iemerlick uytten lande, recht als rasende honden. Men en lyet her nyrget rast hobben in gheynen lande, men verioech die vroucken al so wael als die maen. Noch wyff, noch kynt hadde vrede noch rast, men ioech zy Tricht uytter staet als wolffve, al so dat somyghe van den Luytger vrouwen bleven van kynde, te Tricht buytten die portte, als besten. Nochtaen so en mochten sy gheynen vrede noch rust hobben, sy mosten van Tricht ewech rumen sonder merren.