Blader door transcripties » Lokale Kronieken uit de Nederlanden 1500-1850

archieftoegang 1580_Antw_Wese, pagina 9

generale Staten van alle Provincien sullen vergaderen, om vrijmoedich
te aveseren tgene dat stercken sal tot Restablissement ende op¬
rechtinge vander vertreden Justicie, Policie, ende alle andere goede
Ordre, om Neeringe ende welvaert inden Landen te doen keeren,
ende Insonder van allen den inwoonderen, in alsulcke vrede ende
eenicheyt wederomme metten anderen te doen Leven ende converseren,
als sij onderlinge geleeft ende geconverseert hebben vander tyt aff
dat die Landen bij huwelycke ende successien onder eenen Heere
ende Prince gecomen ende geconsolideert syn geweest, tot dezemen
tegens alle Recht ende Billicheijt, de Uuytheemsche inden selven
heeft willen vueren, Om tegens Doppressie ende Tijrannie
vanden welcken sich te Defenderen, De voornoemde Heere Prince staten,
ende steden met huere geassocieerde de wapenen hebben moeten
aennemen, negeenssins, om hen te distraheren vander onderdanicheyt
vanden Coninck, huerlieder natuerlijcken Prince ende Heere Oft om
ijemant tot eenige Religie te bedwinghen
Ende hoe wel dat uuyt alle tgene des voirseyden es genoechsaem
blyct ende verdediget can worden, de goede oprechtige, ongeveijnsde
Intentie vanden voorseyde Heere Prince, Staten, ende Steden, Willende
de selve nochtans ex abundanti naerder voldoen, ten aensiene van
God ende der weerelt, ende daer bij bewijsen dat zulieden huer eijgen
welvaert ende gemack nyet en zoecken, noch oick in egheen meerder
achtinge ende Recommandatien en hebben, dan de gemeijn beste ruste ende
vrede, van allen Nederlanden, Al ist schoon, dat de ghene van hem
lieden, die de gereformeerde, warachtige ende Apostolicxe Religie
aengenomen hebben, ende daerinne persisterende sy veel liever goet ende
leven souden verliesen, dan deselfste in eeniger manieren te loochenen,
ot te buyten te gaen Sijn nyetemin, de voorseyde Princelycke Exe staten
ende steden met huerlieden geassocieerde gesamender handt te vreden
indien sijne Mt hen versoect op tpoinct der Religie, daer hier boven
aff geseyt staet afflaet dat zoe wel tzelfde, als tpoinct vander ver
sekerheijt ende alle andere poincten ende differenten (meest alle gemeen¬
schap hebben met die vande anderen Provincien) ende die aengesien de
Nabuerschappen en soude groot ongeluck gedaen worden deen
sonder dander getracteert te syne. gehandt ende afgedaen te
worden in wettelycke vergaderinge vande generale staten
van allen den Landen
Ende aengemerct dat mits het vertrecken vanden Uuytheemschen,
den concussien uuytteringen ende oppressien cesseren, ende alle Landen,
sonder fautte In vrede zullen syn vereenicht, zoe hier boven ende by
onse voirgaende geschrifte, breede geseyt is, Met presentatie ex abundanti.
dat wij tot
fol VI
dat wy tot alle Redelycke conditien willen houd en verstaen, daer bij men
hen te weder zyden van goede vrede versekert mach houden, tusschen
vertrecken derselver Uuytheemsche, ende die vergaderinge vande
Generale Staten, Soe versoeken ende bidden wij U E. villen hier op
ende op alles ten naesten lesten ende Insonderheyt een ongeweijnsde ende
Cathorechssche antwoorde geven met Jae Oft Neen, soe wel op de
presentatie vander versekerht mits vertrecken vande Uuytheemschen,
als oick op tgene de voorseyde Prince, Staten, ende steden met volder
handt bewilligen Inde laeste voorgaende antwoorde Zulcx dat wij
deen ende dander mogen verstaen, dat U E. soe zeer als wy tot eenen
goeden ende geduerigen vrede geneycht syn, doch en konnen wij ons nijet
anders laten voorstaen, Oft uwe Eer. sullen ten eijnde (soe wij verstaen)
nijet goet dan nootlyck bevinden De vergaderinge vande Generaele Staten,
als wesende (nae U E. eijgen scriftelycke antwoorde, ordeel ende meyninge
vande xiiije Meerte lestleden ) de wijste ende verstandichste vanden
landen, Neffens twelck wij oick Seggen, dat De selve synde opper¬
tydichscte, Incorruptibelste, ende die gene, wien best bekent es de
toecompst ende gelegentheijt van allen saken, ende over sulcx wel
sullen weten te adviseren ende sluyten, hoemen in als zal moghen
Remedieren, ter eeren Godts, dienst van sijnen M t , vrede ende welvaert
van allen den Landen
Overgegeven Den derden Junij lxxvtich
finael versoeck vanden Prince, Staten ende steden
Des iij Junij 1575
Copie
Aengaende de naerder verclaringe opt gescrifte vanden ien
Julij overgegeven bij Commissarisen vander Co. Mat ande Gedeputeerde
vander Prince van Oraiginen , Staten ende Steden van Hollant,
Zeelant , beroerende tpoinct der assurantien
Alsoe naer Toverleveren vanden voorseyde gescriefts mondelinghe
propoosten gevallen syn opt topenen Der voorseyden Assenzantie ende
versekerheyt Seggen de voorseyde gedeputeerde, Dat zij in huere gescrifte
vanden xxve voorgaender Maent verclaert hebben, voor alsnoch nyet
te verstane, van wat maniere ende specie van versekerheyt hueren gede
putee r onse meijningen ende Intentie soude zijn, ende mitsdien oick
sy volcomelick nyet en wisten yet voor te houden, dan ontdect
zijnde eenige bequame sorte ende specie van versekerheyt huerlieden gede¬
puteerden Heeren ende Meesters, nyet onder wegen souden laten,
alle Alzulcke redelycke asseurantien, als by ons voorgewenst zouden
werden, ende hen moghelyck syn zoude volcomelyck te presteren,
tot onderhoudenisse van al tgene Dat Inde wettelyck ver¬
gaderinge