Blader door transcripties » Lokale Kronieken uit de Nederlanden 1500-1850

archieftoegang 1580_Antw_Wese, pagina 12

ende elders verde buijten haer landen Nochtans en hebben de Spaeng¬
naerden daeromme int Jaer twintich nyet willen lyden In Spaengnien
eenich Gouvernement vanden Heeren ende Ingesetene van dese
Lande handelende nochtans met alder civiliteyt ende redelicheyt,
all veele anders dan syne alhier doende syn
Die van Hollant Zeelant ende andere huere geassocieerde
hebben hen moeten behulpen tot huere Defensie met Uuijtheemssche,
als franchoisen Gascons Ingelsche Schotten ende Duytssche, de
de welcke hen nyet onder wonden en hebben van eenige Authoriteijt
oft Governement, Maer hebben hen tegens de Spaengnaerden, als
vianden vanden selven lande, laten gebruijcken, daer ende alsoe syne
Pe Exe ende Staten vanden selven lande goet gedocht heeft, Ende
zouden in allen gevalle, In donderscheyt der Natien, ten respecte
van Hollant ende Zeelant, die Duytssche te min vremde ge¬
reputeert behoiren te worden, als wesende de voorseyde landen
altyt geacht voor een Graefscap van T Ryck, Syn nijetemin syn
Pe Exe ende de Staten bereyt de voorseyde Natie te doen vertrecken,
alsmen die nyet meer en sal begeeren te gebruycken, Ende soe zyen
Mt van meyninghe es de voorseyde Spaengiaerden In dese landen
nyet langer te houden, dan de necessiteyt der saken is Uuijt¬
heemsschende ende Dat syne Mt nyet voorder en behoirt ge¬
eijscht Oft bedwonden te worden, soe en behoiren syne voirwaer
oick nyet langer te blyven Omme te voorcomen de geheele
bederffenisse vanden zelven Lande, uuijt teringhe ende verenickinge
van dyen, zoe die selve Ingesetenen zijn supplicerene ende biddende
aleer een arger tot preiudicie ende verminderinge van zne Mts
hoochteyt ende Authoriteyt mochte gebeuren, als wel gesien is
vanden Princen, die de clachten van hueren ondersaten nyet en
hebben willen hoiren Oft achten alsoe principalyck de hoocheyt
ende authoriteijt van een warachtich Prince. Daer toe dient ende
daerinne mitsgaders goederthieren administratie van Justitien,
met Liefde tot conservatie van synen ondersaten, Is consisterende,
ende nyet in eenige fortse Oft macht, die men lichtelyck siet ver¬
minderen Oft vermeerderen Maer veele veranderinghen subiect
is, als verscheyden exemplen hebben geleert
Nijetemin, En willen syne Pe Exe ende die Staten van Hollant
ende Zeelant met huere geassocieerde synen Mt daer toe eenichssins
bewegen, Maer hebben zijne Mt bij Remonstrancien daer toe
wel willen bedweghen, ende bidden, gelyck syne oick ghedaen
hebben
Aengaende
fol IX
Aengaende de vergaderinge vande Generaele Staten, Omme bij litre
communicatie ende advis vandijen, goede ordre ende geregeltheyt op
gestelt te wordene. T Welck soe zyne Mt byden voorseyde gescrifte
nyet alleenlyck schynt alnoch te differerene tot de zaken ghe
pacifficeert zouden syn, Maer oick te bescryven, ende te willen Re
digeren binnen zekere Limiten, soe en geloven oick syne Pe Exe
ende Staten van Hollant ende Zeelant metten hueren nijet
door de Generaele Staten, den Spaennaerden, allen Inden lande Int
Gouvernement, ende in wapenen synde zoude begeren te vergaderen,
op den voet Inder qualiteyt Oft forme bij tvoorseyde gescrifte van
mynen E. Heeren verhaelt, Want schynt datmen daer by soude willen
Restringeren, ende onder sekeren Seghel stellen, der staten ver¬
gaderinge vermogen, ende Officien, t welck
hen
zoe wijt ende breet
moet extenderen, als andere gemeyne zaken ende welvaert vanden
Lande mogen verloopen, soe zijlieden alle gebreken self gevoelende
ende mits dien doorsaken metten periculen van dijen best wetende zijne
Mt daer tegens Remedie geadhibeert te wordene gelyck het van
Outs soe wel int particulier als int generael bij henlieden gedaen is geweest
met groote establissement van syne Mts hoocheijt, emmers noch inden
Jaeren van lviij ende lix lestleden verscheyden Remonstrantien ende
advijsen op de beleijdinge der fransscher Oorloge ende voor de bescher¬
minge der Landen, hebben geexhibeert sulcx dat nyet sonder huerlieden
de saken gedresseert ende in goede Ordre gestelt syn geweest behalven
oick dat zijne haeren Remonstrantien ende advijs, dicmaels oick de
deliberatien, Ordonnantien ende Placaten ende andere dispositien van zyne
Mt Oft synen Mts Raden In verscheyden Materien hebben doen veranderen,
surcheeren ende oick abrogeren, Ende en mach syen Mt op nijemant anders
Oft beter betrouwen, dan op syne Staten ende opt advijs vanden
genen, die hij hout (als bij tzelve gescrifte wort geseijt) als de beste
principael staende verstandichste van allen synen ondersaten, wijens
getrouwicheijt ende vromicheyt syne Mt ende synen Mts voor ouderen
hooger memorien soe dicmaels hebben ondersocht ende bevonden,
sonder dat oyt op huere Authoriteijt debat estdispat gemaect es geweest
Sulcx dat syne Pe Exe Ende de voornoemde van Hollant ende Zeelant
metten hueren, uuyten voorseyde geschrifte ende byde limitacien ende Restrictien
aldaer verhaelt nyet en connen begrijpen, dan datmen bedectelyck
de voorseyde Staten ende Landen Previlegien, ende Authoriteyt metter
tijt, poocht te verminderen ende die nyet te gebruycken, dan omme te
hebben eenich accordt ende consent van beede ende versochte scattinge,
als daer toe verbonden ende gehouden sijne Ende ingevalle van eenighe
excuse Oft weijgeringe, den zelven Staten te bringen uuyt simpele
obedientie ende onderworpenheyt, onder een absolute commandement
ende gebeden van synen Mt Navolgende Tadvys ende scryven van don francisco
d alva