Transkripte durchsuchen » National Archives / Archiv South Holland

Archivzugang 1.04.02, Inventarnummer 1053, Blatt 318

alsoo Sr. Wemmer van Berchem met het Jacht den hasewindt
op den eersten October wt het vaderlant Is gearriueert, met brieven
vande heeren Staten ende syne excelentie om op alle plaetsen den
Treves met den Conninck van Spaingnen gemaeckt te vercondighen
hebben goet gevonden (aengesien geen presenten en brengt om neffens
de voorsz. brieven te presenteeren, ende tgene men van cleeden ofte
andersints wt de logie soude moghen geven hoochte gelde soude loopen,
ende weynich aengenaem syn, ouermits wel weten sulcx vande voors
heeren Staten ofte sinne excelentie niet en werdt gesonden)
datmen den Coninck alleenelyck mondelinge den voors. Treves sall
aendienen, ende de Brieven bewaren ter compste vanden hr. gouverneur
generael, om als dan soo de saken sulcx bevonden wordt te vereysschen
gepresenteert te worden.
Ende Alsoo het schip de cleynne Sonne hier op ultimo passado
is gearriveert hebben aenden Gouuerneur van weghen den Coninck
dadelyck doen aenseggen, gelyck de maninere is, dat de seluercleeden
soo vande voors Cleynne Sonne als het Schip Ternate met den
eersten vermeynden te lossen, waer op ons dede seggen noch 2 off 3 dagen
moesten wachten, alsoo hem eerst wilde vraghen, wat gerechticheyt
den conninck voor desen daer af hadde genooten, ende dan voorts soude
beraetslagen wat daer inne wilde gedaen hebben, waer ouer goet gevonden
hebbende met malcanderen te houe te gaen, om hem syn meeninge
af te vraghen, alsoo vastelyck suspitieerden eenighe nieuwicheyt
wilde eysschen, aengesien ons het lossen niet en hadde willen toelaten—
heeft ons aengeseyt dat aengesien de Gouseratten, ende andere die
dit Jaer met cleeden van Priaman waren gecomen, hem voorthol
betaelt hadden vyff ten hondert, dat sulcx ooc van ons wilde hebben
van welcken ongeschickten eysch verwondert synde hebben hem met
verscheyden redenen, synne onredelyckheyt ende de schade die de
Conninck door sulcke nieuwicheyt soude comen te lyden, als oock het
accoort voor desen op tstuck vande cleeden met den ouerleden gonuer
neur gemaeckt, Int lange aengewesen, waermede niet connende
voorderen alsoo hy seyde hem naer andere die syn slanen waren geweest
niet en wilde reguleeren, hebben hem ten lesten aengedient, aengesien
hy seyt ons als andere natie wil tracteren, dat te vreden syn hem sulcx
te consenteeren, Ingevalle ons iu wtvoeren vanden peper niet meer
als de voors. Guseratten chineesen off andere Natien en wilde beswaren
naer
waer int minste niet en wilde hooren ende alsoo wy hem daer op protestat
rende seyden, dat het ons naermaels niet en soude uyten soo de neeringe
van dese plaetse op een ander getrocken wiert, antwoorde wel onbeleef
delycken ende buyten propost dat hy meester was in syn landt, ende
soo niet volghen en wilde wat hy goet vondt, dat wel moechten vertrec
ken, ende de cleeden op een ander brenghen Somma met sulcken
redenen ons voor thooft gestooten vindende, hebbent nochtans
daer by niet willen laten blyuen, maer om hem de matevol te meth
goet gevonden te versoecken dat aengesien het Schip heel leck
was &n den admirael dagelycx waren verwachtende, oft wilden con
senteeren datmen de selue packen mochten lossen ende by provisie
aen Landtbrenghen sonder deselue te vercoopen, om ter compste van
Admirael de sake te slechten, heeft hier op oock als boven geantwoort
waer ouer ons afscheyt nemende ende Inde logie met malcanderen
vgadert synde hebben geresolueert het naervolghende
Eerstelyck alsoo ons de heeren Bewinthebberen inde Instructien
ende brieven met het Jacht den Hasewindt ontfangen expresselyck —
belasten datmen sulcke exactien ende nieuwe schattingen streckende tot
groot preIndictie van onse natie ende quaet excempet voor andere
omliggende Coningen.
Op huyden den 3en. October 1610 Is Inde logie
tot Bantam byde ondergeschreven breden Raets per=
sonnen geresolueert het naervolghende.