Blader door transcripties » Stadsarchief Amsterdam

archieftoegang 5075, inventarisnummer 173, pagina 38

raide sullen vinden, hen tot dien eynde gevende sodanige last ende
auctoriteyt als executeurs van testamente nae rechte
competeert, voirts hebben die testateurs
ende elcx van hen expressel. gewilt ende geordonneert
willen ende Ordonneren mits desen, dat naer aflivicheyt
van een van hen beyden testateuren, tzy off die Lancxtlevende
weder quame te herhuwelycken off niet, oft dat oock
die Lancxtlevende daer nae deser werelt mede
quame te Overlijden, voer ende al eer hare kinderen alle
mondich sullen zyn, hare achter te latene goederen
geensins sullen syn subject den weescamere deser
stede, noch der selver Ordinantien, oft Statuten, dat
oock die heeren weesmrn. deser Stede, noch eenige
andere cameren oft rechters oft yemant anders
tzy waer ende tot wat plaetsen haer Sterffhuys
soude mogen vallen, ende dese hare uterste wille geexecu¬
teert werden, eenich seggen oft bewindt Over
haerlieder sterfhuys oft nae te Latene goederen
hebben sullen, noch oock mogen heyschen Staet oft
Inventaris Int cleyn oft groot Die selve wel
expressel. secluderende ende buijten sluijtende by desen
ende die al niet tegen staende eenige Statuten
keuren oft Ordonnantien vande weescamer ter
contrarie, die zy met rypheyt van raiden mits desen
derogueerden, maer dat by afflivigheijt van hen
beyden testateuren die goederen van hare ommondige
kinderen geregeert sullen werden bij hare naeste
vrienden van beijden sijden, alles In vougen voiren verhaelt is
ende oft gebeurde dat naerde afflivigheijt van een van
beijden testateuren, eenige van haren kinderen quamen te
sterven, sonder wettige lijffs geboorten nae te laten,
sullen indien gevalle desselffs goederen van t'een kint
opt ander erven totter laetste doot toe ende alle overlijdende,
sonder wettige descendenten, voerden lancxtlevende van vader
oft moeder, in Sodanige cas, saldie selve Lancxtlevende
die voorss. goederen, (: wtgesondert alleenl. die
clederen ende clenodien tot des eerstaffgesturvener
lijve behoirende,) alleen syn of haer leven geduyrende mogen
38
gebruijcken, ende naert versterven vanden Lanxtlevende
sullen die selve goederen, gaen, aen des laetste kints
eerst affgesturvene vaders oft moeders vrie
naeste bloetvrunden, van s'rechts wege daer Inne
succederende, alsoe haer testateurs beijder uterste
wille is, dat hare goederen ten wedersyden In allen
gevalle van sterven wederom sullen gaen aende syde
van daer die gecommen syn sonder daer aff te mogen
vervreembden oft versterven in eeniger manieren Alle
d' welck voorss. Staet seyden ende verclaerden die
voorn. testateurs ende elcx van hen te wesen haer beyder
testament uterste ende laetste wille, willende ende
begerende dattet selve alsulcx oft als codicille, gifte
oft maeckin. diemen noempt Donatio Causa mortis, off
anders soe een yders testament ende uterste
wille, alder vaste ende crachtichste plaets houden
ende subsisteren sal mogen van goeder waer¬
den gehouden te hebben ende volcommen effect
te sullen sorteren vande minsten totten meesten
article toe Daer Inne begrepen, Niet te¬
genstaende eenige keuren off Ordonnan¬
tien van landen oft Steden desen contrarierende,
versouckende voirts aen my Norio. voorn. wettel. stipu¬
lerende van t'gene voorss. is gemaect ende
hen gelevert te werden een off meer Openbaer
Instrumenten In debita forma, Gedaen binnen
der voorss. Stede van Amstelred., ten huijse
vande testateurs, gestaen opde oudesyts voerburghwall
ter presentie vanden eersamen Philips Cornelissen
ende huych cornelisz Jager getuygen waerdich van
gelove hier toe versocht ende gebeden etc.
ten dage ende Jare als voiren
Walich sijvertz
stijn pieters
Phls Cornelis
Hkornelisz Jager