Blader door transcripties » Stadsarchief Amsterdam

archieftoegang 5075, inventarisnummer 173, pagina 26

geprelegateert ende voort wt besproocken prele¬
gateren ende bespreecken voort wt by desen
eeuwelyck ende erffelyck allen den huysraet
ende Imboedel met allen tgeene daer vooren
eenichsins gereeckent werdt niets wtgesondert
in sulcken schyne tselve bevonden sal werden
Inden sterffhuyse ten tyde van des eerst
afflivigens Overlyden ende inde reste
oft tsuperplus van alle ende yegelycke
d'andere goederen soo roerende als onroerende renten
actien crediten coopmanschappen gereet gelt
Landen huysen gronden van erven erffpachten
ende anders wes sy testateurs meer
metter doot ontruymen ende achterlaeten sullen
niets geserveert hebben die voornomde testa¬
teurs ende elcx van hen geinstitueert ende
genomineert institueren ende nomineren by
desen nelleken ende Grietgen steerlincx
haere kinderen altans byden anderen geprocreert
ende die sy noch samentlyck door Godts genade
souden moegen procreeren haere erffgenamen te
sullen wesen in gelycke portien hooft voor hooft
in te tasten ende evenveel te genieten Onder
expresse conditien ende limitatien dat die
lancxtlevende van hen testateuren syn
oft haer leven lanck geduyrende oft tot
weder hylickens toe ende langer niet sall
blyven behouden besitten ende gebruycken alle ende
yegelycke die voorsz goederen ende daer mede
even wel doen handelen ende traffiqueren soo hy
oft sy inder tyt te raide vinden sall sonder gehouden te
syn den heeren weesmeesteren deser stede de
naeste bloetvrienden vanden eerst overledenen
of eenige andere cameren oft rechteren te
geven eenige Inventaris oft bewys reecke
reliqua oft openinge van staet te doene
veel min cautie oft verseeckerheyt te stellen
in eeniger manieren ende dit al niet tegenstaende
eenige statuten keuren oft ordonnantien
vande weescamere ter contrarie dicterende die
sy met ryphet van raide mits desen derogueerden
26
dan sal die lancxtlevende verobligeert wesen gel.
hy ende sy onwederroepelycken belooven ende aennemen
mits desen die voorsz kinderen naede quantiteyt
van heure goederen eerlyck te onderhouden in
Cost clederen schoelgaen ende andere Corporele
nootdruften die selve ter deuchden te stieren
die knechtgens aende coopmanschap te setten
eenich cost ende die meyskens eenich
properheyt te doen leeren om hen door Godts
segeninge naemaels te moegen behelpen
ende ten houwelycken staete commende te
doteren (by soo verre sy sulcx met consent ende
advys vanden lancxtlevende doen ende anders niet)
met soodanige goederen als den selven in syn oft
haer gemoet ende discretie nae exegentie
vander saecke bevinden sal te behooren in plaetse
van haer legittime portie want sy testa¬
teurs malcanderen vastelyck vertrouwen dat
die lancxtlevende van hen beyden die kinderen
niet vercorten dan ter contrarie alle voordel
ende proffyt te doen soucken sal ende by aldien
den lancxtlevenden van hen testateuren
weder quame te houwen ende van staet te
veranderen sal die selve in sulcken gevalle
gehouden syn die voorsz kinderen haer eerst
overleden tsy vaeders oft moeders erffeniss te
bewysen ende aende naegenomineerde momboirs
ende testamentelycke voochden wt te keeren
namentlyck die gerechte helfte van alle
ende yegelycke die goederen alsdan in wesen
synde van welcke goederen die selve lancxt¬
levende alsdan ende te dien tyde oock eerder
niet aende selve naegenomineerde testa¬
menteurs sal overleveren pertinente staet
ende Inventaris by waere woorden in plaetse
van eede bevesticht sonder dat syluyden oft
yemant van hen erffgenaemen eenichsins
daertegens sullen moegen opposeren oft den
selven lancxtlevende tot eedt constringeren