Blader door transcripties » Stadsarchief Mechelen

archieftoegang 2, inventarisnummer 937, pagina 99

Ende de selve Victor heeft oic bekent voir ons dat hy
gehuert heeft, tegen der voerscreven weduen ende erfgenamen
Thuyse oft de Herberghe den Craen geheeten, metten hove
plaetsen stallen, en allen anderen sinen toebehoirten, alsoe
de voirscreven wedue ende haere kynderen, dat opten dach van
heden besitten ende gebruyken, gelegen opte Marct van
Mechelen, tusschen thuys geheeten geldenaken, dat
wylen Henricken vanden Voerde, toe plach te hoeren
aen deen zyde ende Henricx Marien huys, aen dander zyde
ende oic metter helft van allen den haeffeliken goeden
der voerscreven weduen alleenlic toebehoerende inde voerscreven
herberge wesende ende totter selver herbergen dienende
sonder haer selverwerck cleederen ende zelen vutgenomen
haerlieder cleyn huysken metten poorthuyse, inden
Nieuwen Bruel, by weert Neefs huys, gestaen ende gelegen
dat sal der voerscreven weduen ende erfgenamen bliven, oic
haer prouffyt daer mede te doen, Eenen termyn van
Sesse jaeren langh geduerende ende deen na dander
terstont volgende, die inne gaen ende beginnen zelen
opten vyftienden dach van deser tegewordiger maende
van meye naestcomende, Ende soe voertaen zelen gedueren
den selven termyn ende vut zaken van deser hueringen
hebben de voirscreven Victor ende oic meester Ypolite de Berthoz
greffier vanden tresoneren ende general van Onsen
genadigen heer den hertoge van Rogier van Brabant etcetera
syn schoen brueder, die daerom oic voer ons gecomen
water, gelooft ende elc van hen besunder ende voer al, Te
geven ende te betalen, der voerscreven weduen ende haeren voerscreven
kynderen ende kynts kynderen, oft den brenger van desen van
elcx jaer van dien sesse jaeren, hondert ende thien
gouden Rynsgulden goede ende gerechte, Te wetene veertich
groote Vlaems gelts voer elken van dien Rynsguldenen
gerekent, tot twee termynen Te weten deen helft daer
af opten vyftienden dach van Novembry, Ende dander
helft opten vyftienden dach van meye, daeraf den yersten
termyn van betalingen syn sal, opten vyftienden dach van
Novembry naestcomende. Behoudelic dien, dat de voergenoemde
weduwe, hebben ende behouden sal tot haeren gebruyke, de
neercammere, daer nu inne claert, metter Nieuwen
cammeren daer neven staende ende oic thangende cammeren
dat boven den voer vander voerscreven herbergen hanght
alsoese staen, om daerinne metter voerscreven Margrieten
haer dochter te bliven woenen gaen staen slapen ende
haer gerief ende gemechte doen, soe hem dat gelieven sal
van septembry naestcomende, over een jaer daer naer
volgende ende niet langer, Ende dat oic de voerscreven Jacop
met synder huysvrouwen, bliven ende behouden sal, tot
synen gebruyke, de cammere daer hy oic inne staet
om daer inne oic te syne ende syne hanteringe ende dinck te
doene, tot septembry naestcomende ende al sonder mindernisse
oft afslach vanden voerscreven hondert ende thien Rynsgulden
Ende dien septembry gecomen sal de voerscreven Jacop met
synder voerscreven huysvrouwen van daer vertrecken ende gaen
woenen int voerscreven huys Geldenaken geheeten, met meester
Jan Geel synen tyt geduerende, achter int selve huys
alsoe hy dat met hem geaccordeert heeft, Ende daer wesende
sal de voerscreven Jacop moegen doen maken, een doere inden
muer vander voerscreven herbergen, ter selver plaetsen, daer
tanderen tyden gestaen heeft, om daer der in ende vut
geelic ende hoeffelic tegaen, over den voerscreven vloer
vander voerscreven herbergen, den voerscreven termyn vander voerscreven
weduen tyde geduerende, dat de van septembry naestcomende
over een jaer daer naer volgende, Ende van dien
septembry naestcomende, over een jaer daer naer, als de
voerscreven wedue vuter voerscreven herbergen sal vertrecken, sal
sy alsdan metter voerscreven haerer dochter moegen comen
int voerscreven huys geldenaken ende aldaer metten voerscreven Jacoppen
woenen, soe dat overdragen zelen ende van salmen de voerscreven doere
weder sluyten ende toe metsen, alsoe te voeren waer, in deser hueringen
oic tusschen de voerscreven partien ondersproken ende bevorweert, oft
gebuerde, dat de voerscreven onse genadigen heer vut eenigen zaken, hem daer toe
porrende, syn paelenent dat hy by synder genaden in synder voerscreven
stad van Mechelen geordineert heeft te zyne van daer in anderen
steden oft plaetsen transfereede, oft oic te nieuwte dader, dat in
dien gevalle alleene, dese hueringe van dien tyde voert, dat dat by
hem gedaen sal syn, te nieuwte ende gesmolten sal wesen, op dat
den voirscreven vier gelieft niet min, de voirscreven Victor ende syn voerscreven
Schoen brueder, zelen gehouden syn te betalene, der voerscreven weduen
ende haeren kynderen, al tgene, de sy hen vander voerscreven hueren
totten dage toe, dat de voirscreven Victor alsoe vuter voerscreven herbergen
vertrecken sal sculdich ende tachter zelen wesen, die in in desen
bevorweert ende gecondicioneert, dat de voerscreven wedue de voerscreven
helft van haeren voerscreven haeffeliken goeden, sal doen inventarieren
ende scatten, om de rechte weerde ende pryse daer af te wetene
Ende dat alsoe gedaen sal de voerscreven Victor aenveerden, Ende ter
eynde van synder voerscreven hueringen, oft als hy vuter voerscreven herbergen
scheyden sal, heeft de voerscreven Victor gelooft, die Hane, der voerscreven
weduen, alsoe goet weder te leveren ende te restitueren, oft haer
voer de ghene, die alsoe goet met bevonden en sal worden
geven, alsoe vele penningen, als de scatteren bevinden zelen, nader
voerscreven pryse datse geregeert sal syn, sonder eenich wederseggen
Ende oft oic de voerscreven Victor eenige dinghen dade maken oft afbreke
inde voerscreven herbergen, dat heeft hy oic gelooft, tot synen afscheyden
alsoe goet te doen maken, alst waer, doen hy de de maken ende