Blader door transcripties » Stadsarchief Mechelen

archieftoegang 2, inventarisnummer 937, pagina 117

Libero de
Hamme
Bossche, Zoeten. Jan van Hamme ende Lysbeth, jouffrou
Lysbeth Vensele syn huysvrouwe, hebben gewilt
ende openbairlic voer ons geordineert, dat alle
haere kynderen, alsoe wel meyskens als knechtkens ende
knechtkens als meyskens, die sy nu ter tyt deen vanden anderen
vercregen hebben ende hier namaels deen vanden anderen
zelen moegen vercrigen, evengelyc ende in gelyken deele ende
porcien, hebben houden deylen ende besitten zelen alle haere
haeffelike ende erffelike goeden waer ende tot wat plaetsen ende
steden, die gelegen syn ende bevonden zelen worden, die
sy nu ter tyt hebben ende hier namaels oic hebben ende
vercrigen zelen ende die na eensyegelycx doot van hen
beyden in eeniger manieren zelen bliven, den wederseggen
van yemande niet tegenstaende
IXa novembry
chys
Rumoldus
Mol, Vossche. Heer Jan Musene, Willem vander Berct ende
Rommond van Eembeke, als executeurs ende inde name vanden testamente
ende vutersten wille van wylen Jannes Blanden diemen heet
Pauwels, hebben bekent openbairlic voer ons dat sy om te
voldoen ende te volbringen, den vutersten wille, vanden selve
wylen Janne gehadt ende ontfangen hebben van Rommond Thys
de parcheelen van legaten hier na volgende, die de voergenoemde
wylen Janne den ponen ende plaetsen hier na oic bescreven
met synen voerscreven testamente gemaect ende gelaten heeft, heeft
den goidshuyse vanden Camme sesse Rynsgulden eens den
goidshuyse vanden carmeliten, staende bynnen deser stad ten
de goidshuyse vanden minderbruederen, binnen der selver stad
drie Rynsgulden eenen. Item den goidshuyse vanden
Augustinen, Twee Rynsgulden eenen. Item der gelike
van Sinte Rommonts kerken, Twee gouden Ryders eenen
Item der missen van Onsen Liever Vrouwen den bruederscap
van Onser Vrouwen missen in Sinte Rommonts kerke vier
Rynsgulden eenen. Item de Heylich Sacramente misse
inder selver kerke twee Rynsgulden eenen. Item der
missen van Sinte Anthonis inde voerscreven kerke eenen Ryns
gulden eenen. Item den prochiaen vander voerscreven Sinte
Rommonts kerke, twaelff stuvers eenen. Item den costere aldaer
sesse stuvers eenen. Item Lysbetten vander Lynden twee
selven Lepele eens. Item Lysbetten Caluwaerts haerer
dochter, twee selven lepelen eene, Item Peteren Rommonts
des voerscreven wylen Janne Cape, twee gouden Petere
eene Jan Barblen Bellens, wylen Willem Bellens dochter
eenen Rynsgulden eens. Item Barblen Vleminge, desselfs
wylen Janne Maerten van Acht Rynsgulden eenen. Item
kerken
der fabriken van Onser Vrouwen van Cameryck, eenen
mottoen eenen. Item den goidshuyse van Muysene eenen
gouden Leeuw erve. Item den goidshuyse van Thabor
eenen gelyken gouden Leeuw eens. Item der capellen van
Sinte Loy, vier Rynsgulden eene, Ende eenenyegeliken
vanden voerscreven drie executeurs, drie Peters eens van
allen welken legaten, gelyc die voiren bescreven staen
hebben de voerscreven executeur inde name van voer quytgesconden
los vry ende ledich, den voerscreven Rommond, tot sinen ende
Kathelinen Blandyc, diemen heet Pauwels syne wyfs ende
des voirscreven wylen Janne dochter behoef ende alle andere
dies quitancie behoeven geheelic ende al, Een hebben voert
gelooft, de selve executeur, den voerscreven Rommonde synen
wive ende allen ande tegen de voerscreven legate ende elken
daeraf
anderen altyt scadeloos quyt te houden ende tontlasten
XIII novembris
Lauren
Hellen et
eus uxore
Heelt, Baerdegem Laureys Eelens ende Yde van Goerlaken zyn wyf
Seggende ende ons te kennen gevende, dat sy gheen wettige kinderen een
hadden, Ende hebben daerom voir ons gewilt ende openbairlic geordineert
dat de langhstlevende van hen beyden soelange die alsdan leven sal
paysselic ende vredelic sal gebruyken alle der haeffeliker ende
erffeliker goeden waer die bevonden zelen worden, bynnen der
stad ende vryheyt van Mechelen bevonden zelen worden, die
in nu ter tyt te samen hebben ende hier namaels oic hebben ende
vercrigen zelen, den wederseggen van yemande ende oic den
rechten ende coustumen daeraf ter contrarien onderhouden
niet tegenstaende. Behoudelic dien, dat alle de voergenoemde goeden
na de langhstlevende doot vanden voerscreven Laureys ende synen wive
blivende toecomen ende versterven zelen haeren gerechten
erfgenamen, die die goeden, na den rechte vander voerscreven stad
sculdich syn toetecomen ende te versterven, oft den ghenen dien
sy deselve goeden samentlic met testamenten oft anderssins geven
ende maken zelen, welke ordinancie wy ende oic Mol ende
Ghoeten by crachte vanden statute daerop tanderen tyden gemaect
geconfirmeert ende geapprobeert hebben ende by ons ordinairder
macht confirmeren ende approberen, Alle argelist vutgescheyden
XIIIIa novembris tempore simile