Blader door transcripties » Stadsarchief Mechelen

archieftoegang 2, inventarisnummer 534, pagina 45

Vort, dat men ghene lakene die vercocht siin vremden coemannen en sal
in oghen weder nemen. Ende ware vorde deekene ende hare ghesworne wiese
anders weder name, hi verborde de lakene of een pont grote vor elc
laken op dat hiis beproeft worde.
Vort, soe sal der deeken clerc ten wiessele wachten, dat men den
draperiers en gheen debet of af slaen en scriven van haren lakenen
mer vol haer ghelt op die boete van vore, waer hiit viint dat ment
anders dade. Dat soudi calengiren ende den deeken toenen ende
en dade hiis met hi soude verboren sinen dienst teenwelike daghen.
Vort, en mach gheen weerd meer coemanne dan enen op de halle
leyden en ware siins coemans gheselle
Vort, en mach men ghene wolle vercoepen dan tsaterdaghes op
de wolle marct. Ende ware toe drien stenen toe ende niet daer boven
sonderargelist, wie elre dan tsaterdaghes op de wolle marct meer
dan iii. stene wollen vercochte tenen male, verborde van elken stene die
daer boven ware v. s. ende diese cochte v. s. die ghelike. Ende die zame-
coepe diet bedreve verborde ene maent sinen zamecoep.
Vort, wat portren of porterssen lakene cochte, vercochte of coepliicte
eneghen andren portren of porterssen elre dan op de halle, elc van hem
verborde x. lb. alsoe dicke alse hiit dade ende hiis beproeft worde ende
ene maent siin halle, beide coepere ende vercoepere.
Vort, wie lakene zeepen dade, soe soude men dat laken in drien stucken
sniden. Ende dat middelste ware verbort ende x. lb. ende dat mense
nemmermeer vergadren en soude moghen, waer mense vergaderde soe
ware dat laken verbort of een pont grote vor dat laken op dat men dlaken
niet ghecrighen en mochte. Ende die voldre diese zeepte soude verboren
een iaer siin ambacht.
Vort, elc vremt coeman die te Mechelen compt op de halle ende lakene
coept salse moeten betalen in dien wissel ten derden marct daghe ende
ware dat die vremde coeman met sinen weerd op borch cochte, soe
en soude niet langher moghen borghen dan xiiii. nacht ofte min na
de drie marct daghe. Ende dat soude de coeman met sinen weerd moeten.
segghen der deekene clerc ende waert dat die ghene die sine lakene
vercochte siin ghelt in den wissel niet en vonde ten derden marct daghe.
Of binnen xiiii. nachten daer na opten borch ware alse vorseit es.
Soe soude deghene die siin ghelt inden wissel niet en vonde des
naest dages daer na daer af claghe doen vore de deekene ende daer
af selen de deekene ghenouch doen doen. Wie des niet en claghede
ende in ghebreke ware, verborde x. lb. Vort, al waert oec dat sake dat
dese boete aldus verscenen ware bi versinnenessen of vergetelheiden
van onsen portren of porterssen, soe en souden nochtan onse portren
ochte porterssen haren ghelt niet verliesen, maer soudens moghen
volghen ane de deekene tenen tide van xiiii. nachten na dat hem
hare ghelt versceven ware ende daer selen af de borghen ghehouden
bliven. Ende de deekene selen onsen portren ende porterssen daer
af volcomen recht doen ende wie ten derden marct daghe of
ten daghe van ten borghene oec mids versinnenessen ofte verghe-
telheit binnen xiiii. nachten daer na alse vorseit es siins ghelds
niet en volghede ane de deedkene. Dien en soude men gheen recht
meer daer af doen op de borghen, maer de borghen souden van
dier scout onghehouden bliven.
Dese poente waren gheordineert metten ghemeinen rade ende
ghelesen op de halle inden tide doen Ian Kerman ende Heinric
Lieten deekene waren int iaer ons heren mccc. ende xlvi. ende
nu verzien ende som verbetert metten ghemeinen rade. Inden
tide dat Jan Keerman ende Jan van Hansbeke nu deekene siin
int iaer ons heren mccc. ende l. des maendags na sente peters
daghe in sporkille.
Alle men coept ene viertele tarwen om v. s. nuwer lovensche d.
Dan sal weghen een kerspet d. broet twe marc ende een half ende ii.
vierdonc ende iii. dd. inghelsche.
Alse men coept ene viertele tarwen om v. s. iii. dd. dan sal
weghen kerspet d. broet iii. marc en enen vierdonc ende enen settiin.
Alse men coept ene viertele tarwen om v. s. vi. d., dan weghen
i. kerspet d. broet iii. marc ii. loet i. settiin ende ii. d. inghelsche.
Alse men coept ene viertele tarwen om vi. s. ix. d. dan sal weghen
i. kerspet d. broet iii. manc i. loet.
Alse men coept ene viertele tarwen om vi. s. dan sal weghen i.
kerspet d. broet ii. marc ii. vierdonc i. loet en iiii. d. inghelsche.
Alse men coept ene viertele tarwen om vi. s. iii. d. dan sal weghen
i. kerspet d. broet ii. marc i. vierdonc ende in settiin ende iiii. d. inghelsce.
Alse men coept ene viertele tarwen om vi. s. vi. d., dan sal weghen
i. kerspet d. broet ii. marc i. vierdonc ende iiii. d. inghelsche.