Blader door transcripties » Stadsarchief Mechelen

archieftoegang 2, inventarisnummer 950, pagina 219

Jan van Fonteynen
Hulst, Gheylinc. Olivier Gheeringe ende Margriete Malle syn wyf
hebben vercocht Janne van Fonteynen thien gouden Rynsgulden
elken van dien tot veertich groten Vlaems gelts gerekent erffelicx
alle
chys, die zy hadden, Op alsulkenst:t; recht ende deel, dat jaer
de Vos ende Jan Vleming hebben ende dat zy tegen den voerscreven
Olivier tanderen tyden gecocht ende gecregen hebben, in alle de haeffelike
ende erffelike goeden metten gronde etcetera bynnen etcetera wesende ende gelegen
den selven Oliver byder doot van wylen Cornelis van Gheeringen
synen oude vader toecomen ende verstorven es ende dat de selve Jan
van Fonteynen tegens, den voerscreven Janne Janne de Vos endeels
gecocht ende gecregen heeft. A Domino Mechliniensi, Waranderende etcetera.
XIII octobris
Jan Scholier
Herinc, Stocman. Loy ende Marten Ymbrechts wylen Willems kynden
ende Margriete Ymbrechts haerlieder zuster, hebb de met Mathys
Kelderman haeren man hebben vercocht Janne Scholier, Twee
gouden Andries gulden, elken van dien tot veertich groten Vlaems
gelts gerekent erffelix chys, Te heffene altyt opten veerthiende
dach van Octobry Op ende aen haerlieder drie vierendeelen
van drie huysen metten hoven gronde etcetera gelegen deen neven
dandere inden Heembempt, tusschen wylen heeren Marten van
Lanchem priesters erve doen hy leefde aen deen zyde ende Henricx
van Erpe Tymmermans erve aen dander zyde. A Domino Mechliniensi, Waranderende.
Opte weerde van Seven scellinge ende sesse penninge grote Brabants
gelts vuten voerscreven drie geheelen huysen, Ende op vier Ryns
gulden vanden voerscreven pryse vut des voirgenoemde Loys ende Margriete
synder zuster, twee vierendeelen vanden selven drie huysen metten
hoven jaerlix voir vutgaende
XIIII octobry tempore simile
Loy Ymbrechts erve
Item. De voergenoemde Marten Ymbrechts ende Margriete Ymbrecht
syn zuster met haeren voirscreven man, hebben vercocht, den voerscreven Loy
Ymbrechts haeren brueder tot synen ende tot Magrieten Smeets diemen
heet Bellens syns wyfs behoef als tot haer beyder tocht ende oic
tot behoef van Peteren Ymbrechts haeren beyder soon, als tot synder
erffelicheit haerlieder Twee vierendeelen vanden voergenoemde drie
huysen metten hoven gronde etcetera boven gescreven. A Domino Mechliniensi, Waranderende.
Opten chys dair vutgaende
Assignavit III Peters erffelicx den XVI denier
ut supra
de selve
Item. De selve Marten ende Margriete syn zuster met haeren
voerscreven man, hebben bekent dat hem de voerscreven Loys haerlieder
brueder, goede wettige rekeninge bewys ende betalinge gedaen heeft
van allen den haeffeliken goeden, die henlieden byder doot van wylen
Marien van Vierssele haere moeder, in eeniger manieren toecomen
gebleven ende verstorven zyn, Ende daeraf ende van al tgene des
zy den voerscreven haeren brueder vut zaken van dien eenichssins souden
hebben
moegen heysschen, Quytgesconden los vry ende ledich, den
selve Loys haeren brueder, ende alle andere dies quitancie behoeven
geheelic ende al
XIIII octobris
Marten Ymbrechts
Lange, Gheylinc. De voirgenoemde Margriete Ymbrechts met haeren voirscreven
man, heeft vercocht den voerscreven Marten Ymbrechts haeren brueder
haer drie gouden Rynsgulden, tot veertich groten Vlaems gelts
elken van dien dien gerekent jaerlix chys die zy hadde, Opte
helft van Eenen huyse metten hove gronde etcetera achterweerts streckende
met eenen anderen cleynen huyse totten vlyete toe, dat wylen Janne
Stuers toe plach te hoeren, ende nu Ambrosius vanden Dorpe toebehoerten
gelegen inden Nieuwen Bruel, tusschen Dierick Adriaens ende synder
kynderen erve aen deen zyde ende Henrick Bliecx erve aen dander zyde
A Domino Mechliniensi, Waranderende etcetera.
Assignavit den XXVI denier
XV octobry tempore simile
Jan Ymbrechts
Item. De voirgenoemde Marten Ymbrechts heeft vercocht, den
voirgenoemde Loy Lymbrechts synen brueder, Twee gouden Rynsgulden
elken van dien tot veertich groten Vlaems gelts gerekent erffelix chys
die zy hadde ende tanderen tyden tegen Janne Scholier ge gecregen
heeft, Op een huys met eender cleynder plaetsen gronde etcetera den
voerscreven Loy toehoerende gelegen in Sinte Kathelinenstrate tusschen een
erve der weduen wylen Rommondts van Cruybeke aen deen zyde ende
de weduen wylen Lodewycx de Meyere erve aen dander zyde
A Domino Mechliniensis, Waranderende etcetera.
Assignavit den XXVI denier
ut supra
Heer Lauwers
Zueten
Borch, Heylic heer Marten van Tryt priester, heeft Terve gegeven
Kathelinen Lauwers wylen Rommonts dochter, Een huys metten hove
bogaerde ende een half buender lants dair aen liggende gronde etcetera
gelegen tot Barblegheem, tusschen Ostens van Oeyenbrugge erve
aen deen zyde ende der weduen erve van wylen Janne van Hamme
Barber aen dander zyde. A Domino Mechliniensi. Te besittene, Op eenen
jaerliken ende erffeliken chys van twee neghen scellinge groote
Brabants gelts, Ende die te betalene Altyt tot Kersmisse dair
Ende af den jersten termyn van betalingen syn sal tot Kersmisse
naestcomende, Ende opten voirchys van vyftien penningen ouder groten
Turnoyse ende twee capuynen, dair vutgaende
X octobris