Blader door transcripties » Stadsarchief Mechelen

archieftoegang 2, inventarisnummer 950, pagina 138

Keerberchstrate in Onser Vrouwen prochie tusschen een ander
huys den selven Marten toebehoerende, aen deen zyde ende Gielis
Vydts erve aen dander zyde. A Domino Mechliniensi, Waranderende. Op tweentwintich
scellinge ende sesse penninge Loevens ende eenen capuyn, dair
jaerlix vutgaende
XIII may tempore simile
Assignavit XVI Peters eens
Marten de Bresse
Oeyenbrugge, Rode. De voergenoemde Jan vander Hoeven, heeft oic vut
zaken van wysselingen voir een huys metten hovest:t; inde
Keerberchstrate gelegen, Opgedragen ende overgegeven tot
behoef vanden voerscreven Marten de Bressere, Een stuck lants
metten gronde etcetera gelegen buyten der Oeversterpoirten op
Schoenjans velt, tusschen der kynderen erve van wylen
Henricken de Pretere, aen deen zyde ende der weduen van wylen
Denys Sanders ende haer dochter erve aen dander zyde, Ende
een stuck lants metten gronde etcetera gelegen aldair, tusschen
der voerscreven kynderen de Pretere erve aen deen zyde ende der
weduen ende kynderen erve van wylen Gielis de Hertoge aen
dander zyde, welke twee stucken lants, Rommonden ende Janne
van Perke gebruederen toe plagen te hoeren. A Domino Mechliniensi, Waranderende.
Op eenen capuyn ende seventhien scellinge Loevens daer vutgaende
ut supra
Testane Ghooten
sVos
Oyenbrugge, Lange. Thorie sVos wylen Jan sVos dochter
approberende landende ende van weerden houdende, alsulken scheydinge
ende deylinge, als onlancx geleden, te wetene opten vierden dach van
deser tegewoirdiger maend van Meye lestleden, tusschen haer
ende Margrieten sVos wedue wylen Colaerts de Thoman haer
zuster voir notaris ende getuygen gemaect ende geschiet es
na volgende oic mede der begeerten ende vutersten wille
van wylen Kathelinen sVos haer beyder zuster, dairaff de
voerscreven scheydinge oic ruert ende mencie maect, Ende heeft
dairom in onderhouden ende voldoeningen van dien, voir haer
testament ende vutersten wille, openbairlic voir ons gewilt
gemaect ende geordineert dat alle ende yegewelke haere
haeffelike erffelike ende onberuerlike goeden hoedanich die zy
oft genoemt soude moegen worden, bynnen ende buyten der stad
ende vryheit van Mechelen wesende ende gelegen, die zy nu tertyt
heeft ende besittende es ende hier namaels oic het zy by successien
van iemande, by vercrigene oft anderssins, hebben ende besitten
sal, sunderlinge de ghene, die boven haer Redelike legaten
die zy ter salicheit van haer zyelen maken sal, overschieten zelen
naer haer doot ierst toecomen ende zelen, der voerseyden Margrieten
sVos haer zuster, als tot haer tocht ende anders niet, Ende naer des
selver Margrieten haer zuster doot Janne ende Ghysbrechten de
Thoman haeren wettigen kynderen, die zy vanden voerscreven wylen Colaert
de Twemon haeren man vercregen heeft, als tot der selver haere
Tselve
kynderen erffelicheyt, om ter stont naer haer doot, alle de
selve haeffelike erffelike ende onberuerlike goeden, byden voerscreven
Margrieten, alsoe lange als zy leven sal ende nair haer doot
byde selve Janne ende Ghysbrechten haeren kynderen eeuwelic ende
erffelic, aenveert gebruyct ende besetten te worden, de selver
Margrieten sVos haer zuster als tochtenersse ende de voirscreven
Janne ende Ghysbrechten, haer kynderen, naer der selver Margrieten
der moeder doot in alle ende yegewelke de voergenoemde haeffelike
erffelike ende onberuerlike goeden haere gerechte ende eenige
erfgenamen noemende makende stellende ende sonder wederroepen
instituerende, den wederseggen van iemande, oft oic den rechte
ende coustumen vander plaetsen dair de selve goeden gelegen syn
ter contracien dairaf onderhouden niet tegenstaende. Behoudelic
oft gebeurde dat eenich vanden selven Janne ende Ghysbrechte
sonder wettich gebruyke van synen live achterlatende storve
dat dan syn gedeelte der voerscreven goeden versterven ende toecomen
sal, synen anderen brueder oft synen wettigen kynderen, Ende oft zy alle
beyde storven ende aflivich werden, sonder wettige gebeurte van
haeren liven, gecomen achterlatende dat in dien gevalle, alle
de voergenoemde goeden, toecomen aenwassen ende versterven zelen
den gerechten erfgenamen, dien zy alsdan naer den rechte
vander stad, oft vander plaetsen dair de selve goeden, gelegen
syn, sculdich zelen syn toe te comene ende tot verstervene
XII may tempore simile
Henrick van Schore
Beringen, Oeyenbrugge, Cornelis de Grove diemen heet de Moor heeft vercocht
Henricken van Schore tot synen ende Kathelinen sBorgers syns wyfs
te behoef, Een huys metter schueren hove gronde etcetera gelegen tot
Heffene aende Brugge, tusschen Jans de Cale erve aen deen zyde
ende Jans de Man erve aen dander zyde. A Domino Mechliniensi, Waranderende. Opte weerde
van sesthien scellinge groten Brabants gelts daer jaerlix vutgaende
Assignavit
XIIII may tempore simile
Cornelis de Grove alias
de Moor
Item. De voergenoemde Henrick van Schore, heeft bewesen, den
voerscreven Cornelis de Grove acht gouden Rynsgulden, elken van
dien tot veertich groten Vlaems gelts gerekent, erffelix chys
Te heffene altyt opten vyftienden dach van meye Op ende aen
des voerscreven Henricx huys met synen voirscreven toebehoerten, boven bescreven
Ende voirtaen op alle dander syne erffelike goeden metten gronde etcetera
bynnen der voerscreven stad ende vryheit van Mechelen gelegen, die hy
nu ter tyt heeft ende hier namaels oic hebben ende vercrigen sal
A Domino Mechliniensi, Waranderende. Opten voerscreven chys, daer jaerlix voir vutgaende, met
alsulker condicien, dat de voerscreven Henrick sal moegen lossen ende quyten
altyt als hem dat gelieven sal de voerscreven acht Rynsgulden des
voerscreven chys, tot twee malen ende anders niet ende elken gulden van
dien met sesthien geliker gulden ende met vollen chyse
ut supra