Blader door transcripties » Stadsarchief Mechelen

archieftoegang 2, inventarisnummer 936, pagina 7

custbaer Mechelscher maten, lyfpacht, Te wetene elke veertele daer
af op eenen groten Brabants erve den besten, lyfpachts, Te leveren
altyt tot haeren huyse, tot Sinte Mertensmisse daeraf den
yersten termyn van betalingen syn sal van Sinte Martensmisse
naestcomende over een jair daer naer volgende, Op ende aen
des voirscreven Jans vanden Hoose huys metten hove ende met eenen
stuck lants daer aen gelegen, houdende tsamen omtrent vyf
vierendeel, gelegen te Hombeke aende Cattestrate tusschen
den cloestere erve van Lelyendale ende Jans de Lathouwere erve
Item op syn stuck eeussele houdende omtrent een buender geheeten
den Nynanck gelegen aldair aende Clemmerstrate tusschen
Henricx vander Meere erve aen deen zyde ende Aerdt Mergaerts
erve, Op ende voirtaen op alle der voirscreven Jans andere haeffelike
ende erffelike goeden, die hy nu heeft ende namaels hebben
ende vercrigen zal, waer die bynnen oft buyten der stad ende
vryheit van Mechelen gelegen syn oft bevonden zelen mogen
worden. A Domino Mechliniensi, Waranderende. Op drie gelike veertelen Rogs ende negen
scellinge Lovens vuten voirscreven huyse met synen toebehoirten
ende op eenen groten Brabants vuten voirscreven stuck van eens
jaerlicx voir vutgaende
IIIa tempore simile
Servaes Gerinx
ende syn wyf
Mol, Bossche. Jan Brugman heeft vercocht Servaes Gerincx tot
wive
sinen ende Kathelinen Boeden Hals syns wyfs behoef een
huys metten hove gronde gronde gelegen inde Nonnestrate
tusschen Henric Pauwels erve ende Lysbetten Gouwaerts erve
streckende achterweerts metten voirscreven hove toten vlyete
toe aldaer. A Domino Mechliniensi, Waranderende. Op twee chysgulden daer
vutgaende
Assignavit XXXII Peters
novembris tempore simile
Jan Brugman
Item. De voirscreven Servaes Gheerincx ende syn wyf dent
den voirscreven Janne Brugman, vierentwintich gouden Peters
goeder etcetera te wetene XXXVI groten Vlaems gelts voir
elken de selve Peters gerekent, Te betalene de acht
Petere daeraf van Kersmisse naestcomende over een
jaer daerna volgende, Ende alsoe voirtaen telken
Kersmisse alsdan deen naer dander volgende acht Peters
Donck etcetera Ende hier voir hebben sy verbonden alle
haere haeffelike ende erffelike goeden presenta et futura.
infra X stuver, Ende sunderlinge tvoirgenoemde haer huyse
metten hove boven genoemt. A Domino Mechliniensi,
ut supra
Gheerd vander
Spreet
Diest, Bossche. Lysbeth sMollenere wylen Jans sMollenere dochter met
Servaes Noetmans haeren man, Katheline sMolleneren haer zuster
met eenen momboir hair metten rechte verleent, Ende Jan
sMolleneren, wylen Peters de Molenere sone, de die der selver
zusteren brueder waer doen hy leefde hebben opgedragen tot behoef
van Gheerde vander Spreet weduere van wylen Marien
sMolleneren, alle alsulke erffelike goeden als henlieden byder doot
vander selve wylen Marien de voirscreven Lysbetten ende Kathelinen
zuster ende des voirscreven Jans moeye, in eeniger manieren toecomen
ende verstorven mogen syn, binnen der stad ende vryheit van
Mechelen wesende ende gelegen. A Domino Mechliniensi, Waranderende etcetera. Ende daer
toe soe hebben de voirscreven persoenen opde quytgeschonden los vry
ende ledich den voirscreven Gheerde van allen den haeffeliken goeden
die henlieder byder doot vander voirscreven wylen Marien in
eeniger manieren verstorven mogen syn
VIa novembry tempore simile
Jan van Ympele
ende syn wyf
Item. Katheline Vlieghe wedue wylen Jans vanden Dale
heeft opgedragen tot behoef van met Janne de Baertmakere
haeren wettigen man ende momboir, heeft opgedragen tot behoef
van Janne van Ympele ende van Kathelinen vanden Dale sinen
wive allet recht dat zy hadde in een huys metten hove
gronde gelegen in Onsen Vrouwenstrate opten hoeck vander
Brabantstraetkene, tusschen tselve aen deen zyde ende Gielis
vanden Bloke erve aen dander zyde. A Johannes de Oeyenbrugge
Waranderende etcetera
ut supra tempore simile
de wedue van
wylen Janne vanden
Dale
Item. De voirscreven Katheline vanden Dale metten voirscreven Janne van
Ympele haren man heeft quytgeschonden los vry ende ledich
der voirscreven Kathelinen Vlyeghs van allen den haeffeliken goeden
die haer byder doot vanden voirscreven wylen Janne vanden Dale
haeren brueder ende die yerste man was doen hy leefde vander
selver Katheline Vlyeghs, in eeniger manieren verstorven mogen
syn
ut supra tempore simile
Digne van
Resingen
Item. De voirscreven Jan van Ympele ende Katheline vanden Dale
syn wyf hebben bewesen, Cornelisen van Resingen tot behoef
van Dignen van Resingen synder dochter eenen chysgulden
erffelic chys, Te heffene altyt tot Kersmisse daer af den jersten
termyn van betalingen syn sal tot Kersmisse naestcomende, Ende op
haerlieder huys metten hove boven genoemt in Onser Vrouwe
strate gelegen. A Johannes de Oeyenbrugge, Waranderende. Op drie chysgulden
daer voir vutgaende
ut supra tempore simile