Blader door transcripties » Lokale Kronieken uit de Nederlanden 1500-1850

archieftoegang 1499_Rott_Jans, pagina 63

53
dat hij haestelic te Grave starf een off twee dagen voer off na sinte Pietersdach in sille [22 febr.] int jaer [M IIIIC] LXXIII65. Men seide dat hij twee off drie dagen doot geweest hadde eer ment openbaerde, want mijn heere van Perwis66 quam van mijns genadigen heeren wegen van Bourgoengen wel met hondert glavien volcx in Grave eer hartooch Aernout begraven was, also men seide.
Item. In denselven zomer int jaer LXXIII quam hartooch Karel in Gelrelant ende lach voer Nymmage, ende hij creech sijnen wille van den geheelen steden ende lande van Gelre ende wart overall gehult67. Ende het was up dat jaer den scoensten zomer die oit man leefde. Ende hartooch Karel toech mit scoenen state uut Gelrelant na Lucenburch toe totten keyser van Romen Ludevicus, die tot Lucenburch toe gecomen was om mit mijn heere, den hartoge van Bourgoengen, te spreken68.
[f. 268v] Iteml. Int jaer 14waeren tot Rotterdam te coepe rijpe kerssen ende krieken, ende die rapen gemayt ende gedorsen tot veel plaetsen; item den taru ende den rogge was all in voer sinte Jacobsdach [25 juli], want men brochte uut Zeelant tot Rotterdam ende voert in Hollant voer sinte Jacobsdach nyewen taru te coepe. Item. Die wijndruyven waeren wel rijp ende den nyewen most quam tot Rotterdam van Dordrecht wel guet up sinte Jansdach decollacio [29 aug.]. Ende het was een zeer droech ende een heet jaer ende tlant was in Hollant noch zoe droech van water tuschen sinte Martijnsdach [11 nov.] ende dat die beesten, die noch overall uutgingen, tot veel plaetsen in Hollant nauu water gecrigen en conden in de weye te drincken.
Item. Die kerc ende die kerctoorn tot Naeldwijc barnden all suver off van den blixem ende donder die was up sinte Barbarenavonde [3 dec.] int jaer [M IIIIC] LXXI snachts tot XII huyeren69.