Blader door transcripties » Lokale Kronieken uit de Nederlanden 1500-1850

archieftoegang 1499_Rott_Jans, pagina 57

voer tMaertsdiep17 ende deden hoeren upslach in Tesselt in Hollant, ende quamen tot Egmonde, van Egmonde tot Haerlem, tot Noortwijck, daer sliep hij een nacht; tot Leyden, ende sdaechs na quam den coninc van Ingelant mit sijnen volke also in den Hage18. Ende mijn genadige heere van Bourgoengen was up die tijt tot Hesdijn, die mien up die tijt haestige boden van deser tidingen sende19. Ende die van Calis staken vlus uut die wapen van Warvic. Ende die coninc was in den Hage tot sdaechs voer sinte Thomasdach [20 dec.] toe ende toech doe mit mijn heere van den Gruythuse, stedehouder van Hollant, tot Brugge ende omtrent Hesdijn bij mijnen genadigen heere, ende was daer ende daeromtrent in Zeellant, in Middelburch, een wijl tijts. Ende vergaderde sijn volc in Middelburch ende sijn scepen in de Wielinge ende int Zwin tot een groot getal, ende voer over na die Noortcontrey, daer sijn vrinden waeren mit veel paerden die hij hadde doen scepen ende omtrent mit IIIM man, alsoe men seide. Ende ghinc tseile upten sonnendach als men in der Vasten sang Reminiscere, dat was upten Xen dach van maerte, int jaer [M IIIIC] LXXI, ende quam in Ingelant an de noortcust an20 ende vergaderde doen alsoe veel volcx dat hij upten Paesdach [14 april] int jaer LXXI voirs. smargens tot VII uren X off XII mijlen van Lonnen een grote strijt vacht jegens Warvic21. Ende daer wart Warvic verslegen mit een groet heer, dat sijn broeder was, ende was gehieten Montegu, ende zij worden vlus tot Lonnen doot gebrocht ende worden alsoe doot geleit in Sinte Pouwels kerc van hoir middel upwaerts al bloet, dat se een yegelyc sien mochte22. Ende daer bleef veel volcx doot in den strijt23.
Item. Upten IIIIen dach van meye int jaer LXXI na Paesdach voirs. doen hadde coninc Eduwaert voirnoemt weder een grote strijt te Wlesberi24, aldaer up die tijt verslegen worden dese heeren hierna gescreven25. In den eersten Eduwaert,
49